தேதி: ஜூலை 5, 2026, 2:02 am

இலங்கை மற்றும் மாலைத்தீவுகளுக்கான ரஷ்யக் கூட்டமைப்பின் தூதுவர் லெவன் ஜாகரியன் (Levan Dzhagaryan), 2021 ஆம் ஆண்டு முதல் இலங்கையில் பணியாற்றி வருகிறார். ரஷ்ய வெளிவிவகார அமைச்சில் பல தசாப்த கால சேவையைக் கொண்ட ஒரு தொழில்முறை இராஜதந்திரியான இவர், மத்திய கிழக்கு மற்றும் ஆசியா உள்ளிட்ட பல பிராந்தியங்களில் பணியாற்றியுள்ளார். குறிப்பாக, ஈரானுக்கான தூதுவராக 11 ஆண்டுகள் கடமையாற்றியுள்ளார். இலங்கையில் அரசியல், பொருளாதாரம், பாதுகாப்பு மற்றும் கலாசார ஒத்துழைப்பு ஆகியவற்றில் மொஸ்கோவின் ஈடுபாட்டை வடிவமைக்கும் முக்கிய குரலாக விளங்கும் இவர், தடைகள், உக்ரைன் மோதல் மற்றும் மாறிவரும் புவிசார் அரசியல் நிலவரங்கள் போன்ற உலகளாவிய பிரச்சினைகள் குறித்தும் தனது கருத்துக்களை தீவிரமாகப் பகிர்ந்து வருகிறார்.

அதன் உறுப்பினர்களுக்கிடையிலான ஒத்துழைப்பு காரணமாக BRICS ஈர்க்கக்கூடியதாக மாறிவருகிறது

கேள்வி: BRICS அமைப்புக்கு வருவோம். BRICS உலகப் பொருளாதார ஒழுங்கை மறுவடிவமைப்பு செய்கிறது என்று நீங்கள் நம்புகிறீர்களா? இதில் ஏதேனும் அர்த்தமுள்ள முன்னேற்றத்தைக் காண்கிறீர்களா?

பதில்: பல நாடுகள் BRICS அமைப்பில் இணைவதற்கு ஆர்வம் காட்டியுள்ளன, இது அந்த கூட்டமைப்பின் மீது அவை வைத்துள்ள எதிர்பார்ப்புகளைப் பிரதிபலிக்கிறது என்றே நான் நம்புகிறேன். அதன் உறுப்பினர்களிடையே நிலவும் ஒத்துழைப்பு காரணமாக BRICS நாளுக்கு நாள் ஈர்க்கக்கூடியதாக மாறிவருகிறது. எங்களிடம் ‘புதிய அபிவிருத்தி வங்கி’ (New Development Bank) உட்பட நிறுவப்பட்ட வழிமுறைகள் உள்ளன, மேலும் பல்வேறு துறைகளில் ஏராளமான கூட்டுத் திட்டங்களும் உள்ளன. பல நாடுகள் இதில் முழுநேர உறுப்பினர்களாகவோ அல்லது பேச்சுவார்த்தை பங்காளிகளாகவோ (dialogue partners) மாற விரும்புகின்றன. எனினும், உறுப்பினர் தகுதி என்பது ஒருமித்த கருத்து (consensus) மூலமே தீர்மானிக்கப்படுகிறது. யார் இணைய வேண்டும் என்பதை எந்தவொரு தனி நாடும் தீர்மானிப்பதில்லை.

ரஷ்ய தூதுவர் என்ற ரீதியில், தங்களது நாடு எவ்வாறு BRICS இல் உறுப்பினராகலாம் என்று மக்கள் என்னிடம் அடிக்கடி கேட்கிறார்கள். அதற்கு எனது பதில் என்னவென்றால், அவர்கள் ரஷ்யாவிடம் மட்டும் கேட்கக் கூடாது. பிரேசில், ரஷ்யா, இந்தியா, சீனா, தென்னாப்பிரிக்கா மற்றும் புதிய உறுப்பினர்கள் உட்பட ஒவ்வொரு உறுப்பு நாட்டுக்கும் அந்த முடிவில் ஒரு வாக்குரிமை உள்ளது. தற்போது வரை BRICS அமைப்பில் பத்து உறுப்பு நாடுகள் உள்ளன, மேலும் இதில் இணைவதற்கான ஆர்வம் தொடர்ந்து அதிகரித்து வருகிறது.

கேள்வி: BRICS அமைப்போடு தொடர்புடைய முக்கிய பிரச்சினைகளில் ஒன்று அமெரிக்க டாலர் மீதான சார்பைக் குறைப்பதாகும். இது ரஷ்யாவின் பரந்த பொருளாதார நிகழ்ச்சி நிரலின் ஒரு பகுதியாக மாறுகிறதா?

பதில்: ஆம், ஆனால் நாங்கள் அதைத் தாமாக முன்வந்து தேர்ந்தெடுப்பதை விட, அந்த திசையை நோக்கி தள்ளப்பட்டுள்ளோம் என்பதையே நான் வலியுறுத்துவேன். இது எங்களது ஆரம்பக்கட்ட நோக்கம் அல்ல. தடைகள் மற்றும் கட்டுப்பாடுகள் காரணமாக நாங்கள் இதற்கு பழக வேண்டிய கட்டாயத்திற்கு ஆளானோம். சில பரிவர்த்தனைகளில் நாங்கள் இன்னும் அமெரிக்க டாலரைப் பயன்படுத்துகிறோம், ஆனால் அந்தப் பரிவர்த்தனைகள் பெருகிய முறையில் கடினமாக்கப்பட்டு, உன்னிப்பாகக் கண்காணிக்கப்படுகின்றன. இதனால்தான் நாங்கள் பிற நாணயங்களின் பயன்பாட்டை விரிவுபடுத்தியுள்ளோம். இன்று, சீனாவுடனான ரஷ்யாவின் வர்த்தகத்தில் கணிசமான பங்கு சீன யுவான் மற்றும் ரஷ்ய ரூபிள்களில் நடத்தப்படுகிறது. இந்தியாவுடனான எங்களது வர்த்தகத்திலும் தேசிய நாணயங்களை நாங்கள் அதிகளவில் பயன்படுத்தி வருகிறோம்.

Russia proposes two mini nuclear power stations for SL: Talks ongoing – Russian Ambassador Levan Dzhagaryan - Ceylon Today

கேள்வி: உலகப் பொருளாதாரத்தில் அமெரிக்க டாலர் இறுதியில் தனது ஆதிக்க நிலையை இழக்க நேரிடும் என்று நீங்கள் நம்புகிறீர்களா?

பதில்: இல்லை, நான் அப்படி நினைக்கவில்லை. அமெரிக்கப் பொருளாதாரம் மிகவும் வலுவாக உள்ளது, மேலும் டாலர் உலகின் மிக பரவலாகப் பயன்படுத்தப்படும் நாணயமாகத் தொடர்ந்து நீடிக்கிறது. ரஷ்யா அமெரிக்க டாலரை மாற்றியமைக்கவோ அல்லது ஒழிக்கவோ முயற்சிக்கவில்லை. அது எங்களது நோக்கம் அல்ல. பிற நாடுகளைத் தண்டிப்பதற்கான ஓர் அரசியல் ஆயுதமாக டாலர் பயன்படுத்தப்படுவதைத்தான் நாங்கள் எதிர்க்கிறோம்.

கேள்வி: இலங்கை BRICS அமைப்பில் இணைய ஆர்வம் காட்டியுள்ளது. இலங்கையின் உறுப்பினர் தகுதிக்கு ரஷ்யா ஆதரவளிக்குமா?

பதில்: அது குறித்து என்னால் கருத்து தெரிவிக்க முடியாது. உறுப்பினர் தகுதிக்கு என நிறுவப்பட்ட நடைமுறைகள், தேவைகள் மற்றும் நிபந்தனைகள் உள்ளன, மேலும் ஒவ்வொரு விண்ணப்பமும் அனைத்து உறுப்பு நாடுகளாலும் கூட்டாகவே பரிசீலிக்கப்படும்.

கேள்வி: வளர்ந்து வரும் பிராந்திய பதற்றங்களுக்கு மத்தியில், இலங்கை அணிசேரா கொள்கையைக் கடைப்பிடிக்க முயலும் அதேவேளையில், சீனா, இந்தியா, ஈரான், பாகிஸ்தான், அமெரிக்கா மற்றும் மத்திய கிழக்கு நாடுகள் உள்ளிட்ட முக்கிய வல்லரசுகள் மற்றும் பிராந்திய நாடுகளுடன் தொடர்புகளைப் பேணி வருகிறது. இலங்கையின் இந்த சமநிலைப்படுத்தும் தன்மையை ரஷ்யா எவ்வாறு பார்க்கிறது?

