சிறைச்சாலைக்குள் பொதுபலசேனாவின் ஞானசார தேரரின் காவியுடை முறையற்ற விதத்தில் அகற்றப்பட்டதாக தெரிவிக்கப்படுவதை நிராகரித்துள்ள சிறைச்சாலைகள் திணைக்களம் சிறைக்குள் அவ்வாறான சம்பவமொன்று இடம்பெறவில்லை என குறிப்பிட்டுள்ளது.
சிறைச்சாலைகள் ஆணையாளரும் ஊடக பேச்சாளருமான சேனக பலவத்த இது குறித்து மேலும் தெரிவித்துள்ளதாவது
சிறைச்சாலை பணியாளர்களும் அதிகாரிகளும் சிறைச்சாலைகளை நிர்வகிக்கும் சட்டகட்டமைப்பிற்கு உட்பட்டே செயற்படுகின்றனர்.
சிறைச்சாலையில் உள்ள மததலைவர்களுக்கு எதிராக தன்னிச்சையான நடவடிக்கைகளை எடுப்பதற்கு சிறைச்சாலைகளை நிர்வகிக்கும் சட்டகட்டமைப்பில் அவர்களுக்கு இடமில்லை.
முறையற்ற விதத்தில் பலவந்தமாக ஞானசாரதேரரின் காவியுடை அகற்றப்பட்டதாக எங்களுக்கு எந்தவித முறைப்பாடும் கிடைக்கவில்லை.
சிறையில் அடைக்கப்பட்டுள்ள மதகுருமாரின் விவகாரங்கள் குறித்து ஆராய்வதற்காக குழுவொன்று நியமிக்கப்பட்டுள்ளது,இந்த குழு விரைவில் தனது பரிந்துரைகளை முன்வைக்கும், அந்த குழுவின் பரிந்துரைகளை வெளிப்படை தன்மையுடன் நடைமுறைப்படுத்த முயல்வோம் என அவர் தெரிவித்துள்ளார்.
(ரி)
