காலநிலை – இனி இலங்கையின் பொருளாதார எதிர்காலத்திற்கு முக்கியமானது: முதலீட்டாளர்களுக்கு விடுக்கப்பட்ட எச்சரிக்கை

காலநிலை (Climate resilience-  பாதிப்புகளைத் தாங்கி மீளும் திறன்)    ) என்பது இனி கொள்கை வகுப்பின் ஒரு ஓரத்தில் இருக்கும் சுற்றுச்சூழல் கவலை மட்டுமல்ல; அது இலங்கையின் எதிர்கால போட்டித்தன்மை, ஏற்றுமதித் திறன், முதலீட்டு ஈர்ப்பு மற்றும் நீண்டகால பொருளாதார வளர்ச்சியைத் தீர்மானிக்கும் ஒரு முக்கியமான பொருளாதாரத் தேவையாகும் என்று முன்னணி வளர்ச்சி முகமைகளும் தனியார் துறைத் தலைவர்களும் எச்சரித்துள்ளனர்.

கொழும்பில் அண்மையில் நடைபெற்ற ‘இலங்கை காலநிலை உச்சிமாநாடு’ (Sri Lanka Climate Summit) என்ற உயர்மட்ட மாநாட்டில் இந்த எச்சரிக்கை விடுக்கப்பட்டுள்ளது. காலநிலை பாதிப்புகள் அடிக்கடி மற்றும் அதிக செலவுமிக்கதாக மாறி வருவதால், இலங்கை தனது பொருளாதார மீட்சியைத் தக்கவைத்து முதலீடுகளை ஈர்க்க வேண்டுமானால், காலநிலை மாற்றத்தைத் தாங்கக்கூடிய உள்கட்டமைப்பை வலுப்படுத்துதல், முக்கிய பயன்பாட்டுத் துறைகளில் (Utility sectors) சீர்திருத்தங்களை மேற்கொள்ளுதல், தரவு அமைப்புகளை நவீனப்படுத்துதல் மற்றும் உலகளாவிய காலநிலை நிதியுதவிகளைப் பெறுவதை மேம்படுத்துதல் ஆகியவை அவசரத் தேவையாகும் என நிபுணர்கள் சுட்டிக்காட்டியுள்ளனர்.

முன்னணி சர்வதேச நிறுவனங்கள், வளர்ச்சி முகமைகள் மற்றும் தனியார் துறைத் பிரதிநிதிகள் கலந்துகொண்ட இந்த விவாதத்தில், காலநிலை மாற்றத்திற்கு ஏற்ப மாற்றியமைத்துக் கொள்வதை (Climate adaptation) ஒரு நிதிச் சுமையாகப் பார்க்காமல், வளர்ந்து வரும் பொருளாதாரங்களுக்குக் கிடைக்கக்கூடிய மிகப்பெரிய பொருளாதார வாய்ப்புகளில் ஒன்றாகக் கருத வேண்டும் என்று வாதிடப்பட்டது.

இம்மாநாட்டில் உரையாற்றிய ஆசிய வளர்ச்சி வங்கியின் (ADB) இலங்கைக்கான பணிப்பாளர் ஷானன் கௌலின் (Shannon Cowlin) பின்வருமாறு தெரிவித்தார்: “வலுவான பொருளாதாரக் கட்டமைப்பைக் கொண்ட நாடுகள் மட்டுமே காலநிலை அதிர்ச்சிகளைத் தாங்கி, அதிலிருந்து விரைவாக மீளக்கூடிய நிலையில் உள்ளன. காலநிலை நெகிழ்வுத்தன்மை என்பது உள்கட்டமைப்புடன் மட்டும் தொடர்புடையதல்ல. அது பொருளாதாரத்தின் ஒட்டுமொத்த நெகிழ்வுத்தன்மையையும் (Macroeconomic resilience) பொறுத்தது. சரியான பொருளாதார நிர்வாகத்தைப் பராமரிக்கும் நாடுகளால் மட்டுமே பேரிடர்கள் ஏற்படும் போது மிகவும் திறம்படச் செயல்பட முடியும்.”

சமீபத்திய ‘டிட்வா’ புயலின் (Cyclone Ditwa) போது இலங்கையின் செயல்பாட்டைக் குறிப்பிட்ட கௌலின், நாட்டின் பொருளாதார சீர்திருத்தங்கள் மற்றும் மீட்புத் திட்டங்கள் காரணமாக, முந்தைய ஆண்டுகளுடன் ஒப்பிடுகையில் இம்முறை பேரிடரை எதிர்கொள்ளும் திறன் கணிசமாக மேம்பட்டிருந்ததாகக் கூறினார்.

மின்சாரம் மற்றும் நீர் விநியோகத் துறைகளில் மேற்கொள்ளப்பட்டு வரும் சீர்திருத்தங்களின் முக்கியத்துவத்தை, குறிப்பாக உற்பத்திச் செலவை பிரதிபலிக்கும் கட்டண முறைகளை (Cost-reflective tariffs) நிறுவுவதற்கான முயற்சிகளை ஆசிய வளர்ச்சி வங்கி (ADB) சுட்டிக்காட்டியுள்ளது. இதன் மூலம் மட்டுமே உள்கட்டமைப்புகளைப் பராமரிக்கவும் மேம்படுத்தவும் முடியும் எனத் தெரிவிக்கப்பட்டுள்ளது. “நிதி நெருக்கடியில் இருக்கும் நிறுவனங்கள் காலநிலை நெகிழ்வுத்தன்மையில் போதுமான முதலீடுகளைச் செய்யும் என்று நாம் எதிர்பார்க்க முடியாது” என்றும் அவர் எச்சரித்தார்.