பதில்: பெரிய வல்லரசுகளின் நிலப்பாட்டில் இருந்து இலங்கையின் நிலப்பாடு வேறுபட்டது. இது பாரம்பரியமாக நடுநிலைக் கொள்கையைப் பின்பற்றி வரும் ஒப்பிட்டளவில் ஒரு சிறிய நாடாகும். ரஷ்யாவின் பார்வையில், இந்தக் கொள்கை இலங்கையின் சர்வதேச பிம்பத்திற்கு நன்மை பயப்பதாக அமைந்துள்ளது. இஸ்ரேல், அரபு நாடுகள், ஈரான், சீனா, இந்தியா, ரஷ்யா மற்றும் அமெரிக்கா உள்ளிட்ட பரந்த அளவிலான பங்காளிகளுடன் நல்லுறவைப் பேண உங்கள் நாட்டினால் முடிந்துள்ளது. அதை நாங்கள் ஒரு நேர்மறையான மற்றும் வெற்றிகரமான வெளியுறவுக் கொள்கையாகவே கருதுகிறோம். இலங்கை இந்த சமநிலையான அணுகுமுறையைத் தொடர்ந்து பின்பற்றும் என்று நாங்கள் நம்புகிறோம், ஏனெனில் இது உங்கள் தேசிய நலன்களுக்குப் பக்கபலமாக அமையும்.

அதே நேரத்தில், குறிப்பாக இலங்கையின் பொருளாதார சவால்களைக் கருத்தில் கொள்ளும்போது, இந்தக் கொள்கையைத் தக்கவைப்பது எளிதான ஒன்றல்ல என்பதை நான் புரிந்துகொள்கிறேன். சர்வதேச நாணய நிதியம் (IMF) இலங்கையுடன் தொடர்ந்து ஈடுபட்டு வருகிறதுடன், உங்கள் அரசாங்கம் அடைந்துள்ள முன்னேற்றத்தையும் அங்கீகரித்துள்ளது. நிச்சயமாக, ரஷ்யா உட்பட பல நாடுகளைப் போலவே, இங்கும் உள்நாட்டு மற்றும் நிதிச் சவால்கள் உள்ளன. எங்களது சொந்த பொருளாதாரக் கடினப்பாடுகள் பல தற்போதைய மோதல்களுடன் தொடர்புடையவை. எவ்வாறாயினும், ஒட்டுமொத்தமாகப் பார்க்கும்போது, இலங்கை தனது வெளியுறவுக் கொள்கையை வெற்றிகரமாகக் கையாண்டுள்ளது என்றே நான் நம்புகிறேன், ஆனால் அதன் உள்நாட்டு அரசியல் குறித்து நான் கருத்து தெரிவிக்க விரும்பவில்லை.

கேள்வி: ஹார்முஸ் நீரிணை (Strait of Hormuz) திறந்திருந்ததால் ரஷ்யாவும் மூலோபாய ரீதியாகப் பயனடைந்தது என்று சிலர் வாதிடுகின்றனர். இதற்கு உங்கள் பதில் என்ன?

பதில்: இந்தப் பிரச்சினையின் மற்றொரு அம்சத்தில் கவனம் செலுத்த நான் விரும்புகிறேன். ஈரான் அணு ஆயுதங்களைத் தயாரிப்பதாக அமெரிக்கா குற்றம் சாட்டியுள்ளது. நான் 11 ஆண்டுகள் ஈரானுக்கான ரஷ்யத் தூதுவராகப் பணியாற்றினேன், மேலும் ஈரான் மற்றும் P5+1 நாடுகளுக்கு (அமெரிக்கா, ஐக்கிய இராச்சியம், பிரான்ஸ், ஜெர்மனி, சீனா மற்றும் ரஷ்யா) இடையே நடந்த நீண்ட பேச்சுவார்த்தைகளில் நெருக்கமாக ஈடுபட்டிருந்தேன். அந்தப் பேச்சுவார்த்தைகளின் விளைவாகவே 2015 இல் ‘கூட்டு விரிவான செயல் திட்டம்’ (JCPOA) உருவானது, அதன் கீழ் தடைகள் ஓரளவு நீக்கப்பட்டன. இந்த உடன்படிக்கை ஐநா பாதுகாப்புச் சபையின் 2231 ஆம் தீர்மானத்தின் மூலம் அங்கீகரிக்கப்பட்டது என்பதை நான் வலியுறுத்த விரும்புகிறேன். எனவே, எங்களது பார்வையில், அது சர்வதேச சட்டத்தின் ஒரு பகுதியாக மாறியது. ஆனால், டிரம்பின் முதலாவது பதவிக்காலத்தின் போது, அமெரிக்கா இந்த உடன்படிக்கையிலிருந்து விலகிக் கொண்டதுடன், ஈரான் மீது மீண்டும் தடைகளை விதித்தது.

கேள்வி: வளைகுடா பிராந்தியத்தின் பரந்த பாதுகாப்பு நிலவரத்தை நீங்கள் எவ்வாறு பார்க்கிறீர்கள்?

பதில்: ஹார்முஸ் நீரிணை மற்றும் பிராந்திய பாதுகாப்பு தொடர்பான கேள்விகள் இறுதியில் அந்தப் பிராந்திய நாடுகளாலேயே தீர்க்கப்பட வேண்டும். பிராந்திய நாடுகள் தங்களது பாதுகாப்பு கவலைகளை பேச்சுவார்த்தைகள் மூலம் தீர்த்துக்கொள்ளும் திறன் கொண்டவை என்றே நான் நம்புகிறேன். இப்பிராந்தியத்தில் அமெரிக்க மற்றும் இதர மேற்கத்திய இராணுவப் படைகளின் இருப்பு ஸ்திரத்தன்மைக்கு உத்தரவாதம் அளிப்பதில்லை என்று நான் பலமுறை கூறியுள்ளேன். ரஷ்யா ஈரானுடன் நல்லுறவைக் கொண்டுள்ளதுடன், பல வளைகுடா நாடுகளுடனும் நல்லுறவைப் பேணி வருகிறது. அந்த வகையில், அண்டை நாடுகளுக்கு இடையே ஏற்படும் மோதல்களைக் கண்டு நாங்கள் வருந்துகிறோம். எங்களது பார்வையில், ரஷ்யாவிற்கும் உக்ரைனுக்கும் இடையிலான மோதலுக்கு வெளிவாரி காரணிகள் பங்களித்தது போலவே, இப்பிராந்தியத்திலும் வெளிவாரி தலையீடுகள் பதற்றத்தை அதிகரிக்க வழிவகுத்துள்ளன.

கேள்வி: ஆனால், ஈரான் அண்டை அரபு நாடுகளைப் பாதிக்கும் வகையிலான தாக்குதல்களையும் நடத்தியதே. அதை ரஷ்யா எவ்வாறு பார்க்கிறது?

பதில்: தாக்குதலுக்கு உள்ளான பின்னரே ஈரான் பதிலடி கொடுத்தது என்பது எங்களது கருத்து. ஈரானிய பார்வையில், அமெரிக்காவின் ஐந்தாவது கடற்படைத் தலைமையகம் அமைந்துள்ள பஹ்ரைன் தளங்கள் உள்ளிட்ட அமெரிக்க இராணுவ வசதிகளைக் கொண்ட பகுதிகளில் இருந்தே தாக்குதல்கள் நடத்தப்பட்டன. ஒரு நாடு தான் தாக்குதலுக்கு உள்ளாகியிருப்பதாக நம்பும்போது, அதற்குப் பதிலடி கொடுக்கும் உரிமை தனக்கு இருப்பதாக அது வாதிடுகிறது. அதுவே ஈரானின் நிலப்பாடு, மேலும் இப்பிரச்சினைகள் மேலும் தீவிரமடைவதைத் தவிர்த்து, இறுதியில் பேச்சுவார்த்தை மற்றும் இராஜதந்திரம் மூலம் தீர்க்கப்பட வேண்டும் என்றே ரஷ்யா நம்புகிறது.

இவை சட்டவிரோதமான தடைகள்

கேள்வி: ரஷ்யா மீது தற்போது விதிக்கப்பட்டுள்ள மேற்கத்திய தடைகளைக் கருத்தில் கொள்ளும்போது, ஆசியாவிலும் உலகளவிலும் ரஷ்யா வர்த்தகம் மற்றும் வணிகத்தை மேற்கொள்வது எவ்வளவு கடினமாக மாறியுள்ளது?

பதில்: இவற்றை நான் சட்டவிரோதமான தடைகள் என்றே விவரிப்பேன். ஒருபுறம், இவை எதிர்மறையான தாக்கத்தை ஏற்படுத்தியுள்ளன. மறுபுறம், இவை ரஷ்யாவிற்கு சில நேர்மறையான விளைவுகளையும் தந்துள்ளன. உதாரணமாக, விமானத் துறையில், ரஷ்யா இதற்கு முன்னர் ஏர்பஸ் (Airbus) மற்றும் போயிங் (Boeing) விமானங்களையே பெரிதும் நம்பியிருந்தது. தடைகளைத் தொடர்ந்து, நாங்கள் உள்நாட்டு உற்பத்தியை துரிதப்படுத்தினோம். இன்று, நாங்கள் MC-21 மற்றும் சுகோய் சூப்பர்ஜெட் (Sukhoi Superjet) போன்ற விமானங்களைத் தயாரித்து வருகிறோம். ரஷ்யா தனது விமானத் துறையின் சில பகுதிகளை வெற்றிகரமாக மீட்டெடுத்துள்ளதாக ஜனாதிபதி புடின் அண்மையில் குறிப்பிட்டுள்ளார். எவ்வாறாயினும், இந்தத் தடைகள் இலங்கை போன்ற நாடுகளுடனான எங்களது இருதரப்பு வணிகத்தையும் எதிர்மறையாகப் பாதித்துள்ளன. தற்போது எங்களிடம் பெரிய அளவிலான கூட்டுத் திட்டங்கள் எதுவும் இல்லை.

