கொழும்பு (Time Out Asia): நல்வாழ்வு மற்றும் ஆன்மீகச் சுற்றுலாவுக்காக (Wellness Tourism) உலக அளவில் மக்கள் அதிகம் விரும்பும் மற்றும் வேகமாக வளர்ந்து வரும் நாடுகளின் பட்டியலில் (Top Trending Wellness Destination) இலங்கை 2026 ஆம் ஆண்டிற்கான முதலாம் இடத்தை நாட்டிப் பிடித்து சாதனை படைத்துள்ளது.
பிரபல சர்வதேச சுற்றுலா முன்பதிவு தளமான BookRetreats.com வெளியிட்டுள்ள ‘State of Retreats 2026’ என்ற உத்தியோகபூர்வ உலகளாவிய நல்வாழ்வு சுற்றுலா அறிக்கையிலேயே இந்த விபரம் வெளியிடப்பட்டுள்ளது. நல்வாழ்வுச் சுற்றுலாவுக்காக உலகப் பயணிகள் மத்தியில் இலங்கைக்கான தேடல் மற்றும் தேவை கடந்த ஆண்டை விட 100 சதவீதத்தால் (+100%) சடுதியாக அதிகரித்துள்ளதாக அந்த அறிக்கை சுட்டிக்காட்டியுள்ளது.
உலகளாவிய ரீதியில் முதல் 10 இடங்களைப் பிடித்த நாடுகள்:
அறிக்கையின்படி, நல்வாழ்வுத் தேடலில் வருடாந்த வளர்ச்சியின் அடிப்படையில் வரிசைப்படுத்தப்பட்ட முதல் 10 நாடுகள் பின்வருமாறு:
-
இலங்கை (+100%)
-
ஆஸ்திரேலியா (+85%)
-
மொராக்கோ (+83%)
-
இங்கிலாந்து (+82%)
-
ஸ்பெயின் (+80%)
-
நேபாளம் (+52%)
-
தாய்லாந்து (+48%)
-
மெக்சிகோ (+44%)
-
கோஸ்டாரிகா (+42%)
-
கனடா (+36%)
இலங்கை முதலிடத்தைப் பிடிக்கக் காரணங்கள் என்ன?
வெறும் மசாஜ் (Massage) செய்துகொள்வதோடு நல்வாழ்வுச் சுற்றுலா முடிந்துவிடுவதில்லை என்பதை 2026 இன் பயணப் போக்குகள் உணர்த்துகின்றன. மன அமைதி, டிஜிட்டல் நச்சு நீக்கம் (Digital Detox) மற்றும் இயற்கை வழி மருத்துவத்தை நாடியே பயணிகள் இலங்கை வருகின்றனர்.
-
2,000 வருட பாரம்பரிய ஆயுர்வேதம்: மருத்துவர்களின் வழிகாட்டலின் கீழ் வழங்கப்படும் இலங்கையின் பாரம்பரிய ஆயுர்வேத சிகிச்சை முறைகள் மற்றும் யோகா பயிற்சிகளுக்கு உலக அரங்கில் பெரும் வரவேற்பு கிடைத்துள்ளது. குறிப்பாக கண்டி (Kandy), பெந்தோட்டை (Bentota) போன்ற பகுதிகளில் உள்ள நல்வாழ்வு மையங்கள் சர்வதேசப் பயணிகளை அதிகம் ஈர்க்கின்றன.
-
மலிவான கட்டணங்கள்: மற்ற நாடுகளுடன் ஒப்பிடுகையில் இலங்கையில் 3 முதல் 4 நாட்கள் தங்கியிருக்கும் ஒரு நல்வாழ்வுச் சுற்றுலா பேக்கேஜ் சராசரியாக 372 அமெரிக்க டாலர்கள் ($372.18) என்ற மலிவான விலையிலிருந்து தொடங்குகிறது.
-
இலவச விசா சலுகை: கடந்த மே 25, 2026 முதல் உலக நாடுகள் 40 இற்கு இலங்கை அரசாங்கம் விசா கட்டணத்தை (Visa waiver) முற்றாக ரத்து செய்துள்ளமை சர்வதேச பயணிகளுக்குப் பெரும் பொருளாதாரச் சாதகமாக அமைந்துள்ளது.
-
வருடம் முழுவதுமான காலநிலை மற்றும் இயற்கை: இலங்கையின் இருவேறு பருவக்காற்றுக் காலநிலைகள் காரணமாக ஏதேனும் ஒரு கடலோரப் பகுதியில் எப்போதும் சூரிய ஒளி நிலவுவதுடன், யோகா பயிற்சிகளுக்கு மத்தியில் காட்டு யானைகள் மற்றும் திமிங்கிலங்களைப் பார்வையிடும் வாய்ப்பும் பயணிகளுக்குக் கிடைக்கிறது.
ஆசிய பிராந்தியத்தின் ஏனைய நாடுகள்:
இந்தியாவுக்கு அருகில் உள்ள நேபாளம், ‘யோகா மற்றும் மலையேற்றம்’ (Yoga-and-hiking) ஆகிய அம்சங்களை ஒருங்கிணைத்து 6 ஆம் இடத்தைப் பிடித்துள்ளது. 7 ஆம் இடத்தைப் பிடித்துள்ள தாய்லாந்து, பாரம்பரிய மருத்துவ முறைகளுடன் நவீன மருத்துவ வசதிகளையும் இணைத்து ‘ஒருங்கிணைந்த நல்வாழ்வு’ (Integrative wellness) மூலம் பயணிகளைக் கவர்ந்து வருகின்றமை குறிப்பிடத்தக்கது. Global Wellness Institute இன் கணிப்பின்படி, வரும் 2027 ஆம் ஆண்டளவில் உலகளாவிய நல்வாழ்வுச் சுற்றுலாத் துறை 1.4 ட்ரில்லியன் அமெரிக்க டாலர் சந்தையாக உருவெடுக்கும் என எதிர்பார்க்கப்படுகிறது.
