சக்திவாய்ந்த செயற்கை நுண்ணறிவு (AI) அமைப்புகளை ஏற்றுக்கொள்ளாத நாடுகள் பலவீனமான மற்றும் ஏழ்மையான நாடுகளாக மாறும் அபாயம் உள்ளதாக பிரித்தானியாவின் முன்னாள் நிதியமைச்சர் ஜார்ஜ் ஆஸ்போர்ன் தெரிவித்துள்ளார். அமெரிக்காவின் ஓபன்ஏஐ (OpenAI) நிறுவனத்தில் இணைந்து இரண்டு மாதங்களே ஆன நிலையில் அவர் இந்தக் கருத்துக்களை வெளியிட்டுள்ளார்.
டெல்லியில் நடைபெற்ற ‘AI தாக்க உச்சிமாநாட்டில்’ (AI Impact summit) உரையாற்றிய அவர், “பின்தங்கி விடாதீர்கள்” என்று உலகத் தலைவர்களுக்கு அழைப்பு விடுத்தார். AI தொழில்நுட்பத்தை நடைமுறைப்படுத்தாத நாடுகளின் உழைக்கும் வர்க்கத்தினர், அத்தகைய வசதிகள் உள்ள நாடுகளை நோக்கி இடம்பெயரக்கூடும் என்றும் அவர் எச்சரித்தார்.
நாடுகள் தற்போது இரண்டு தெரிவுகளுக்கு மத்தியில் உள்ளதாக ஆஸ்போர்ன் குறிப்பிட்டார். ஒன்று அமெரிக்காவின் AI அமைப்புகளைப் பயன்படுத்துவது அல்லது சீனாவின் அமைப்புகளைப் பயன்படுத்துவது. தற்போதைய நிலையில் இந்த இரண்டு வல்லரசு நாடுகளுமே மிகவும் சக்திவாய்ந்த AI தொழில்நுட்பங்களைக் கொண்டுள்ளன.
அதேவேளை, அமெரிக்க வெள்ளை மாளிகையின் சிரேஷ்ட AI ஆலோசகர் ஸ்ரீராம் கிருஷ்ணன், அமெரிக்காவின் AI ஆதிக்கத்தை (AI supremacy) உறுதிப்படுத்துவதில் தமது நிர்வாகம் ஆர்வமாக உள்ளதாகத் தெரிவித்தார். ஐரோப்பிய ஒன்றியத்தின் AI ஒழுங்குமுறைச் சட்டங்கள் (EU AI Act) புத்தாக்கங்களுக்குத் தடையாக இருப்பதாகவும் அவர் விமர்சித்தார்.
