மிஷெல் ஒபாமா தனது ஆடைகள் மூலம் நுட்பமான செய்திகளை வெளிப்படுத்துவதில் நீண்டகாலமாகவே சிறந்த திறமையைக் கொண்டுள்ளார். செவ்வாய்க்கிழமை அவர் அணிந்திருந்த ஆடை, இந்தத் திறமையில் அவர் கொண்டுள்ள ஆளுமைக்கு மற்றுமொரு நெகிழ்ச்சியான எடுத்துக்காட்டாக அமைந்தது.
சிகாகோவில் உள்ள புதிய ‘ஒபாமா ஜனாதிபதி மையத்தின்’ (Obama Presidential Center) மேடையில் தோன்றுவதற்காக, அமெரிக்காவின் முன்னாள் முதல் பெண்மணி (First Lady) தனது மறைந்த தாயாரின் பெரிய உருவப்படம் பொறிக்கப்பட்ட பென்சில் பாவாடை (Pencil skirt) ஒன்றை அணிந்திருந்தார். ‘அக்னி ஸ்டுடியோஸ்’ (Acne Studios) நிறுவனத்தின் இந்த பிரத்யேக வடிவமைப்பு, கடந்த 2024 ஆம் ஆண்டில் தனது 86ஆவது வயதில் காலமான மரியன் ராபின்சனுக்கு (Marian Robinson) செலுத்தப்பட்ட ஒரு சிறந்த அஞ்சலியாகும்.
செபியா (Sepia) நிறத்திலான இந்த ஆடை, மிஷெல் ஒபாமாவின் நீண்டகால ஆடை வடிவமைப்பாளரான (Stylist) மெரிடித் கூப்பின் (Meredith Koop) உதவியுடன், அவரது தாயாரின் மிகவும் பிடித்தமான புகைப்படங்களில் ஒன்றைக் கொண்டு பிரத்யேகமாக வடிவமைக்கப்பட்டிருந்தது. இந்த வடிவமைப்பு ‘அக்னி’ நிறுவனத்தின் 2026 ஆம் ஆண்டுக்கான இலையுதிர்கால-குளிர்கால (Fall-Winter 2026) ஆடை சேகரிப்பை அடிப்படையாகக் கொண்டது ஆகும். பாரிஸ் ஆடை அணிவகுப்பில் டச்சு கலைஞர் பால் கூய்கர் வடிவமைத்த ஒரு இளைஞனின் படம் பொறித்த பாவாடையை ஒத்ததாக இது அமைந்திருந்தது.
அதன் ஆடை அலங்காரமும் (Styling) அதே பாணியில் அமைந்திருந்தது. பாரிஸ் கண்காட்சியின் மாடலைப் போலவே, மிஷெல் ஒபாமாவும் இந்த பாவாடையை ஒரு மெல்லிய பெல்ட், சாக்லேட் பிரவுன் நிற டி-சர்ட் மற்றும் ஸ்லிங்பேக் காலணிகளுடன் (Slingback pumps) அணிந்திருந்தார்.
ஆடை ராஜதந்திரம் (Fashion Diplomacy)
கடந்த பல தசாப்தங்களாக, மிஷெல் ஒபாமா தனது ஆடைகளை மிகவும் சுவாரஸ்யமான மற்றும் பயனுள்ள வழிகளில் தேர்ந்தெடுத்து வந்துள்ளார். பெரும்பாலும் தனது ஆளுமையைப் பயன்படுத்தி சிறுபான்மையினத்தைச் சேர்ந்த இளம் வடிவமைப்பாளர்களை வெளிச்சத்திற்குக் கொண்டு வரவும் அல்லது தீவிரமான அரசியல் விவாதங்களின் போது தனது நிலைப்பாடுகளை நுட்பமாகச் சமிக்ஞை செய்யவும் அவர் தவறியதில்லை.
2008 இல் பராக் ஒபாமா ஜனாதிபதி தேர்தலில் வெற்றி பெற்றபோது, புதிய முதல் பெண்மணி தனது பதவியேற்பு விழா ஆடைக்காக ஃபேஷன் உலகின் உச்சக்கட்ட புகழ்பெற்ற வடிவமைப்பாளர் ஒருவரை எளிதாகத் தேர்ந்தெடுத்திருக்கலாம். ஆனால், அதற்குப் பதிலாக அவர் கனடா மற்றும் அமெரிக்காவிற்குப் புலம்பெயர்ந்த, அதுவரை அதிகம் அறியப்படாத தைவான்-கனடிய வடிவமைப்பாளரான ஜேசன் வூவின் (Jason Wu) வடிவமைப்பைத் தேர்ந்தெடுத்தார். “பொதுவாகப் பெரிய நிறுவன வடிவமைப்பாளர்கள் தான் ஜனாதிபதி பதவியேற்பு விழாவிற்கு முதல் பெண்மணிக்கு ஆடை வடிவமைப்பார்கள். ஆனால் நான் அதை மாற்றியமைக்க விரும்பினேன். அந்தத் தருணத்தில் ஜேசன் வூவின் பின்னணிக் கதை மிகவும் அர்த்தமுள்ளதாக இருந்தது,” என்று ஒபாமா சில ஆண்டுகளுக்குப் பிறகு வோக் (Vogue) இதழிடம் தெரிவித்தார்.