கேள்வி: ரஷ்யா இதற்கு முன்னர் முன்வைத்த ஒரு முன்மொழிவு, இலங்கையில் ‘மிர்’ (MIR) கட்டண முறையை அறிமுகப்படுத்துவதாகும். அந்தத் திட்டத்திற்கு என்ன நடந்தது?

பதில்: நான் இலங்கைக்கு வந்தபோது, எனது முன்மொழிவுகளில் ஒன்று ரஷ்யாவின் ‘மிர்’ (MIR) கட்டண அட்டையை அறிமுகப்படுத்துவதாகும். இது ரஷ்ய சுற்றுலாப் பயணிகள் இலங்கைக்கு வரும்போது பணத்தைச் செலவிடுவதை மிகவும் எளிதாக்கியிருக்கும். இருப்பினும், ‘மிர்’ முறையை ஏற்கும் நாடுகள் அமெரிக்காவின் இரண்டாம் நிலைத் தடைகளை (secondary sanctions) எதிர்கொள்ள நேரிடும். இதன் விளைவாக, ரஷ்ய சுற்றுலாப் பயணிகள் பெரும்பாலும் ரொக்கப் பணத்தைக் கொண்டு வர வேண்டியுள்ளது அல்லது சீனா அல்லது கஜகஸ்தான் போன்ற மூன்றாம் நாடுகளில் வழங்கப்பட்ட வங்கி அட்டைகளைப் பயன்படுத்த வேண்டிய கட்டாயத்தில் உள்ளனர். எங்களது முன்மொழிவைப் பொறுத்தவரை, எங்களுக்கு எந்தப் பதிலும் கிடைக்கவில்லை. மாலைத்தீவிலும் இதுவே நடந்தது. பதில் எதுவும் வராதபோது, அதை நாங்கள் ஒரு எதிர்மறையான பதிலாகவே புரிந்துகொள்கிறோம்.

கேள்வி: அப்படியென்றால், தடைகள் காரணமாகவே இந்தத் திட்டம் முன்னோக்கிச் செல்வது தடுக்கப்பட்டது என்று நீங்கள் நம்புகிறீர்களா?

பதில்: ஆம், சூழ்நிலையை நாங்கள் புரிந்துகொள்கிறோம். இந்தத் தடைகள் மேலும் சில சாத்தியமான திட்டங்களையும் பாதித்துள்ளன. உதாரணமாக, ஒரு ரஷ்ய தனியார் நிறுவனம் சில ஆண்டுகளுக்கு முன்பு மத்தள விமான நிலையம் தொடர்பான திட்டங்களில் ஆர்வம் காட்டியது. ஒரு தூதுவராக எனது பணி ரஷ்ய நிறுவனங்கள் முதலீடு செய்வதற்கான அல்லது ஒத்துழைப்பதற்கான வாய்ப்புகளை உருவாக்குவதாகும். ஆனால், தடைகள் அல்லது பிற கட்டுப்பாடுகள் காரணமாக அந்த வாய்ப்புகள் இல்லாதபோது, நாங்கள் யதார்த்தத்தைப் புரிந்துகொள்கிறோம். இலங்கை போன்ற நாடுகளை நான் விமர்சிக்கவில்லை. குளோபல் சவுத் (Global South) நாடுகள் ஒரு கடினமான சூழ்நிலையில் உள்ளன. ஒருபுறம், அவர்கள் ரஷ்யாவுடன் ஒத்துழைக்க விரும்புகிறார்கள். மறுபுறம், தடைகள் காரணமாக அவர்கள் அழுத்தங்களை எதிர்கொள்கிறார்கள். இதுவே யதார்த்தம்.

கேள்வி: சர்வதேச வர்த்தகத்தில் ரஷ்யா பெருகிய முறையில் ‘டாலர் நீக்கத்தை’ (de-dollarisation) ஊக்குவித்து வருகிறது. மேற்கத்திய தடைகளை எதிர்கொள்வதற்கான உங்கள் மூலோபாயத்தின் ஒரு பகுதி இதுதானா?

பதில்: ரஷ்யா ஏற்கனவே பல நாடுகளுடன் தேசிய நாணயங்களிலேயே வர்த்தகம் செய்து வருகிறது. உதாரணமாக, சீனா, இந்தியா, வியட்நாம் மற்றும் பல முன்னாள் சோவியத் குடியரசு நாடுகளுடனான வர்த்தகத்தில் நாங்கள் தேசிய நாணயங்களைப் பயன்படுத்துகிறோம். நான் ஈரானுக்கான தூதுவராக இருந்த காலத்திலும், அங்கும் இதேபோன்ற ஏற்பாடுகளைப் பயன்படுத்தினோம். எங்களைப் பொறுத்தவரை, இதில் எந்தப் பிரச்சினையும் இல்லை. நாங்கள் டாலர் நீக்கம் பற்றிப் பேசுவதற்குக் காரணம், அமெரிக்கா டாலரை ஓர் அரசியல் ஆயுதமாகவும், அழுத்தங்களைச் செலுத்துவதற்கான ஒரு ஊடகமாகவும் பயன்படுத்துவதால்தான். அது ஏற்றுக்கொள்ள முடியாதது என்று நாங்கள் நம்புகிறோம். தடைகள் காரணமாக நாங்கள் அமெரிக்க டாலரைப் பயன்படுத்துவது தடுக்கப்பட்டால், இயல்பாகவே நாங்கள் எங்களது சொந்த தேசிய நாணயத்தையோ அல்லது எங்களது வர்த்தக பங்காளிகளின் நாணயங்களையோ பயன்படுத்துவோம். அது வெறும் நடைமுறைச் சாத்தியமான ஒரு தீர்வு மட்டுமே.

கேள்வி: ஆனால், ரஷ்யாவுடன் ஈடுபட விரும்பும் நாடுகளையும் இந்தத் தடைகள் பாதிப்பதால், தடைகளில் இருந்து தப்பிப்பதற்கான வழியைக் கண்டறிய ரஷ்யா ஏதேனும் முயற்சிகளை மேற்கொள்கிறதா?

பதில்: மோதல் தொடரும் வரை, தடைகள் நீக்கப்படுவதற்கான வாய்ப்புகள் அதிகம் இருப்பதாக நான் நம்பவில்லை. எனது பார்வையில், தடைகள் என்பது இருதரப்பிற்கும் இழப்பை ஏற்படுத்தும் ஒரு கொள்கையாகும் (lose-lose policy). இருபதுக்கும் மேற்பட்ட சுற்றுத் தடைகள் விதிக்கப்பட்ட போதிலும், ரஷ்யா தனது விசேட இராணுவ நடவடிக்கையைத் தொடர்ந்து முன்னெடுத்து வருகிறது. அதே நேரத்தில், குளோபல் சவுத் நாடுகள் முழுவதும் நாங்கள் வலுவான கூட்டாண்மைகளைத் தொடர்ந்து அனுபவித்து வருகிறோம்.

நாங்கள் நம்பிக்கையுடன் இருந்தோம், இலங்கையுடனான எரிசக்தி ஒத்துழைப்பை வலுப்படுத்த முயற்சிகளை மேற்கொண்டோம்

கேள்வி: உலகம் தொடர்ந்து எரிசக்தி பாதுகாப்பு சவால்களை எதிர்கொண்டு வருகிறது. தற்போதைய உலகளாவிய எரிசக்தி நிலவரத்தை ரஷ்யா எவ்வாறு பார்க்கிறது, மேலும் நீண்ட கால எரிசக்தி திட்டமிடல் குறித்து இலங்கை போன்ற நாடுகளுக்கு நீங்கள் என்ன செய்தியைக் கூற விரும்புகிறீர்கள்? இலங்கை தனது எரிசக்தி நெருக்கடியின் போது ரஷ்யாவும் உதவ முயன்றதே.

பதில்: நாங்கள் நிச்சயமாக இலங்கைக்கு உதவ முயன்றோம். நாங்கள் மிகவும் நம்பிக்கையுடன் இருந்தோம், மேலும் எரிசக்தி ஒத்துழைப்பை வலுப்படுத்த கணிசமான முயற்சிகளை மேற்கொண்டோம். எங்களது எரிசக்தி துறை பிரதி அமைச்சர் தலைமையிலான உயர்மட்ட ரஷ்ய தூதுக்குழுவை நாங்கள் இலங்கைக்கு அழைத்து வந்தோம், அவர்கள் இலங்கையின் ஜனாதிபதியைச் சந்தித்தனர். அந்தச் சந்திப்புகளைத் தொடர்ந்து, இரு நாடுகளையும் சேர்ந்த தனியார் நிறுவனங்களுக்கு இடையே பேச்சுவார்த்தைகள் தொடங்கின.

