பிரித்தானிய வர்த்தகத் தூதுவர் ஹந்துன்னெத்தியை சந்திப்பு: ‘பூச்சிய-வரி’ திட்டத்தின் மூலம் இலங்கை ஏற்றுமதியை அதிகரிப்பது குறித்து கலந்துரையாடல்

கொழும்பு, ஜூன் 18 — பிரித்தானியாவின் வர்த்தகத் தூதுவர் லோர்ட் ஹனெட் (Lord Hannett of Everton) மற்றும் பிரித்தானிய உயர்ஸ்தானிகர் ஆண்ட்ரூ பேட்ரிக் (Andrew Patrick) ஆகியோர், இலங்கையின் கைத்தொழில் மற்றும் தொழில்முனைவோர் மேம்பாட்டு அமைச்சர் சுனில் ஹந்துன்னெத்தியைச் சந்தித்து, இருதரப்பு வர்த்தக உறவுகளை வலுப்படுத்துவதை நோக்கமாகக் கொண்ட நடைமுறை நடவடிக்கைகள் குறித்து ஆராய்ந்தனர்.

கொழும்பிலுள்ள பிரித்தானிய உயர்ஸ்தானிகராலயத்தின் தகவல்படி, பிரித்தானியாவின் வளரும் நாடுகளுக்கான வர்த்தகத் திட்டத்தின் (Developing Countries Trading Scheme – DCTS) கீழ், இலங்கை ஏற்றுமதிப் பொருட்களுக்கு வழங்கப்படும் ‘பூச்சிய-வரி’ (Zero-tariff) அணுகல் வாய்ப்புகளை இன்னும் வலுவான முறையில் பயன்படுத்துவது குறித்தே இக்கலந்துரையாடலில் முக்கிய கவனம் செலுத்தப்பட்டது.

முதலீட்டாளர்களின் நம்பிக்கையை மேம்படுத்துவதற்கும், நீண்டகால பொருளாதாரக் கூட்டாண்மையை வளர்ப்பதற்கும், வெளிப்படையான மற்றும் முன்கூட்டியே கணிக்கக்கூடிய வணிகச் சூழலை உருவாக்குவதன் முக்கியத்துவம் குறித்தும் இச்சந்திப்பின் போது இரு தரப்பினரும் வலியுறுத்தினர்.