தனது கணவரின் இரண்டு பதவிக் காலங்களிலும் வெள்ளை மாளிகையில் இருந்த ஒபாமா, இந்த ‘ஆடை ராஜதந்திரக்’ கலையை முழுமையாகக் கையாண்டார். 2016 ஆம் ஆண்டில் அப்போதைய இத்தாலியப் பிரதமர் மேட்டியோ ரென்சி மற்றும் அவரது மனைவி அக்னீஸ் லந்தினி ஆகியோரைக் கௌரவிக்கும் வகையில் ஒபாமா தம்பதியினர் நடத்திய இறுதி உத்தியோகபூர்வ இரவு விருந்தின் போது, முதல் பெண்மணி புகழ்பெற்ற இத்தாலிய ஆடம்பர பிராண்டான ‘வெர்சேஸ்’ (Versace) வடிவமைத்த பிரத்யேக ஆடையை அணிந்திருந்தார். ரோஸ் கோல்ட் நிறத்திலான அந்த ஆடை, வந்திருந்த விருந்தினர்களின் தாய்நாட்டிற்கு மதிப்பளிக்கும் ஒரு கவர்ச்சிகரமான தேர்வாக இருந்தது மட்டுமன்றி, அமெரிக்கா ஒரு பெரிய அரசியல் மாற்றத்தைச் சந்தித்துக் கொண்டிருந்த வேளையில், கடுமையான பொது விமர்சனங்களை எதிர்கொள்ளும் ஒரு பொது ஆளுமைக்கு ஒரு பளபளப்பான கவசமாகவும் செயல்பட்டது.
வெள்ளை மாளிகையை விட்டு வெளியேறிய பிறகு, மிஷெல் ஒபாமாவின் ஆடைத் தேர்வுகள் பாரம்பரிய பாணிகள் மற்றும் பழமைவாத முதல் பெண்மணி தோற்றங்களில் இருந்து விலகி, ஒரு புதிய துணிச்சலான அத்தியாயத்தைக் குறிக்கும் வகையில் மிகவும் கவர்ச்சிகரமான பாணிகளை நோக்கி மாறின. 2018 ஆம் ஆண்டில் அவரது “பிகமிங்” (Becoming) புத்தக வெளியீட்டுப் பயணத்தின் போது இந்த புதிய அணுகுமுறைக்கு பல சான்றுகள் கிடைத்தன. குறிப்பாக, பிரகாசமான மஞ்சள் நிற பலென்சியாகா (Balenciaga) பட்டு ஆடை மற்றும் ஜொலிக்கும் தொடை வரையிலான நீண்ட காலணிகள் (high boots) உலக ஊடகங்களின் தலைப்புச் செய்திகளாக மாறி, உயர் பதவியின் கட்டுப்பாடுகளில் இருந்து அவர் பெற்ற சுதந்திரத்தைப் பறைசாற்றின.
எதிர்பாராத ஆச்சரியம்
இந்த ஆடை வடிவமைக்கப்பட்டது குறித்துத் தனது கணவருக்கு எதுவும் தெரியாது என்று மேடையில் பகிர்ந்ததன் மூலம், மிஷெல் ஒபாமா செவ்வாய்க்கிழமை மீண்டும் ஒருமுறை ஆச்சரியத்தை ஏற்படுத்தினார். மேடையில் பேசிய ஒபாமா தம்பதியினர் இருவரும் உணர்ச்சிவசப்பட்டுக் கண்ணீர் மல்கினர். மிஷெல் ஒபாமா விளக்குகையில், “அவர் மிகவும் நெகிழ்ந்து போயுள்ளார். எனது வடிவமைப்பாளர் மெரிடித் கூப் தேர்ந்தெடுத்த, எனது அம்மாவின் எனக்கு மிகவும் பிடித்தமான இந்த உருவப்படம் கொண்ட அழகான பாவாடை வடிவமைக்கப்பட்ட விஷயம் சில நிமிடங்களுக்கு முன்பு வரை அவருக்குத் தெரியாது,” என்றார்.
தனது தாயாரின் நினைவை இந்த நிகழ்விற்கு ஆடை மூலம் கொண்டு வந்ததன் மூலம், பலரும் தங்களது வாழ்க்கையின் முக்கிய மைல்கல் தருணங்களில் மறைந்த குடும்ப உறுப்பினர்கள் தங்களுடன் இருந்திருக்கலாம் என்று ஏங்கும் உணர்வை மிஷெல் ஒபாமா வெளிப்படுத்தியுள்ளார்.
இந்த ஆண்டின் தொடக்கத்தில், ஒபாமா மையத்தின் கண்காட்சியான “ஓப்பனிங் தி ஒயிட் ஹவுஸ்” (Opening the White House) என்ற பகுதிக்கு மரியன் ராபின்சனின் நினைவாகப் பெயரிடப்படும் என்று அறிவிக்கப்பட்டது, இது ஒபாமாவின் ஜனாதிபதி பாரம்பரியத்தில் அவரது தாயாரின் இடத்தை மேலும் அடிக்கோடிட்டுக் காட்டுகிறது.
இந்த ஆடை குறித்துப் பேசிய முன்னாள் ஜனாதிபதி பராக் ஒபாமா, “நான் இதனால் சற்று நிலைகுலைந்து போயுள்ளேன், ஏனென்றால் நான் எனது மாமியாரை மிகவும் நேசித்தேன். அவர் மிஷெல் மற்றும் கிரெய்க் (மைத்துனர்) ஆகியோருக்கு ஒரு சிறந்த வீட்டை உருவாக்கிக் கொடுத்தார். அது பெரிய வசதிகளுடன் இல்லாவிட்டாலும், மிகுந்த அன்பு, நம்பிக்கை மற்றும் தொலைநோக்கு பார்வையுடன் இருந்தது. என்னைப் பொறுத்தவரை, இந்த நாட்டின் மிகச் சிறந்த மனிதர்களை அவர்கள் பிரதிபலிக்கிறார்கள்,” என்று நெகிழ்ச்சியுடன் குறிப்பிட்டார்.
CNN