இவை அரசாங்கங்களுக்கு இடையிலான (government-to-government) திட்டங்கள் அல்ல என்பதைப் புரிந்துகொள்வது அவசியம். அது நிலக்கரி, உரம் அல்லது எண்ணெய் எதுவாக இருந்தாலும், அவை தனியார் நிறுவனங்களுக்கு இடையிலான வணிக ரீதியான விவாதங்கள் மட்டுமே. எங்களது வெளிவிவகார அமைச்சு மற்றும் எரிசக்தி அமைச்சின் பங்கு தொடர்புகளை எளிதாக்குவதும் வாய்ப்புகளை உருவாக்குவதும் மட்டுமேயாகும். பேச்சுவார்த்தைகள் தொடங்கின, ஆனால் துரதிர்ஷ்டவசமாக அவை எந்தவொரு உறுதியான முடிவுகளையும் தரவில்லை.

கேள்வி: இந்த விவாதங்களைத் தொடங்குவதற்கு ரஷ்யா மேற்கொண்ட முயற்சிகளைக் கருத்தில் கொள்ளும்போது, இது ஏமாற்றமளிப்பதாக இருந்ததா?

பதில்: அதற்குப் பிறகு என்ன நடந்தது என்றால், அமெரிக்க எண்ணெயைச் சுமந்து வந்த ஒரு பெரிய கப்பல் இலங்கையை வந்தடைந்ததாக நாங்கள் செய்தித்தாள்களில் படித்தோம். எவ்வாறாயினும், அது முற்றிலும் இலங்கையின் இறையாண்மை சார்ந்த முடிவாகும். அவர்கள் தங்களது எரிசக்தி விநியோகத்தை எங்கிருந்து வாங்குகிறார்கள் என்பதைத் தீர்மானிப்பது இலங்கை அரசாங்கத்தினதும் இலங்கை வணிகங்களினதும் முடிவாகும். இலங்கை அமெரிக்காவிலிருந்து எண்ணெயை வாங்க விரும்பினால், அந்த முடிவை நாங்கள் மதிக்கிறோம். அது உங்கள் இறையாண்மைக்கான உரிமை.

கேள்வி: ரஷ்யாவிற்கு எதிரான தடைகள் இத்தகைய ஒத்துழைப்பைக் கடினமாக்குகின்றன என்று சிலர் வாதிடுவார்கள். இது ரஷ்யாவிற்கு சவால்களை உருவாக்கவில்லையா?

பதில்: இலங்கை அரசாங்கம் எங்களது எரிசக்தி துறை பிரதி அமைச்சரை அழைத்தபோது, ரஷ்யா தடைகளின் கீழ் உள்ளது என்பது அனைவருக்கும் ஏற்கனவே தெரிந்திருந்தது. அவ்வாறு இருந்தபோதிலும், விவாதங்களை நடத்துவதற்காக நாங்கள் இலங்கைக்கு அழைக்கப்பட்டோம். எங்களது பிரதி அமைச்சர் தூதரகத்தில் மாலைத்தீவின் சிரேஷ்ட அதிகாரிகளையும் சந்தித்தார். நாங்கள் தயாராக வந்தோம், பேச்சுவார்த்தைகளும் தொடங்கின.

கேள்வி: இந்த யதார்த்தங்களைக் கருத்தில் கொள்ளும்போது, ரஷ்யா தனது மூலோபாயக் கொள்கையை மறுபரிசீலனை செய்ய வேண்டும் என்று நினைக்கிறீர்களா?

பதில்: இல்லை, ரஷ்யா தனது கொள்கையை மாற்றத் தேவையில்லை என்று நான் நினைக்கிறேன். சட்டவிரோதமான தடைகளை விதிப்பவர்கள் தங்களது கொள்கைகளை மறுபரிசீலனை செய்ய வேண்டும் என்றே நான் நம்புகிறேன். அவர்கள் இறையாண்மையுள்ள நாடுகளுக்கு இடையே நியாயமான பொருளாதார ஒத்துழைப்பைத் தடுக்கிறார்கள் மற்றும் சர்வதேச வர்த்தகம் மற்றும் முதலீட்டிற்கு செயற்கையான தடைகளை உருவாக்குகிறார்கள்.

உக்ரைன் நெருக்கடியின் மூல காரணங்கள் களையப்பட வேண்டும்

கேள்வி: உக்ரைனைக் ‘கைப்பற்றுவதுதான்’ ரஷ்யாவின் இறுதி நோக்கமா?

பதில்: இல்லை, அது எங்களது நோக்கம் அல்ல. 2024 இல் வெளிவிவகார அமைச்சில் புடின் ஆற்றிய உரையை வாசிக்குமாறு நான் உங்களைக் கேட்டுக்கொள்கிறேன், அங்கு ரஷ்யாவின் நோக்கங்கள் மிகவும் தெளிவாகக் கோடிட்டுக் காட்டப்பட்டுள்ளன. இந்த நெருக்கடியின் மூல காரணங்கள் களையப்பட வேண்டும் என்பதே எங்களது நிலப்பாடு. 2014 ஆம் ஆண்டு உக்ரைனில் ஜனநாயக முறைப்படி தேர்ந்தெடுக்கப்பட்ட ஜனாதிபதி விக்டர் யானுகோவிச் (Viktor Yanukovych) பதவியிலிருந்து நீக்கப்பட்ட சட்டவிரோத ஆட்சிக்கவிழ்ப்புடன் தான் இந்த நெருக்கடி தொடங்கியது என்று நாங்கள் நம்புகிறோம். அந்த நேரத்தில், ஐரோப்பாவின் பாதுகாப்பு மற்றும் ஒத்துழைப்பு அமைப்பின் (OSCE) சார்பாக மேற்கு உக்ரைனில் உள்ள எல்விவ் (Lviv) நகரில் நான் தேர்தல் கண்காணிப்பாளராகப் பணியாற்றிக் கொண்டிருந்தேன். ஐரோப்பிய தலைவர்கள் பெரும்பாலும் ஜனநாயகம் பற்றிப் பேசுகிறார்கள், ஆனால் அந்த கொள்கைகள் சீராகப் பயன்படுத்தப்படுகிறதா என்று நாங்கள் கேள்வி எழுப்புகிறோம். உதாரணமாக, ருமேனியாவின் சமீபத்திய தேர்தல்களைச் சுற்றியுள்ள முன்னேற்றங்கள் குறித்து நாங்கள் கவலைகளை எழுப்பியுள்ளோம். இவை விவாதத்திற்குரிய பிரச்சினைகள் என்று நாங்கள் நம்புகிறோம்.

கேள்வி: இவை ஜனநாயக செயல்முறைகள் என்று ஐரோப்பிய தலைவர்கள் வாதிடுவார்கள் அல்லவா?

பதில்: அது அவர்களது நிலப்பாடு. எனினும், எங்களது பார்வையில், நாங்கள் சீரான தன்மையைக் காண்பதை விட இரட்டைத் தரத்தையே (double standards) காண்கிறோம். ஐரோப்பிய நாடுகளின் மக்கள் மீது ரஷ்யா ஆழ்ந்த மரியாதை வைத்துள்ளது என்பதையும் நான் தெளிவுபடுத்த விரும்புகிறேன். எங்களது விமர்சனம் அரசாங்கங்களின் கொள்கைகளை நோக்கியதே தவிர, சாதாரண குடிமக்களை நோக்கியது அல்ல. அமெரிக்கா, கனடா மற்றும் இதர மேற்கத்திய நாடுகளின் மக்களுக்கும் இது பொருந்தும். அவர்களின் மக்களுடன் எங்களுக்கு எந்தப் பிரச்சினையும் இல்லை. எங்களது கருத்து வேறுபாடுகள் அரசாங்கக் கொள்கைகள் குறித்தே ஆகும்.

கேள்வி: ஆனால், ஐரோப்பிய அரசாங்கங்கள் கொள்கை முடிவுகளை எடுக்கும்போது, அவை தங்களது சொந்த இறையாண்மையைப் பயன்படுத்துவதாக வாதிடுவார்கள். முன்னதாக, தனது சொந்த முடிவுகளை எடுக்க இலங்கைக்கு இறையாண்மை உரிமை உள்ளது என்று நீங்கள் கூறினீர்கள். இதில் முரண்பாடு இல்லையா?

பதில்: எனது தனிப்பட்ட கருத்துப்படி, பல ஐரோப்பிய நாடுகள் வரம்புக்குட்பட்ட இறையாண்மையைக் (limited sovereignty) கொண்டுள்ளன என்றே நான் விவரிப்பேன்.

கேள்வி: இது உங்களது சொந்த மதிப்பீடா?

