பிரிட்டனில் சட்டப்பூர்வமாக வசிக்கும் இலங்கை குடும்பங்கள், பராமரிப்புப் பணியாளர் விசா மீதான கட்டுப்பாடுகளின் கீழ் நாட்டை விட்டு வெளியேறுமாறு அறிவுறுத்தப்பட்டுள்ளனர்-கார்டியன்

GUARDIAN

பிரிட்டனில் (UK) முறைப்படி விசா பெற்று சட்டப்பூர்வமாக வசித்து வரும் பராமரிப்புப் பணியாளர்களின் (Care workers) 5 வயதுக் குழந்தைகளைக்கூட, பெற்றோர் அங்கிருக்க அனுமதி உள்ள போதிலும், நாட்டை விட்டு வெளியேறுமாறு பிரிட்டன் உள்துறை அமைச்சகம் (Home Office) கடிதம் அனுப்பியுள்ளது பெரும் அதிர்ச்சியை ஏற்படுத்தியுள்ளது.

இது தொடர்பாக தி கார்டியன் வெளியிட்டுள்ள புலனாய்வுச் செய்தியில், அண்மைய வாரங்களில் குழந்தைகளுக்கு அனுப்பப்பட்ட 5 விசா மறுப்புக் கடிதங்கள் உறுதி செய்யப்பட்டுள்ளன. மற்றொரு சம்பவத்தில், 6 மாதக் கர்ப்பிணிப் பெண் ஒருவர் தனது கணவரைப் பிரிந்து சொந்த நாட்டிற்குத் திரும்புமாறு உத்தரவிடப்பட்டுள்ளார்.

பாதிக்கப்படும் இலங்கை குடும்பங்கள்: விதிமுறைகள் மாற்றப்படுவதற்கு முன்பாக, அதாவது 2024 மார்ச் மாதத்திற்கு முன்னரே சட்டப்பூர்வமாக பிரிட்டன் வந்தடைந்த பராமரிப்புப் பணியாளர்களின் குடும்பங்களே இவ்வாறு இலக்கு வைக்கப்பட்டுள்ளனர்.

இலங்கையைச் சேர்ந்த வருணி ஆரச்சிகே என்ற பெண், ஸ்காட்லாந்தின் பெர்த் நகரில் தனது கணவர் மற்றும் 8, 5 வயதுக் குழந்தைகளுடன் வசித்து வருகிறார். பல்கலைக்கழகத்தில் முதுகலைப் பட்டம் பெற்றுள்ள இவர், அங்கு பராமரிப்புப் பணியாளராகப் பணிபுரிகிறார். இவரது விசா 2031 வரை நீட்டிக்கப்பட்டுள்ள நிலையில், அவரது குழந்தைகளையும் கணவரையும் நாட்டை விட்டு வெளியேறுமாறு உள்துறை அமைச்சகம் உத்தரவிட்டுள்ளது. “நாங்கள் ஆயிரக்கணக்கான பவுண்டுகளைச் செலுத்தி, முறையாக வரி கட்டி வாழ்கிறோம். அரசின் இந்த கடிதம் எங்களை முற்றிலும் நிலைகுலைய வைத்துள்ளது” என அவர் வேதனை தெரிவித்துள்ளார்.

இதேபோல், மற்றுமொரு இலங்கைத் தொழிலாளியான ரசிக சமரசிங்கவின் மனைவி மற்றும் 12, 9, 8 வயதுக் குழந்தைகளுக்கும் பிரிட்டனில் தங்குவதற்கான விசா மறுக்கப்பட்டுள்ளது. “நாங்கள் எதையும் சட்டவிரோதமாகச் செய்யவில்லை. எனது குழந்தைகள் இங்குள்ள பள்ளிகளில் நன்றாகப் படித்து வருகிறார்கள். இந்தத் தகவலை இன்னும் என் குழந்தைகளிடம் கூட என்னால் சொல்ல முடியவில்லை” என ரசிக கண்ணீருடன் தெரிவித்துள்ளார்.

புதிய விசா கெடுபிடிகள்: கடந்த 2023 ஆம் ஆண்டில் சுமார் 1,20,000 குடும்ப உறுப்பினர்கள் பிரிட்டனுக்கு வந்ததைத் தொடர்ந்து, அரசு விசா விதிமுறைகளைக் கடுமையாக்கியது. 2024 மார்ச் முதல் பராமரிப்புப் பணியாளர்கள் தங்கள் குடும்பத்தினரை அழைத்து வரத் தடை விதிக்கப்பட்டது. மேலும், பிரிட்டனில் நிரந்தரமாகக் குடியேறுவதற்கான (Settlement) கால எல்லையை 5 ஆண்டுகளில் இருந்து 15 ஆண்டுகளாக உயர்த்தவும் புதிய முன்மொழிவுகள் செய்யப்பட்டுள்ளன.

கடும் கண்டனம்: எம்.டி.சி சோலிசிட்டர்ஸ் (MTC Solicitors) நிறுவனத்தைச் சேர்ந்த வழக்கறிஞர் நாகா கந்தையா இது குறித்துக் கூறுகையில், “பராமரிப்புத் தொழிலாளர்கள் இங்குள்ள பாதிக்கப்படக்கூடிய முதியவர்களையும் நோயாளிகளையும் அர்ப்பணிப்புடன் கவனித்துக் கொள்கிறார்கள். ஆனால் புதிய விதிகள் அவர்கள் தங்கள் சொந்தக் குடும்பத்தைப் பிரிந்து வாழும் அவல நிலைக்குத் தள்ளுகின்றன” என்று சாடியுள்ளார்.

எனினும், பிரிட்டன் உள்துறை அமைச்சகத்தின் செய்தித் தொடர்பாளர், “நாட்டின் எல்லைகளைக் கட்டுப்படுத்துவதும் ஒழுங்குபடுத்துவதும் அவசியமானது. பிரிட்டனில் குடியேறுவது என்பது ஒரு சலுகையே தவிர, அது உரிமை அல்ல; அது விதிகளுக்கு உட்பட்டே வழங்கப்பட வேண்டும்” என அரசின் இந்த கடுமையான நடவடிக்கையை நியாயப்படுத்தியுள்ளார்.