அனோஜன் சிவராஜாவிற்கு விதிக்கப்பட்ட மரணதண்டனையை சவுதிஅரேபிய நீதிமன்றம் இரத்து செய்துள்ளதை வரவேற்றுள்ள ஜனாதிபதி அனுரகுமாரதிசநாயக்க அனோஜனுக்கும் அனோஜனின் குடும்பத்தவர்கள் மற்றும் இந்த விவகாரத்தை உன்னிப்பாக அவதானித்துக்கொண்டிருந்தவர்களுக்கும் இது பெரும் நிம்மதியாக அமைந்துள்ளது என குறிப்பிட்டுள்ளார்.
சமூக ஊடக பதிவொன்றில் இதனை தெரிவித்துள்ள ஜனாதிபதி இந்த முடிவு பொறுமை நிதானத்துடனான இராஜதந்திரத்தின் பெறுமதியை வெளிப்படுத்துகின்றது எனவும் தெரிவித்துள்ளார்.
மேலும் இது நட்புநாடொன்றின் சட்டநடவடிக்கைகளை மதித்தல்,மிகவும் குழப்பகரமான சட்டபோராட்டங்களின்போது இலங்கை பிரஜைக்கு ஆதரவாக நின்றவர்களின் தளர்ச்சியற்ற முயற்சிகள் ஆகியவற்றின் முக்கியத்துவத்தையும் வெளிப்படுத்தியுள்ளது என ஜனாதிபதி தெரிவித்துள்ளார்.
அனோஜன் விவகாரத்தில் சவுதிஅரேபியா வழங்கிய ஒத்துழைப்பிற்காக அந்த நாட்டிற்கு தனது நன்றியை தெரிவித்துள்ள அவர் சவுதி இலங்கை இராஜதந்திரிகள் அரசசேவை அதிகாரிகள் சட்டத்துறையினருக்கும் தனது நன்றியை தெரிவித்துள்ளார்.
அனோஜன் தொடர்பில் உள்ள சட்டநடவடிக்கைகள் முற்றாக முடிவிற்கு வரும்வரை அவரது குடும்பத்திற்கு அவசியமான அனைத்து உதவிகளையும் அரசாங்கம் வழங்கும் எனவும் ஜனாதிபதி தெரிவித்துள்ளார்.