பதில்: ஆம், இது எனது தனிப்பட்ட மதிப்பீடு. அவர்களின் கொள்கைத் தேர்வுகள் அமெரிக்காவினால் கணிசமாகப் பாதிக்கப்படுகின்றன என்று நான் நம்புகிறேன். சூழ்நிலையைப் பற்றிய எனது புரிதல் இதுதான்.

கேள்வி: உக்ரைன் போரை ரஷ்யாவும் தொடங்கவில்லையா? யார் முதலில் தாக்கினார்கள்?

பதில்: இந்த விவாதத்தை ரஷ்யா மற்றும் உக்ரைனுடன் மட்டும் நான் தனிமைப்படுத்த விரும்பவில்லை. ஆரம்பத்தில் இருந்தே தொடங்குகிறேன். 2014 இல், முறையாகத் தேர்ந்தெடுக்கப்பட்ட ஜனாதிபதி விக்டர் யானுகோவிச் பதவியிலிருந்து நீக்கப்பட்டபோது, உக்ரைனில் ஓர் அரசியலமைப்பிற்கு முரணான ஆட்சிக்கவிழ்ப்பு ஏற்பட்டது. அதன் பிறகு, டொன்பாஸ் (Donbas) உட்பட உக்ரைனின் கிழக்குப் பகுதியில் வன்முறை வெடித்தது, அங்கு ரஷ்ய மொழி பேசும் மக்கள் பாதிக்கப்பட்டனர். வன்முறையை நிறுத்தி, கீவ் (Kyiv) அதிகாரிகளுடன் பேச்சுவார்த்தையை ஊக்குவிக்குமாறு எங்களது ஐரோப்பிய பங்காளிகளிடம் நாங்கள் பலமுறை கோரிக்கை விடுத்தோம்.

கேள்வி: ஆனால் இப்போது, மத்திய கிழக்கின் சில பகுதிகளில் மோதல்கள் குறைந்து, அமைதிப் பேச்சுவார்த்தைகள் நடந்து வரும் நிலையில், ரஷ்யாவால் ஏன் உக்ரைனிலும் இதேபோன்ற அமைதி செயல்முறையைப் பின்பற்ற முடியாது?

பதில்: ரஷ்யா அமைதிக்குத் தயாராகவே உள்ளது. எவ்வாறாயினும், மோதலின் மூல காரணங்கள் களையப்பட வேண்டும் என்பதே எங்களது நிலப்பாடு. 2024 ஆம் ஆண்டில், ஜனாதிபதி புடின் ரஷ்யாவின் நிபந்தனைகளைத் தெளிவாகக் கோடிட்டுக் காட்டினார். உக்ரைனுக்கும் அதற்கு ஆதரவளிப்பவர்களுக்கும் அடிப்படையில் இரண்டு விருப்பங்கள் மட்டுமே உள்ளன: ஒன்று இந்த நிபந்தனைகளை ஏற்றுக்கொள்வது, அல்லது இராணுவ நடவடிக்கை தொடரும். இந்த முடிவுகளில் உக்ரைன் முற்றிலும் சுதந்திரமாகச் செயல்படவில்லை என்றே நாங்கள் நம்புகிறோம். எங்களது பார்வையில், கள நிலவரம் தொடர்ந்து மாறிக்கொண்டே இருக்கிறது, எனவே எதிர்கால உடன்படிக்கைக்கான நிபந்தனைகளும் மாறுகின்றன. நாங்கள் தொடர்ந்து கூறி வருகிறோம்: போதும் என்பதே எங்கள் நிலை.

கேள்வி: உலக ஒழுங்கு மாறிவருவது போல் தெரிகிறது. நீங்கள் இன்னும் ஐரோப்பிய ஒன்றியத்திற்கு உதவ விரும்புகிறீர்களா?

பதில்: அது அவர்களின் முடிவு. அவர்கள் எங்களுடன் ஒத்துழைக்க விரும்பவில்லை என்றால், அந்த முடிவை நாங்கள் மதிக்கிறோம். ஐரோப்பிய மக்கள் துன்பப்பட விரும்பவில்லை, ஆனால் சில அரசாங்கங்கள் தங்களது சொந்த குடிமக்கள் மற்றும் வரி செலுத்துவோரின் நலன்களை விட உக்ரைனுக்கு முன்னுரிமை அளிக்கின்றன என்று நான் நம்புகிறேன். ஐரோப்பிய மக்கள் இதை அங்கீகரிக்கும் அளவுக்கு புத்திசாலிகள் என்று நான் நம்புகிறேன்.

ஜனாதிபதி டிரம்ப் ரஷ்யா தொடர்பாக கணிசமான அழுத்தத்திற்கு உள்ளாகியுள்ளார்

கேள்வி: அரசியல் மட்டத்தில், ரஷ்ய ஜனாதிபதி புடினும் அமெரிக்க ஜனாதிபதி டிரம்பும் சுமூகமான உறவைப் பேணி வருவது போல் தெரிகிறது. அது பதற்றத்தைத் தணிக்க வழிவகுக்கும் என்று நீங்கள் நம்புகிறீர்களா?

பதில்: அவர்கள் நல்லுறவைக் கொண்டிருப்பது போல் தோன்றலாம், ஆனால் நாங்கள் அரசாங்கங்களை அவர்களின் தோற்றத்தை வைத்து அல்லாமல் அவர்களின் செயல்களை வைத்தே மதிப்பிடுகிறோம். உக்ரைனுக்கான இராணுவ உதவிகளும் ஆயுத விநியோகமும் தொடர்ந்து வருகின்றன. ஜனாதிபதி டிரம்ப் அமைதியை நோக்கிச் செல்ல விருப்பம் தெரிவித்துள்ளதாலும், ஜனாதிபதி புடினைச் சந்திக்க அழைப்பு விடுத்துள்ளதாலும் நாங்கள் அவரை மதிக்கிறோம். அவரது தூதர்கள் மொஸ்கோவிற்குப் பயணம் மேற்கொண்டுள்ளனர், மேலும் உக்ரைனில் அமைதியான தீர்வை எட்ட அவர் உண்மையிலேயே விரும்புகிறார் என்று நாங்கள் நம்புகிறோம். எவ்வாறாயினும், எங்களது பார்வையில், அவர் அமெரிக்காவிற்குள், குறிப்பாக ஜனநாயகக் கட்சி மற்றும் குடியரசுக் கட்சிக்குள் உள்ள தீவிரப் போக்காளர்களிடமிருந்து (hawkish elements) கணிசமான எதிர்ப்பை எதிர்கொள்கிறார். சில ஐரோப்பிய நாடுகளும் பேச்சுவார்த்தை மூலமான தீர்வுக்கு வலுவான எதிர்ப்பாளர்களாக இருப்பதாக நாங்கள் நம்புகிறோம்.

கேள்வி: அப்படியென்றால் ஜனாதிபதி டிரம்ப் அரசியல் அழுத்தத்திற்கு உள்ளாகியுள்ளார் என்று நம்புகிறீர்களா?

பதில்: ஆம், அவர் கணிசமான அழுத்தத்திற்கு உள்ளாகியுள்ளார் என்று நான் நம்புகிறேன்.

கேள்வி: மொஸ்கோவிற்கும் வாஷிங்டனுக்கும் இடையிலான உறவுகள் மேம்பட்டால், அது இறுதியில் தடைகளை நீக்குவதற்குக் வழிவகுத்து, இலங்கை போன்ற நாடுகளுடன் ரஷ்யா வணிகம் செய்வதை எளிதாக்குமா?

பதில்: ரஷ்யா அதற்குத் தயாராகவே உள்ளது. எவ்வாறாயினும், முந்தைய அமெரிக்க நிர்வாகங்களால் விதிக்கப்பட்ட பல தடைகள் இன்னும் நடைமுறையில் உள்ளன. எங்களது பார்வையில், அவை சட்டவிரோதமாக அறிமுகப்படுத்தப்பட்டன. அமெரிக்காவில் உள்ள ரஷ்ய இராஜதந்திர சொத்துக்கள் பறிமுதல் செய்யப்பட்டன. உதாரணமாக, சான் பிரான்சிஸ்கோவில் உள்ள எங்களது தூதரகம் மூடப்பட்டது, சீட்டிலில் உள்ள தூதரகமும் மூடப்பட்டது.

கேள்வி: டிரம்ப் மற்றும் புடின் இடையே நெருக்கமான தனிப்பட்ட உறவு உள்ளது. அந்தப் புரிதல் யதார்த்தத்தைப் பிரதிபலிக்கிறதா?

பதில்: நடைமுறையில், உறவில் இன்னும் பல தடைகள் உள்ளன.

பிற நாடுகளில் நடக்கும் மோதல்கள் குறித்து ரஷ்யா ஒருதலைப்பட்சமான கண்காட்சிகளை ஏற்பாடு செய்யாது

கேள்வி: ஊடக சுதந்திரத்திற்கு வருவோம். ரஷ்யாவை விமர்சிக்கும் வகையிலான புகைப்படக் கண்காட்சி ஒன்று நடைபெற்றது, அதற்கு ரஷ்ய தூதரகம் எதிர்ப்புத் தெரிவித்தது. இது தலையீடா?