புயலுக்குப் பிந்தைய மீட்புப் பணிகளுக்கு அவசர நிதியுதவிகளை வழங்கத் தயாராகி வரும் அதேவேளை, சர்வதேச அளவில் அங்கீகரிக்கப்பட்ட “Build Back Better” (மீண்டும் சிறப்பாகக் கட்டியெழுப்புதல்) என்ற கொள்கைகளை மறுகட்டமைப்புத் திட்டங்களில் புகுத்துவதில் இந்த வங்கி கவனம் செலுத்தி வருகிறது. சேதமடைந்த சொத்துக்களை வெறும் பழைய நிலைக்குக் கொண்டு வராமல், கடுமையான காலநிலை மாற்றங்களைத் தாங்கக்கூடிய வகையில் சாலைகள், வடிகால் அமைப்புகள் மற்றும் பொது உள்கட்டமைப்புகளை வலுப்படுத்துவதே இதன் நோக்கமாகும்.

ஏற்றுமதித் துறைக்கான அச்சுறுத்தல்:

டில்மா (Dilmah) நிறுவனத்தின் தலைவரும் தலைமை நிர்வாக அதிகாரியுமான தில்ஹான் பெர்னாண்டோ எச்சரிக்கையில், காலநிலை மாற்றம் என்பது இலங்கையின் பிரீமியம் தயாரிப்புகளான சிலோன் தேயிலை (Ceylon Tea) மற்றும் சிலோன் கறுவா (Ceylon Cinnamon) ஆகியவற்றின் சர்வதேசப் போட்டித்தன்மைக்கு விடுக்கப்பட்ட நேரடி அச்சுறுத்தலாகும் என்றார்.

“காலநிலைக்கேற்ப மாற்றியமைத்துக் கொள்வது (Adaptation) என்பது தப்பிப்பிழைப்பதற்கான மற்றொரு சொல்லாகும்” என்று பெர்னாண்டோ கூறினார். அதிகரித்து வரும் வெப்பநிலை, மாறிவரும் மழைப்பொழிவு மற்றும் கணிக்க முடியாத வானிலை மாற்றங்கள் ஆகியவை, வரலாற்று ரீதியாக சர்வதேச அளவில் இலங்கை விவசாயத் தயாரிப்புகளுக்குப் புகழைத் தேடித்தந்த சுற்றுச்சூழல் சூழலுக்கு சவாலாக அமைந்துள்ளன என்று அவர் குறிப்பிட்டார்.

“பூமி ஏற்கனவே 1.3 டிகிரி செல்சியஸ்க்கும் அதிகமாக வெப்பமடைந்துள்ளது. விஞ்ஞானிகள் இது 3 டிகிரி வரை உயரக்கூடும் என்று கணித்துள்ளனர். இது மில்லியன் கணக்கான ஆண்டுகளில் அனுபவித்திராத மோசமான சுற்றுச்சூழல் சூழலை உருவாக்கும்,” என்றார். இந்த காலநிலை அழுத்தங்கள் தேயிலைத் துறையின் உற்பத்தி அளவு மற்றும் தரம் ஆகிய இரண்டையும் கணிசமாக பாதிக்கலாம் என்று பெர்னாண்டோ எச்சரித்தார்.

“நாம் 400 மில்லியன் கிலோகிராம் தேயிலை உற்பத்தியை எட்டுவது பற்றிப் பேசுகிறோம். ஆனால், நாம் இன்று காணும் தீவிர காலநிலை மாற்றங்களைக் கருத்தில் கொள்ளும்போது, இத்தகைய இலக்குகள் நீண்ட காலத்திற்குச் சாத்தியமானவையா என்ற கேள்வியை நாம் எழுப்ப வேண்டும்,” என்றார்.

சர்வதேச சந்தைகளில் இருந்து எழும் புதிய வணிகச் சவாலையும் அவர் சுட்டிக்காட்டினார். ஐரோப்பிய ஒன்றியத்தின் (EU) புதிய நிலைத்தன்மை மற்றும் விநியோகச் சங்கிலி விதிமுறைகள் (Sustainability and supply-chain regulations) ஏற்றுமதியாளர்கள் மீது கடுமையான சுற்றுச்சூழல் இணக்கத் தேவைகளை விதிக்கவுள்ளன. இதனால், நிலையான உற்பத்தி முறைகளை நிரூபிக்கத் தவறும் நிறுவனங்களின் சந்தை வாய்ப்புகள் பாதிக்கப்படலாம்.

“இந்த முன்னேற்றங்கள் வெறும் சட்ட விதிமுறைகள் மட்டுமல்ல. அவை உலகளாவிய வர்த்தகம் மற்றும் நுகர்வோர் எதிர்பார்ப்புகளில் ஏற்பட்டுள்ள ஒரு கட்டமைப்பு மாற்றத்தைக் காட்டுகின்றன,” என்று பெர்னாண்டோ கூறினார். இருப்பினும், வணிக நிறுவனங்கள் காலநிலை மாற்றத்தை ஒரு சுமையாகப் பார்க்காமல், அதனை ஒரு உத்திசார் வளர்ச்சி வாய்ப்பாக அணுக வேண்டும் என்று அவர் வலியுறுத்தினார்