அமெரிக்க சந்தை கேள்வி – ஆடை ஏற்றுமதி வலுவான மாதாந்த வளர்ச்சியைப் பதிவு செய்துள்ளது

2026 ஆம் ஆண்டின் தொடக்கத்தில் காணப்பட்ட சவாலான சூழ்நிலைக்குப் பின்னர், முக்கிய ஏற்றுமதிச் சந்தைகளில் இருந்து ஏற்பட்டுள்ள சாதகமான கேள்வி காரணமாக, கடந்த மே மாதத்தில் இலங்கையின் ஆடை மற்றும் ஜவுளி ஏற்றுமதியானது 7.96% வளர்ச்சியடைந்து 394.14 மில்லியன் அமெரிக்க டாலர்களாகப் பதிவாகியுள்ளது. இது நடப்பு ஆண்டில் ஆடைத் துறை பதிவு செய்துள்ள மிக வலுவான மாதாந்த வளர்ச்சியாகும்.

இலங்கை கூட்டு ஆடை சங்கங்களின் சம்மேளனம் (JAAF) பகுப்பாய்வு செய்த தரவுகளின்படி, அமெரிக்காவிற்கான ஆடை ஏற்றுமதி 15.36% என்ற கணிசமான வளர்ச்சியைக் காட்டி 149.96 மில்லியன் டாலர்களை எட்டியுள்ளது. இதுவே இந்த மே மாதத்தின் வலுவான வளர்ச்சிக்கு முக்கிய காரணியாக அமைந்துள்ளது. மேலும், பாரம்பரிய மூன்று முக்கிய சந்தைகளுக்கு வெளியேயுள்ள ஏனைய நாடுகளுக்கான ஏற்றுமதியும் 14.61% ஆல் அதிகரித்து 70.67 மில்லியன் டாலர்களாகப் பதிவாகியுள்ளதுடன், ஐக்கிய இராச்சியத்திற்கான (UK) ஏற்றுமதி 0.87% என்ற சிறிய வளர்ச்சியைப் பெற்றுள்ளது. எனினும், ஐரோப்பிய ஒன்றியத்திற்கான (EU) ஏற்றுமதி மட்டும் 0.3% சரிவடைந்து 121.35 மில்லியன் டாலர்களாகக் குறைந்துள்ளது.

அமெரிக்கச் சந்தையில் ஏற்பட்டுள்ள இந்த மறுமலர்ச்சியானது இலங்கையின் ஆடைத் துறைக்கு மிகவும் முக்கியமான ஒரு தருணத்தில் கிடைத்துள்ளது என்று JAAF தெரிவித்துள்ளது. ஏனெனில், கட்டாய உழைப்பைப் பயன்படுத்தி (Forced labour) தயாரிக்கப்படும் பொருட்களின் இறக்குமதிக்கான தடை தொடர்பான அமெரிக்க வர்த்தகப் பிரதிநிதியின் (USTR) ‘பிரிவு 301’ (Section 301) விசாரணைகளுக்கு இலங்கை தற்போது முகங்கொடுத்து வருகின்றது. இதன் முடிவில் இலங்கைக்கு 10% அல்லது 12.5% கூடுதல் வரி விதிக்கப்படலாம்.

ஜூன் மாதத்தில் வெளியிடப்பட்ட அறிக்கையின்படி, 12.5% கூடுதல் வரியை எதிர்கொள்ளும் 46 நாடுகளின் பட்டியலில் இலங்கையும் உள்வாங்கப்பட்டுள்ளது. ஆனால், இலங்கையின் போட்டி நாடுகளான பங்களாதேஷ், கம்போடியா, பாகிஸ்தான் மற்றும் இந்தோனேசியா ஆகிய நாடுகள், கட்டாய உழைப்பு இறக்குமதியைத் தடுக்க ஏற்கனவே எடுத்துள்ள நடவடிக்கைகள் காரணமாக அவற்றுக்கு 10% என்ற குறைவான வரியே விதிக்கப்பட்டுள்ளது.

இது தொடர்பான பொது விசாரணை எதிர்வரும் ஜூலை 7 ஆம் தேதி வாஷிங்டனில் நடைபெறவுள்ளது. இதில் பங்கேற்பதற்கான கோரிக்கைகளை சமர்ப்பிக்க ஜூன் 22 ஆம் தேதி வரை அவகாசம் வழங்கப்பட்டிருந்த நிலையில், வரவிருக்கும் வாரங்கள் இலங்கைக்கு தங்களது நியாயங்களை முன்வைப்பதற்கான மிக முக்கியமான காலகட்டமாகும்.