பதில்: இல்லை, இது தலையீடு அல்ல. இது எங்களது நிலப்பாடு. தமிழ் புலிகளுடனான இலங்கைப் போரைக் கண்டித்து, ரஷ்யா அல்லது ரஷ்ய மொழி பேசும் மக்களுக்கு என்ன நடந்தது என்ற எந்தவொரு பின்னணியும் இல்லாமல், ஒரு மோதலின் ஒரு பக்கத்தை மட்டும் முன்னிலைப்படுத்தி மொஸ்கோவில் ஒருதலைப்பட்சமான கண்காட்சி நடத்தப்படும் ஒரு சூழ்நிலையைக் கற்பனை செய்து பாருங்கள். அது சமநிலையான ஒன்றாகக் கருதப்படுமா? தகவல்கள் சமநிலையான முறையில் முன்வைக்கப்பட வேண்டும் என்றே நாங்கள் நம்புகிறோம். பின்னணி அல்லது மாற்றுப் பார்வைகள் இல்லாமல் ஒரு பக்கக் கதை மட்டுமே காட்டப்படும் போது, அது புறநிலையானதாக இருக்காது.

கேள்வி: ஆனால் மோதல் தொடர்பான பிரச்சினைகள் குறித்த இத்தகைய கண்காட்சிகள் இலங்கையிலும் பிற இடங்களிலும் நடந்துள்ளனவே.

பதில்: எனக்குப் புரிகிறது, ஆனால் ரஷ்யாவில், பிற நாடுகள் சம்பந்தப்பட்ட உணர்திறன் மிக்க மோதல்கள் குறித்து நாங்கள் ஒருதலைப்பட்சமான கண்காட்சிகளை ஏற்பாடு செய்ய மாட்டோம். எங்களது கவலை கலை அல்லது கல்வி சுதந்திரம் பற்றியது அல்ல, மாறாகப் பிரதிநிதித்துவத்தில் உள்ள சமநிலை மற்றும் நியாயம் பற்றியது ஆகும். இத்தகைய கண்காட்சி ஒன்று இலங்கையின் சிரேஷ்ட அதிகாரி ஒருவரின் பங்கேற்புடன் ஆரம்பித்து வைக்கப்பட்டமை எங்களது ஏமாற்றத்தை அளித்தது. எங்களது பார்வையில், அரசியல் ரீதியாக உணர்திறன் மிக்க, ஒருதலைப்பட்சமான விளக்கக்காட்சிகளில் ஈடுபடுவது குறித்து அரசாங்கப் பிரதிநிதிகள் எச்சரிக்கையாக இருக்க வேண்டும்.

கேள்வி: அப்படியென்றால், உங்கள் கவலை கண்காட்சியைப் பற்றியது அல்ல, அதில் உத்தியோகபூர்வமாகப் பங்கேற்றதைப் பற்றியதா?

பதில்: ஆம், அது சரியானது. நாங்கள் எங்களது கவலைகளை இராஜதந்திர வழிகள் மூலம் எழுப்பினோம்.

கேள்வி: உக்ரைனிய ஊடகவியலாளர்களை ரஷ்யாவிற்கு செய்தி மாநாடுகளுக்கு அழைக்கிறீர்களா?

பதில்: இல்லை, அவர்கள் வர மாட்டார்கள். அவர்கள் 2022 க்கு முன்பு கலந்து கொண்டனர்.

கேள்வி: குளோபல் சவுத் நாடுகளுடன் உறவுகளை வலுப்படுத்துவது குறித்து ரஷ்யா அடிக்கடி பேசி வருகிறது. இது உங்கள் வெளியுறவுக் கொள்கையின் முக்கிய தூணாக மாறுகிறதா?

பதில்: ஆம். குளோபல் சவுத் நாடுகள் முழுவதிலும் உள்ள எங்களது கூட்டாண்மைகளுக்கு நாங்கள் மிகுந்த முக்கியத்துவம் அளிக்கிறோம். மற்றுமொரு ரஷ்யா-ஆப்பிரிக்கா உச்சிமாநாட்டிற்கு நாங்கள் தயாராகி வருகிறோம். அண்மையில் நாங்கள் மிகவும் வெற்றிகரமான ரஷ்யா-ஆசியான் (ASEAN) உச்சிமாநாட்டை நடத்தினோம். பெலாரஸ், கஜகஸ்தான் மற்றும் கிர்கிஸ்தான் உள்ளிட்ட யூரேசிய பொருளாதார ஒன்றியத்திற்குள்ளும் நாங்கள் நெருக்கமான ஒத்துழைப்பைப் பேணி வருகிறோம். நான் நம்பிக்கையுடன் இருக்கிறேன், ஏனெனில் ஜனாதிபதி விளாடிமிர் புடின் நிர்ணயித்த நோக்கங்களைப் பின்தொடரும் அதேவேளையில், ரஷ்யா தனது இறையாண்மையையும் சுதந்திரத்தையும் பாதுகாப்பதைத் தவிர வேறு வழியில்லை.

கேள்வி: இந்தியா ரஷ்யா மற்றும் பல மேற்கத்திய நாடுகள் ஆகிய இருதரப்புடனும் நெருங்கிய உறவைக் கொண்டுள்ளது. எரிசக்தி அல்லது உள்கட்டமைப்பு மேம்பாடு தேவைப்படும் நாடுகளுடன் ரஷ்யா தனது ஒத்துழைப்பை விரிவுபடுத்த பிரதமர் நரேந்திர மோடி அதிக பங்களிக்க முடியுமா?

பதில்: எங்களது நெருங்கிய பங்காளிகளுடன் எங்களால் ஏற்கனவே திறம்பட ஒத்துழைக்க முடிகிறது. இந்தியா, சீனா மற்றும் ஆசியான் நாடுகளுடனான எங்களது ஒத்துழைப்பு தொடர்ந்து வளர்ந்து வருகிறது, மேலும் இந்த கூட்டாண்மைகளை மேலும் விரிவுபடுத்துவதற்கான கணிசமான சாத்தியக்கூறுகள் இருப்பதாக நாங்கள் நம்புகிறோம்.

மனித உரிமைகள் விவகாரத்தில் ரஷ்யா இலங்கைக்கு ஆதரவளிக்கிறது

கேள்வி: தற்போதைய இலங்கை அரசாங்கத்தின் வெளியுறவுக் கொள்கைச் செயல்பாட்டை நீங்கள் எவ்வாறு மதிப்பிடுகிறீர்கள்?

பதில்: இலங்கையின் சமநிலையான மற்றும் நடுநிலையான வெளியுறவுக் கொள்கையை நாங்கள் பெரிதும் பாராட்டுகிறோம். இதை நான் பலமுறை கூறியுள்ளேன், இது தற்போதைய அரசாங்கத்திற்கு மட்டுமன்றி முந்தைய அரசாங்கங்களுக்கும் பொருந்தும். எதிர்காலத்திலும் இதே போன்ற அணுகுமுறை தொடரும் என்று நாங்கள் நம்புகிறோம்.

கேள்வி: ரஷ்யா மீதான இலங்கையின் கொள்கையை நீங்கள் எவ்வாறு பார்க்கிறீர்கள்?

பதில்: இலங்கையின் நிலப்பாட்டை நாங்கள் பெரிதும் பாராட்டுகிறோம். ரஷ்யாவிற்கு எதிரான தடைகளில் இலங்கை இணையவில்லை, மேலும் ஐநா பொதுச் சபை உள்ளிட்ட சர்வதேச மன்றங்களில், மோதல் தொடர்பான தீர்மானங்களில் அது பொதுவாக வாக்கெடுப்பில் கலந்துகொள்ளாமல் நடுநிலை வகிக்கவே (abstain) தேர்ந்தெடுத்துள்ளது. இந்த அணுகுமுறையை நாங்கள் பாராட்டுகிறோம். ரஷ்யாவும் பல்வேறு சர்வதேச மன்றங்களில், குறிப்பாக மனித உரிமைகள் பிரச்சினைகளில் இலங்கைக்கு ஆதரவளிக்கிறது. மேற்கத்திய நாடுகள் மற்றவர்களுக்குப் பாடம் நடத்துவதை விடுத்து, தங்களது சொந்த உள்நாட்டுப் பிரச்சினைகளைத் தீர்ப்பதில் கவனம் செலுத்த வேண்டும் என்பதே எங்களது நிலப்பாடு. சர்வதேச அரசியலில் போலித்தனம் மற்றும் இரட்டைத் தரங்களுக்கு பல உதாரணங்கள் உள்ளன என்று நாங்கள் நம்புகிறோம்.

கேள்வி: ரஷ்யா, அமெரிக்கா, சீனா, இந்தியா மற்றும் மத்திய கிழக்கு நாடுகள் போன்ற முக்கிய வல்லரசுகள் இலங்கையுடன் தீவிரமாக ஈடுபட்டு வருகின்றன. இந்த பரந்த புவிசார் அரசியல் பின்னணியில் இலங்கையுடனான ரஷ்யாவின் ஈடுபாட்டை நீங்கள் எவ்வாறு பார்க்கிறீர்கள்?

