கொழும்பு: இந்தியாவிற்கும் இலங்கைக்கும் இடையிலான இருதரப்பு வர்த்தகம் மற்றும் முதலீட்டு உறவுகளை மேம்படுத்தும் நோக்கில், ‘சர்வதேச வர்த்தகம் மற்றும் சம்மேளனங்களின் பிரதிநிதிகள் கூட்டமைப்பு’ (ITDFC) தலைமையிலான உயர்மட்ட இந்திய வணிகக் குழுவினர் இலங்கையில் நான்கு நாள் விஜயத்தை மேற்கொண்டுள்ளனர்.
கடந்த மார்ச் 24 முதல் 27 வரை நடைபெற்ற இந்த விஜயத்தின் போது, சுகாதாரம், உட்கட்டமைப்பு மற்றும் எல்லை தாண்டிய சேவைகள் ஆகிய துறைகளில் புதிய முதலீட்டு வாய்ப்புகள் குறித்து விரிவாக ஆராயப்பட்டது.
முக்கிய சந்திப்புகள் மற்றும் கலந்துரையாடல்கள்: ITDFC-இன் தலைமைச் செயல்பாட்டு அதிகாரி பென்சி ஜார்ஜ் தலைமையிலான இந்த குழுவினர், இலங்கையின் முக்கிய உயர்மட்ட அதிகாரிகளைச் சந்தித்துப் பேச்சுவார்த்தை நடத்தினர்:
-
ஜனாதிபதியின் செயலாளர் – கலாநிதி நந்திக சனத் குமணாயக்க
-
மேல் மாகாண ஆளுநர் – ஹனீப் யூசுப்
-
சுகாதார மற்றும் ஊடகத்துறை செயலாளர் – அனில் ஜாசிங்க
-
பொருளாதார அபிவிருத்தி பிரதி அமைச்சர் – நிஷாந்த ஜயவீர
-
கடற்றொழில் அமைச்சின் செயலாளர் – பி.கே. கோலித கமல் ஜினதாச
முக்கிய துறைகள்: இலங்கையை முதலீட்டு ரீதியாக வலுவான நாடாக மாற்றுவதற்கான அரசாங்கத்தின் முயற்சிக்கு இந்தியக் குழுவினர் தமது ஆதரவை வெளிப்படுத்தினர். குறிப்பாக பின்வரும் துறைகளில் கூடுதல் கவனம் செலுத்தப்பட்டது:
-
சுகாதாரம் மற்றும் மருந்துகள் (Healthcare & Pharmaceuticals)
-
மருத்துவ சுற்றுலா (Medical Value Travel)
-
உட்கட்டமைப்பு மேம்பாடு (Infrastructure Development)
-
எல்லை தாண்டிய மருத்துவ சேவைகள்
எதிர்காலத் திட்டங்கள்: இந்த விஜயத்தின் ஒரு பகுதியாக, எதிர்வரும் ஜூலை 14 மற்றும் 15 ஆம் திகதிகளில் கேரளாவில் நடைபெறவுள்ள “SEHAT 2026 சர்வதேச மருத்துவ சுற்றுலா மற்றும் சுகாதார முதலீட்டு மாநாட்டில்” பங்கேற்குமாறு இலங்கை அரசாங்கத்திற்கும் வர்த்தகத் துறையினருக்கும் ITDFC அழைப்பு விடுத்துள்ளது.
“இலங்கை ஒரு முக்கிய மூலோபாய பங்காளியாக உள்ளது. வர்த்தகம், முதலீடு மற்றும் சுகாதாரத் துறைகளில் நீண்டகால மற்றும் உயர்மட்ட ஒத்துழைப்புக்கான வலுவான அடித்தளத்தை இந்த விஜயம் அமைத்துள்ளது” என ITDFC அதிகாரி பென்சி ஜார்ஜ் தெரிவித்தார்.