“இந்த இடத்தில் தான் கொள்கை ரீதியான விவாதங்களும், வர்த்தகப் புள்ளிவிவரங்களும் ஒன்றிணைகின்றன” என்று JAAF சுட்டிக்காட்டியுள்ளது. வரியின் மூலமான அழுத்தங்கள் இருந்தபோதிலும், அமெரிக்கக் கொள்வனவாளர்கள் இலங்கையிலிருந்து பொருட்களைத் தொடர்ந்து தீவிரமாகப் பெற்று வருகின்றனர் என்பதை மே மாத புள்ளிவிவரங்கள் காட்டுகின்றன. இது தரம், சட்ட இணக்கம் (Compliance) மற்றும் நம்பகத்தன்மை ஆகியவற்றில் இலங்கை கொண்டுள்ள நீண்டகால நன்மதிப்பைப் பிரதிபலிக்கிறது. தற்போது கிடைத்துள்ள இந்த நம்பிக்கையை சாதகமாகப் பயன்படுத்தி, அமெரிக்காவிடம் இருந்து சாதகமான வரி முடிவொன்றைப் பெறுவதே தற்போதைய இலக்காகும்.

போட்டி நாடுகளுக்கு விதிக்கப்படும் வரிக்கு நிகரான சமமான வரி விதிப்பினை (Tariff parity) இலங்கைக்கும் பெற்றுக்கொள்வதற்காக JAAF தொடர்ந்து அழுத்தம் கொடுத்து வருகிறது. இப்போதைய செயல்பாடுகளில் இலங்கைக்கு சாதகமான முடிவு கிடைக்குமாயின், மே மாதத்தில் பெற்ற இந்த வளர்ச்சியை நீண்டகால நிலையான வளர்ச்சியாக மாற்றியமைக்க முடியும்.

இருப்பினும், இந்த ஆண்டின் ஒட்டுமொத்த கூட்டுப் புள்ளிவிவரங்கள் (Cumulative data) ஆடைத் துறை இன்னும் எதிர்கொண்டு வரும் சவால்களையே காட்டுகின்றன. 2026 ஜனவரி முதல் மே வரையிலான ஐந்து மாதங்களில் ஒட்டுமொத்த ஏற்றுமதி 1,926.85 மில்லியன் டாலர்களாகப் பதிவாகியுள்ளது. இது கடந்த ஆண்டின் இதே காலப்பகுதியுடன் ஒப்பிடுகையில் 4.68% வீழ்ச்சியாகும். அமெரிக்கா, ஐரோப்பிய ஒன்றியம் மற்றும் பிரிட்டன் ஆகிய மூன்று முக்கிய சந்தைகளிலும் ஒட்டுமொத்த ஏற்றுமதி இன்னும் மறைமுகப் பெறுமானத்திலேயே (Negative territory) உள்ளது.

ஆயினும், மே மாதத்தின் திருப்திகரமான செயல்பாடானது, ஆண்டின் இரண்டாம் பாதியில் இழந்த சந்தை வாய்ப்புகளை மீளப்பெறுவதற்கான சாத்தியக்கூறுகள் ஆடைத் துறைக்கு உண்டு என்பதை உணர்த்துகின்றது. குறிப்பாக வரிப் பிரச்சினைக்குச் சாதகமான தீர்வு கிடைத்து, கொள்வனவாளர்களின் நம்பிக்கை மேலும் வலுவடையும் பட்சத்தில் இது சாத்தியமாகும்.

இது குறித்து JAAF விடுத்துள்ள அறிக்கையில்: “மே மாதத்தின் புள்ளிவிவரங்கள் உண்மையிலேயே ஊக்கமளிப்பவை. சவாலான வர்த்தகச் சூழலிலும் உலகளாவிய கொள்வனவாளர்கள் இலங்கை உற்பத்தி மீது வைத்துள்ள நம்பிக்கையை இது காட்டுகிறது. எங்களது தற்போதைய கவனம் வாஷிங்டனில் நியாயமான மற்றும் போட்டித்தன்மை வாய்ந்த வரி முடிவைப் பெறுவதாகும். இதன் மூலம் மட்டுமே தற்காலிக லாபங்களை விடுத்து நீண்டகால வளர்ச்சியை உறுதி செய்ய முடியும். முறையான கொள்கை ஆதரவு கிடைக்குமாயின், 2026 இன் இரண்டாம் பாதி ஆடைத் துறைக்கு மிகவும் வலுவானதாக அமையும் என்ற நம்பிக்கை எங்களுக்கு உண்டு” எனத் தெரிவிக்கப்பட்டுள்ளது.

அமெரிக்காவின் இந்த வரி விவகாரம் மிக முக்கியமான கட்டத்தை எட்டியுள்ள நிலையில், தனது மிகப்பெரிய சந்தையான அமெரிக்காவில் இலங்கை தனது போட்டித்தன்மையை எவ்வாறு தக்கவைத்துக் கொள்ளப் போகிறது என்பதையும், மே மாதத்தின் வெற்றியைத் தொடர்ச்சியான மீட்சியாக மாற்றப் போகிறதா என்பதையும் தீர்மானிக்கும் ஒரு முக்கிய பரீட்சையாக அடுத்த சில மாதங்கள் அமையவுள்ளன.