பதில்: நான் குறிப்பிட்டது போல், இலங்கையின் கொள்கையை நாங்கள் பெரிதும் பாராட்டுகிறோம். இருதரப்பு ஈடுபாடுகள் அதிகரித்து வருகின்றன. சமீபத்தில், பல உயர்மட்ட தூதுக்குழுக்கள் பரஸ்பர விஜயங்களை மேற்கொண்டுள்ளன. ரஷ்யாவின் எரிசக்தி துறை பிரதி அமைச்சர் இலங்கைக்கு விஜயம் செய்தார், அதைத் தொடர்ந்து எங்களது பிரதி வெளிவிவகார அமைச்சரும் விஜயம் செய்தார். பல ஆண்டுகளுக்குப் பிறகு எங்களது வெளிவிவகார அமைச்சுக்களுக்கு இடையே முக்கியமான இருதரப்பு ஆலோசனைகளையும் நடத்தினோம். இந்த இலங்கை தூதுக்குழுவிற்கு நான் பெரிதும் மதிக்கும் வெளிவிவகார செயலாளர் அருணி ரணராஜா தலைமை தாங்கினார். ரஷ்யாவின் சுகாதார அமைச்சரும் இலங்கைக்கு விஜயம் செய்து இலங்கையின் சுகாதார அமைச்சரைச் சந்தித்தார்.

இந்த பரிமாற்றங்களைத் தொடர நாங்கள் உத்தேசித்துள்ளோம். அடுத்த வாரம், நாடாளுமன்ற ஒத்துழைப்பை வலுப்படுத்துவது மற்றும் எங்களது சட்டமன்றங்களுக்கு இடையிலான பரிமாற்றங்களை அதிகரிப்பது குறித்து விவாதிக்க நாடாளுமன்ற சபாநாயகர் கலாநிதி ஜகத் விக்ரமரத்னவைச் சந்திக்கத் திட்டமிட்டுள்ளேன். பல ரஷ்ய தூதுக்குழுக்கள் இலங்கைக்கு விஜயம் செய்யத் திட்டமிட்டுள்ளன, அதே நேரத்தில் இலங்கை அமைச்சர்களும் ரஷ்யாவிற்குப் பயணம் செய்துள்ளனர். அமைச்சர் பிமல் ரத்நாயக்க இருமுறை ரஷ்யாவிற்கு விஜயம் செய்துள்ளார், அமைச்சர் சுனில் செனவியும் அங்கு பயணம் செய்துள்ளார். கொழும்பு மேயரையும் ரஷ்யாவிற்கு வருமாறு அழைத்துள்ளோம். ஒட்டுமொத்தமாக, எங்களது இருதரப்பு உறவுகளின் எதிர்காலம் குறித்து நான் நம்பிக்கையுடன் இருக்கிறேன்.

கேள்வி: தற்போதைய இலங்கை அரசாங்கம் முந்தைய அரசாங்கங்களை விட ரஷ்யாவுடன் மிகவும் தீவிரமாக ஈடுபடுவதாக நீங்கள் நம்புகிறீர்களா?

பதில்: அரசாங்கங்களை ஒப்பிட நான் விரும்பவில்லை. இலங்கை மக்களால் தேர்ந்தெடுக்கப்படும் ஒவ்வொரு அரசாங்கத்தையும் ரஷ்யா மதிக்கிறது. இலங்கை பாரம்பரியமாக ரஷ்யாவுடன் நட்புரீதியான உறவைப் பேணி வருகிறது என்பதை மட்டுமே என்னால் கூற முடியும். இந்தத் தொடர்புகள் சோவியத் ஒன்றியத்தின் காலத்திற்குச் செல்கின்றன, மேலும் அந்தத் தொடர்ச்சியை நாங்கள் பாராட்டுகிறோம்.

கேள்வி: முன்மொழியப்பட்ட அணுமின் திட்டம் முதல் இரயில்வே, சுற்றுலா மற்றும் எரிசக்தி வரை பல ஒத்துழைப்புத் துறைகள் பல ஆண்டுகளாக விவாதிக்கப்பட்டு வருகின்றன. தடைகள் இருந்தபோதிலும் இலங்கையுடனான நடைமுறை ஒத்துழைப்பு முன்னோக்கிச் செல்ல முடியும் என்பதில் நீங்கள் இன்னும் நம்பிக்கையுடன் இருக்கிறீர்களா?

பதில்: ஆம், நான் நம்பிக்கையுடன் இருக்கிறேன். மலேசியா, இந்தோனேசியா, வியட்நாம், லாவோஸ் மற்றும் கம்போடியா உள்ளிட்ட பல ஆசியான் நாடுகளுடன் ரஷ்யா தொடர்ந்து உற்பத்தித்திறன் மிக்க பொருளாதார உறவுகளைப் பேணி வருகிறது. இந்த நாடுகளின் பல தலைவர்கள் சமீபத்தில் ரஷ்யாவிற்கு விஜயம் செய்துள்ளனர், இது தடைகள் இருந்தபோதிலும் அவர்கள் ஒத்துழைப்பில் ஆர்வமாக உள்ளனர் என்பதைக் காட்டுகிறது. கசானில் (Kazan) நடைபெற்ற ரஷ்யா-ஆசியான் உச்சிமாநாடும் இந்த ஆர்வத்தைப் பிரதிபலித்தது. சிங்கப்பூர் ரஷ்யாவிற்கு எதிரான தடைகளில் இணைந்திருந்த போதிலும், சிங்கப்பூர் பிரதமரும் கூட இதில் கலந்து கொண்டார். இச்சந்திப்பு ஆக்கப்பூர்வமானதாக இருந்ததுடன், அரசியல் வேறுபாடுகள் இருந்தபோதிலும் பேச்சுவார்த்தையும் ஒத்துழைப்பும் தொடரலாம் என்பதைக் காட்டியது.

கேள்வி: இரயில்வே மற்றும் உள்கட்டமைப்பு போன்ற துறைகள் குறித்து விவாதிக்க இலங்கை அதிகாரிகளும் ரஷ்யாவிற்கு விஜயம் செய்துள்ளனர். அந்த விவாதங்கள் ஏதேனும் முன்னேற்றம் கண்டுள்ளனவா?

பதில்: அது குறித்து இலங்கை அதிகாரிகளிடம் கேட்பதுதான் நல்லது. அவர்களின் விவாதங்கள் குறித்து நான் கருத்து தெரிவிக்க விரும்பவில்லை. ஒத்துழைப்பை எளிதாக்குவதற்கு ரஷ்யா சாத்தியமான அனைத்தையும் தொடர்ந்து செய்து வருகிறது.

கேள்வி: ரஷ்யாவிற்கான இலங்கை தேயிலை ஏற்றுமதி எவ்வாறு செயல்படுகிறது?

பதில்: மிகவும் நன்றாக உள்ளது, நான் மிகவும் மகிழ்ச்சியடைகிறேன். தேயிலை வர்த்தகம் தொடர்ந்து விரிவடையும் என்று நம்புகிறேன். ‘பாசிலர்’ (Basilur) தேயிலை பிராண்ட் எங்களது சூப்பர் மார்க்கெட்டுகளில் பரவலாகக் கிடைக்கிறது. இந்த பிராண்டிற்கு எங்களது குடிமக்களிடையே அதிக தேவை உள்ளது.

கேள்வி: அதற்குப் பகரமாக, ரஷ்யா தற்போது இலங்கைக்கு என்ன ஏற்றுமதி செய்கிறது?

பதான்: வர்த்தகம் தொடர்கிறது, இருப்பினும் அது நாங்கள் விரும்பும் மட்டத்தில் இல்லை. முன்னதாக, ரஷ்யா அஸ்பெஸ்டாஸ் தாள்கள் (asbestos sheets) மற்றும் இதர தொழிற்துறை பொருட்களை ஏற்றுமதி செய்தது.

கேள்வி: அரசாங்கங்களுக்கு இடையிலான எண்ணெய் விநியோகம் குறித்த விவாதங்கள் என்னவாயின?

பதில்: விவாதங்கள் அரசாங்கங்களுக்கு இடையிலான அடிப்படையில் நடைபெறவில்லை. அவை தனியார் நிறுவனங்களை உள்ளடக்கியவை. ஒரு தூதுவராக எனது பணி வணிகங்களை ஒன்றிணைப்பதும் ஒத்துழைப்பிற்கான வாய்ப்புகளை உருவாக்குவதும்தான். அதன்பிறகு, வணிக ரீதியான முடிவுகள் நிறுவனங்களாலேயே எடுக்கப்படுகின்றன. தனியார் வணிகப் பேச்சுவார்த்தைகளின் விபரங்களை விவாதிக்க எனக்கு அதிகாரம் இல்லை.

கேள்வி: அந்த விவாதங்கள் இன்னும் நடந்து கொண்டிருக்கின்றனவா?

