இலங்கை வர்த்தக சம்மேளனம் (Ceylon Chamber of Commerce), இந்தியத் தொழில்துறை கூட்டமைப்புடன் (CII) இணைந்து, கடந்த வாரம் மும்பையில் ‘இலங்கை – இந்திய வணிக மன்றம்: இலங்கையின் வளர்ச்சி மற்றும் முதலீட்டில் பங்காளிகளாக இணைதல்’ மற்றும் ‘CII – இலங்கை வர்த்தக சம்மேளன தலைமை அதிகாரிகளின் கலந்துரையாடல்’ ஆகிய நிகழ்வுகளை ஏற்பாடு செய்திருந்தது. முன்னுரிமை அளிக்கப்படும் துறைகளில் பொருளாதார ஈடுபாட்டை ஆழப்படுத்தவும், ஒத்துழைப்புக்கான புதிய வழிகளை ஆராயவும் இந்திய மற்றும் இலங்கையைச் சேர்ந்த சிரேஷ்ட அரசு பிரதிநிதிகள், தொழில்துறை தலைவர்கள் மற்றும் கொள்கை வகுப்பாளர்களை இந்த நிகழ்வுகள் ஒன்றிணைத்ததாக இலங்கை வர்த்தக சம்மேளனம் ஊடக அறிக்கை ஒன்றில் தெரிவித்துள்ளது.
இந்தக் கலந்துரையாடல்கள் இந்தியா-இலங்கை பொருளாதார உறவுகள் குறித்த வளர்ந்து வரும் நம்பிக்கையை பிரதிபலித்ததுடன் வர்த்தகம், முதலீடுகள், இணைப்பு (connectivity), சுற்றுலா, புதுப்பிக்கத்தக்க எரிசக்தி, தளவாடங்கள் (logistics), டிஜிட்டல் உருமாற்றம், உட்கட்டமைப்பு, சுகாதாரம், கல்வி, உற்பத்தி மற்றும் தொழில்நுட்பம் ஆகிய துறைகளில் ஒத்துழைப்பை விரிவுபடுத்துவதில் கவனம் செலுத்தின.
இதில் இந்தியாவிற்கான இலங்கை உயர்ஸ்தானிகர் மகிஷினி கொலோன்; இலங்கையதிபரின் சிரேஷ்ட பொருளாதார ஆலோசகர் துமிந்த ஹுலங்கமுவ; மகாராஷ்டிரா அரசின் நெறிமுறை மற்றும் நேரடி வெளிநாட்டு முதலீட்டு செயலாளர் டாக்டர் ராஜேஷ் ரவீந்திர கவாண்டே; மும்பைக்கான இலங்கைத் தூதுவர் பிரியங்கா விக்ரமசிங்க; இலங்கை வர்த்தக சம்மேளனத்தின் தலைவர் மற்றும் ஜோன் கீல்ஸ் ஹோல்டிங்ஸ் பிஎல்சி (John Keells Holdings PLC) தலைவர் கிரிஷன் பாலேந்திரா; CII மேற்கு பிராந்திய சர்வதேச வர்த்தகம் மற்றும் முதலீட்டிற்கான துணைக் குழுவின் இணைத் தலைவர் மற்றும் பாலிகேப் இந்தியா (Polycab India) நிறுவனத்தின் தலைமை நிர்வாக அதிகாரி அனுராக் அகர்வால்; CII மேற்கு பிராந்திய சுற்றுலா மற்றும் விருந்தோம்பல் துணைக் குழுவின் தலைவர் விஷால் காமத்; இலங்கை வர்த்தக சம்மேளனத்தின் துணைத் தலைவர் மற்றும் ஸ்டாண்டர்ட் சார்ட்டர்ட் வங்கி இலங்கையின் தலைமை நிர்வாக அதிகாரி பிங்குமால் தேவரதந்தி; இலங்கை வர்த்தக சம்மேளனத்தின் பிரதித் துணைத் தலைவர் மற்றும் ஹிர்தரமணி குழுமத்தின் தலைவர் வினோத் ஹிர்தரமணி மற்றும் இலங்கை வர்த்தக சம்மேளனத்தின் பொதுச்செயலாளர் ஷிரான் பெர்னாண்டோ ஆகியோர் கலந்துகொண்டனர்.
பிரதிநிதிகளை வரவேற்றுப் பேசிய திரு. அகர்வால், இந்தியா-இலங்கை பொருளாதார உறவுகளில் ஏற்பட்டுள்ள வளர்ந்து வரும் வேகம் மற்றும் இருதரப்பு ஒத்துழைப்பை உந்தித் தள்ளும் எதிர்கால நோக்குடைய துறைகளின் எழுச்சி குறித்து எடுத்துரைத்தார்.
இந்த மன்றத்தில் உரையாற்றிய திரு. பாலேந்திரா, “இலங்கை வர்த்தக சம்மேளனத்தில், எமது பங்களிப்பை வெறும் வசதிகளை ஏற்படுத்திக் கொடுப்பதோடு மட்டும் நாங்கள் பார்க்கவில்லை. வணிகங்களை ஒன்றிணைப்பதிலும், கூட்டாண்மைகளை உருவாக்குவதிலும், இலங்கையின் பொருளாதார மாற்றத்திற்குப் பங்களிக்கும் முதலீட்டு வரவுகளை ஆதரிப்பதிலும் ஒரு பாலமாகச் செயல்பட நாங்கள் இலக்கு கொண்டுள்ளோம். இலங்கை இப்போது வளர்ச்சி நோக்கிய எதிர்காலத்தை நோக்கித் திரும்பிக்கொண்டிருக்கிறது. இந்தச் சூழலில், இந்தியா ஒரு அண்டை நாடு மட்டுமல்ல, ஒரு முக்கியமான பங்காளியும் கூட” என்று தெரிவித்தார்.
