இலங்கையின் தெற்கு கடற்பரப்பிற்கு அப்பால் உள்ள சர்வதேச கடல் பகுதியில், அமெரிக்காவால் தடை விதிக்கப்பட்ட கச்சா எண்ணெய் கப்பல் ஒன்றை அமெரிக்க கடற்படையினர் அதிரடியாகச் சோதனையிட்டுத் தங்களது கட்டுப்பாட்டுக்குள் கொண்டுவந்துள்ளனர்.
அமெரிக்க இந்தோ-பசிபிக் கட்டளையகம் (USINDOPACOM) விடுத்துள்ள அறிக்கையின்படி, கடந்த வெள்ளிக்கிழமை (ஜூன் 5) காலை இந்த நடவடிக்கை மேற்கொள்ளப்பட்டுள்ளது.
சர்வதேச கடற்பரப்பில் பரபரப்பு: இது குறித்துப் பெயர் குறிப்பிட விரும்பாத இலங்கை அரசின் உயர் அதிகாரி ஒருவர் கூறுகையில், அமெரிக்க கடற்படையினரின் இந்தச் சோதனை நடவடிக்கை இலங்கையின் கடல் எல்லைக்கு வெளியில், தெற்கு சர்வதேச கடற்பரப்பில் நடைபெற்றதை உறுதிப்படுத்தியுள்ளார்.
‘எம்.டி டேவினா’ (MT Davina – IMO 9259367) என்ற பெயருடைய இந்த எண்ணெய் கப்பல், சோதனையின் போது ‘லெனோர்’ (Lenore) என்ற பெயரில் இயங்கி வந்துள்ளது. ஈரானிய எண்ணெயை சட்டவிரோதமாகக் கடத்துவதற்கு உதவியதாக, அமெரிக்க நிதித்துறையின் வெளிநாட்டு சொத்துக்கள் கட்டுப்பாட்டு அலுவலகத்தால் (OFAC) இந்தக் கப்பலுக்கு ஏற்கனவே தடை விதிக்கப்பட்டிருந்தது குறிப்பிடத்தக்கது.
அமெரிக்கா எச்சரிக்கை: இந்தச் சோதனை குறித்து அமெரிக்க இந்தோ-பசிபிக் கட்டளையகம் வெளியிட்டுள்ள அறிக்கையில் கூறப்பட்டுள்ளதாவது:
“இந்தோ-பசிபிக் எல்லைக்குட்பட்ட இந்தியப் பெருங்கடல் பகுதியில், சட்டவிரோதமாக இயங்கி வந்த ‘எம்.டி டேவினா’ கப்பலில் அமெரிக்கப் படைகள் சர்வதேச கடல் சட்டங்களின்படி சோதனையிட்டன. ஈரானுக்கு ஆதரவாகச் செயல்படும் இத்தகைய சட்டவிரோதக் குழுக்களின் செயல்பாடுகளை முடக்க உலகளாவிய கடல்சார் சட்ட அமலாக்கத்தை நாங்கள் தொடர்ந்து மேற்கொள்வோம். சர்வதேச கடற்பரப்பைத் தடை விதிக்கப்பட்டவர்கள் தங்களின் கேடயமாகப் பயன்படுத்த முடியாது.”
இலங்கைக்கு அதிகரிக்கும் கவலை: சர்வதேச கடல்சார் சட்டங்களை மீறி, இந்தக் கப்பல் அடிக்கடி தனது இருப்பிடத்தைக் காட்டும் தானியங்கி அடையாள அமைப்பை (AIS) அணைத்துவிட்டுப் (Gone dark) பயணித்துள்ளது. ஆனால், அமெரிக்கக் கடற்படையின் இந்தச் சோதனையைத் தொடர்ந்து, அக்கப்பல் மீண்டும் தனது இருப்பிடச் சமிக்ஞைகளை (AIS Signals) வெளியிடத் தொடங்கியுள்ளது.
இதற்கிடையில், இது போன்ற தடை விதிக்கப்பட்ட கப்பல்கள் இந்தியப் பெருங்கடலில் உலா வருவது குறித்தும், அவை அவ்வப்போது இலங்கையின் கடல் எல்லைக்கு மிக அருகில் வந்து செல்வது குறித்தும் கொழும்பு பாதுகாப்பு வட்டாரங்கள் மத்தியில் கவலை அதிகரித்துள்ளது. எனினும், இச்சம்பவம் இலங்கையின் எல்லைக்கு வெளியில் நடந்துள்ளதால், நாட்டின் சட்ட வரம்பிற்குள் நடவடிக்கை எடுக்க முடியாத நிலை உள்ளதாகத் தெரிவிக்கப்பட்டுள்ளது.