பதில்: என்னிடம் தற்போதைய விபரங்கள் இல்லை. ரஷ்ய எண்ணெய் இலங்கைக்கு வந்திருந்தால், எனக்குத் தெரிந்திருக்கும் என்று நம்புகிறேன். எவ்வாறாயினும், அமெரிக்க எண்ணெய் ஏற்றுமதி இலங்கையை வந்தடைந்தது பற்றிய ஊடக அறிக்கைகளை நான் படித்துள்ளேன்.

கேள்வி: எனவே, உங்களுக்குத் தெரிந்தவரை, இலங்கைக்கு ரஷ்ய எண்ணெய் ஏற்றுமதி செய்யப்படவில்லை, அப்படித்தானே?

பதில்: இந்த கட்டத்தில், இலங்கைக்கு ரஷ்ய எண்ணெய் விநியோகிக்கப்பட்டது குறித்த எந்தத் தகவலும் என்னிடம் இல்லை.

கேள்வி: இலங்கையுடனான எதிர்கால வர்த்தகம் மற்றும் பொருளாதார ஈடுபாட்டின் அடிப்படையில் ரஷ்யா எதைக் காண விரும்புகிறது?

பதில்: ஒத்துழைப்பை விரிவுபடுத்த ரஷ்யா தயாராக உள்ளது. சமீபத்தில், இலங்கையின் கிராமப்புற வளர்ச்சி அமைச்சர் மற்றும் பலர் கலந்து கொண்ட ஒரு பொது நிகழ்வில் பேசும்போது, எண்ணெய் விநியோகம் உள்ளிட்ட எரிசக்தி ஒத்துழைப்பு குறித்து நாங்கள் ஆக்கப்பூர்வமான விவாதங்களை நடத்தியுள்ளோம் என்று குறிப்பிட்டிருந்தேன். ரஷ்யா உதவத் தயாராக உள்ளது என்பதை நான் மிகவும் தெளிவாகக் கூறினேன். பந்து இப்போது இலங்கையின் பக்கத்தில் உள்ளது. இலங்கை எதிர்கொள்ளும் சவால்களை நாங்கள் புரிந்துகொள்கிறோம். உங்கள் நாடு தனது சொந்த முடிவுகளை எடுப்பதற்கான இறையாண்மை உரிமையை நாங்கள் முழுமையாக மதிக்கிறோம். ரஷ்யா யார் மீதும் அழுத்தத்தை ஏற்படுத்த முனையவில்லை. இலங்கை ஒத்துழைக்கத் தயாராக இருந்தால், நாங்களும் தயாராக இருக்கிறோம். இல்லையென்றால், அந்த முடிவை நாங்கள் மதிக்கிறோம்.

கேள்வி: ரஷ்யா மற்றும் இலங்கை இடையிலான பாதுகாப்பு ஒத்துழைப்பை நீங்கள் எவ்வாறு விவரிப்பீர்கள்?

பதில்: எங்களது பாதுகாப்பு ஒத்துழைப்பில் நான் மிகவும் திருப்தியடைகிறேன். கடந்த ஆண்டு, ரஷ்ய மற்றும் இலங்கை ஆயுதப் படைகள் மாதுரு ஓயாவில் (Maduru Oya) கூட்டு இராணுவப் பயிற்சியை — பயங்கரவாத எதிர்ப்புப் பயிற்சியான ‘வொல்வெரின் பாத் 2025’ (Wolverine Path 2025) — நடத்தினின. இந்தத் பயிற்சி காட்டுச் சூழலில் மிகவும் நட்புரீதியான சூழ்நிலையில் நடத்தப்பட்டது. எங்களது இலங்கை தரப்பினரையும் நாங்கள் ரஷ்யாவிற்கு அழைத்துள்ளோம், மேலும் மேலதிக ஒத்துழைப்பு குறித்த விவாதங்கள் தொடர்கின்றன. இலங்கையின் பாதுகாப்புச் செயலாளர் எயார் வைஸ் மார்ஷல் சம்பத் துயகொந்தா (Sampath Thuyacontha) கடந்த மே மாதம் மொஸ்கோவிற்கு விஜயம் செய்து ரஷ்யாவின் பிரதி பாதுகாப்பு அமைச்சருடன் ஆக்கப்பூர்வமான விவாதங்களை நடத்தினார். எங்களது பாதுகாப்பு உறவின் முன்னேற்றம் குறித்து நான் மிகவும் மகிழ்ச்சியடைகிறேன்.

கேள்வி: ஒத்துழைப்பு முக்கியமாக இராணுவப் பயிற்சியுடன் மட்டுப்படுத்தப்பட்டுள்ளதா?

பதில்: தற்போது, இராணுவப் பயிற்சி என்பது ஒத்துழைப்பின் ஒரு முக்கிய துறையாக உள்ளது. இந்த பயிற்சியின் போது ரஷ்ய இராணுவத்தினரும் இலங்கை அதிகாரிகளும் இணைந்து பயிற்சி பெற்றனர், மேலும் இந்த திட்டத்தின் ஒரு பகுதியில் நானும் கலந்து கொண்டதில் மகிழ்ச்சியடைகிறேன். இந்த கூட்டு இராணுவப் பயிற்சிகள் எதிர்காலத்திலும் தொடரும் என்று எதிர்பார்க்கப்படுகிறது. இருதரப்பு பாதுகாப்பு ஒத்துழைப்பை வலுப்படுத்துவதில் தங்களது முயற்சிகளுக்காக இலங்கையின் பிரதி பாதுகாப்பு அமைச்சர் மேஜர் ஜெனரல் அருண ஜெயசேகர மற்றும் பாதுகாப்புச் செயலாளர் எயார் வைஸ் மார்ஷல் சம்பத் துயகொந்தா ஆகியோருக்கு எனது பாராட்டுகளைத் தெரிவிக்க விரும்புகிறேன்.

கேள்வி: இலங்கை இராணுவத்தினரும் ரஷ்யாவில் பயிற்சி பெற்றுள்ளனரா?

பதில்: மேலதிக பயிற்சி மற்றும் ஒத்துழைப்பு குறித்த விவாதங்கள் தொடர்கின்றன, அந்தப் பரிமாற்றங்களை வலுப்படுத்த நாங்கள் உத்தேசித்துள்ளோம்.

கேள்வி: இலங்கைப் பாதுகாப்புச் செயலாளரின் மொஸ்கோ விஜயத்தின் போது, பாதுகாப்பு ஒப்பந்தங்கள் ஏதேனும் விவாதிக்கப்பட்டதா?

பதில்: உண்மையைச் சொல்வதானால், என்னிடம் விபரங்கள் இல்லை. அந்த விவாதங்களுக்கு அவர்களே பொறுப்பு என்பதால், எங்களது இராணுவ அதிகாரிகளிடம் அதைக் கேட்பது நல்லது.

கேள்வி: இலங்கையில் நடந்த கூட்டுப் பயிற்சிகளில் தோராயமாக எத்தனை ரஷ்ய இராணுவத்தினர் பங்கேற்றனர்?

பதில்: எனக்கு துல்லியமான எண்ணிக்கை நினைவில் இல்லை. இந்த பயிற்சிகள் அக்டோபர் மாதமளவில் நடந்ததாக நான் நம்புகிறேன். என்னால் கூறக்கூடியது என்னவென்றால், ரஷ்ய மற்றும் இலங்கை ஆயுதப் படைகளுக்கு இடையிலான வெற்றிகரமான ஒத்துழைப்பைக் குறித்து நான் மிகவும் பெருமையடைந்தேன்.

கேள்வி: உங்கள் பிராந்தியத்தில் பயங்கரவாத நிலவரம் எவ்வாறு உள்ளது?

பதில்: அது முற்றிலும் கட்டுப்பாட்டுக்குள் உள்ளது. இருப்பினும், சில பயங்கரவாத நடவடிக்கைகள் உக்ரைனிய ஆட்சியினால் நிதியுதவி அளிக்கப்படுகின்றன.

கேள்வி: ஜனாதிபதி புடின் இந்தியா போன்ற நாடுகளுக்கு தவறாமல் விஜயம் செய்கிறார், ஆனால் அவர் ஒருபோதும் இலங்கைக்கு விஜயம் செய்ததில்லை. ஏதேனும் குறிப்பிட்ட காரணம் இருக்கிறதா?

பதில்: பொதுவாக, ரஷ்யா பெரிய மூலோபாய திட்டங்களைக் கொண்டுள்ள அல்லது கணிசமான அளவு இருதரப்பு வர்த்தகத்தைக் கொண்டுள்ள நாடுகளுக்கே ஜனாதிபதி புடின் விஜயம் செய்கிறார். உதாரணமாக, ரஷ்யா அணுமின் நிலையத்தை உருவாக்கத் தொடங்கியுள்ள உஸ்பெகிஸ்தானுக்கு அவர் சமீபத்தில் விஜயம் செய்தார். வியட்நாம், மியான்மர், பங்களாதேஷ், துருக்கி, ஈரான் மற்றும் எகிப்து ஆகிய நாடுகளிலும் நாங்கள் அணுசக்தி திட்டங்களில் ஈடுபட்டுள்ளோம் என்பது குறிப்பிடத்தக்கது.