கிளிநொச்சி மாவட்டத்தின் சுற்றுலா அபிவிருத்தி தொடர்பான உபகுழுக் கூட்டம், கிளிநொச்சி மாவட்ட ஒருங்கிணைப்புக் குழுத் தலைவரும் கடற்றொழில் அமைச்சருமான கௌரவ இராமலிங்கம் சந்திரசேகர் அவர்களின் தலைமையில், மாவட்ட அரசாங்க அதிபர் எஸ். முரளிதரன் அவர்களின் பங்குபற்றுதலுடன் கிளிநொச்சி மாவட்ட செயலக மாநாட்டு மண்டபத்தில் நடைபெற்றது.
இக் கலந்துரையாடலில் வட மாகாண சுற்றுலா பணியகத்தின் தலைவர் ஜெகநாதன் விவேகானந்தன்,பிரதேச செயலாளர்கள், திணைக்களத் தலைவர்கள் மற்றும் பல்வேறு அரச துறை அதிகாரிகள் கலந்து கொண்டனர்.
இதன் போது வன்னேரிக்குளம், கிளிநொச்சிக் குளம் உள்ளிட்ட மாவட்டத்தின் முக்கிய சுற்றுலா தளங்களின் அபிவிருத்தி தொடர்பான முன்மொழிவுகள், சுற்றுலாப் பயணிகளை அதிகளவில் கவரக்கூடிய வசதிகளை உருவாக்குதல், சுற்றுச்சூழலுக்கு பாதிப்பு ஏற்படாத வகையில் நிலையான சுற்றுலா அபிவிருத்தி திட்டங்களை நடைமுறைப்படுத்துதல் மற்றும் உள்நாட்டு, வெளிநாட்டு முதலீட்டாளர்களை ஈர்ப்பதற்கான வழிமுறைகள் குறித்து விரிவாக கலந்துரையாடப்பட்டது.
மேலும், கிளிநொச்சி மாவட்டத்தில் இயற்கை வளங்கள் மற்றும் நீர்நிலைகளை மையமாகக் கொண்டு சுற்றுலா மையங்களை உருவாக்குவதற்கான சாத்தியக்கூறுகள், படகு சவாரி, பொழுதுபோக்கு பூங்காக்கள், ஓய்வு விடுதிகள் மற்றும் சுற்றுலாப் பயணிகளுக்கான அடிப்படை வசதிகளை மேம்படுத்துவது தொடர்பிலும் கவனம் செலுத்தப்பட்டது.
