கொழும்பு: கத்தார் எயார்வேஸ் (Qatar Airways) நிறுவனம், தோஹா மற்றும் கொழும்புக்கு இடையிலான தனது முழுமையான விமான சேவைகளை ஜூலை 1ஆம் திகதி முதல் மீண்டும் ஆரம்பித்துள்ளதுடன், தினசரி ஐந்து விமாண சேவைகளை நடத்தும் தனது கால அட்டவணையை மறுசீரமைத்து இலங்கையுடனான வான்வழி இணைப்பை பலப்படுத்தியுள்ளது.
இந்தச் சேவை மறுசீரமைப்பின் மூலம், இந்நிறுவனம் கட்டுநாயக்க பண்டாரநாயக்க சர்வதேச விமான நிலையத்திற்கு (BIA) வாராந்தம் மொத்தம் 35 விமான சேவைகளை இயக்கவுள்ளது. இது பயணிகளுக்கு அதிக நெகிழ்வுத்தன்மையையும், தோஹாவில் உள்ள அதன் பிரதான மையத்தின் ஊடாக தடையற்ற உலகளாவிய இணைப்புகளையும் வழங்கும்.
இந்த முழு அளவிலான விமான சேவைகளின் மீள்வருகையானது, இலங்கைக்கும் மத்திய கிழக்கு, ஐரோப்பா, வட அமெரிக்கா மற்றும் அதற்கு அப்பாலுள்ள முக்கிய நாடுகளுக்கும் இடையிலான சுற்றுலாத் துறை, வணிகப் பயணங்கள் மற்றும் சரக்குக் போக்குவரத்து (Cargo movement) ஆகியவற்றை மேலும் ஊக்குவிக்கும் என எதிர்பார்க்கப்படுகிறது.
விமான நிலைய அதிகாரிகள் இந்த விமான சேவைகளின் அதிகரிப்பை வரவேற்றுள்ளதுடன், இந்த விரிவாக்கப்பட்ட கால அட்டவணையானது வான்வழி இணைப்பை மேலும் மேம்படுத்துவதோடு பண்டாரநாயக்க சர்வதேச விமான நிலையத்தின் ஊடான பயணிகள் போக்குவரத்தின் தொடர்ச்சியான வளர்ச்சிக்கு உறுதுணையாக அமையும் என்றும் குறிப்பிட்டுள்ளனர்.
