டெல்டா ஏர்லைன்ஸ் (Delta Air Lines) நிறுவனத்தின் விமானம் ஒன்று கடுமையான வான்சுழற்சியில் (severe turbulence) சிக்கியதில், இருபதுக்கும் மேற்பட்ட பயணிகளும் விமானப் பணியாளர்களும் காயமடைந்து மருத்துவமனையில் அனுமதிக்கப்பட்டதை அடுத்து, அந்த நிறுவனத்திற்கு எதிராக வழக்குத் தொடரப்பட்டுள்ளது.
கடந்த 2025 ஜூலை 30 அன்று, அமெரிக்காவின் யூட்டா (Utah) மாநிலத்தில் உள்ள சால்ட் லேக் சிட்டி சர்வதேச விமான நிலையத்திலிருந்து ஆம்ஸ்டர்டாம் ஷிபோல் (Amsterdam Schiphol) விமான நிலையம் நோக்கிப் பறந்த விமானமே இவ்வாறு கடுமையான வான்சுழற்சியை எதிர்கொண்டது. வயோமிங் (Wyoming) வான்பரப்பில் நேரிட்ட இந்தச் சம்பவம் சுமார் 2.5 நிமிடங்கள் நீடித்ததுடன், இதனால் விமானம் மினசோட்டா (Minnesota) மாநிலத்திற்கு அவசரமாகத் திருப்பி விடப்பட்டது. விமானம் தரையிறங்கியதும் 25 பேர் சிகிச்சைக்காக மருத்துவமனைகளுக்கு அழைத்துச் செல்லப்பட்டதாக டெல்டா ஏர்லைன்ஸ் உறுதிப்படுத்தியுள்ளது.
தற்போது, அதில் காயமடைந்த 20 பயணிகள் இணைந்து அந்நிறுவனத்தின் மீது வழக்குத் தொடர்ந்துள்ளனர். இடியுடன் கூடிய புயல் மழைக்கு மிக அருகில் விமானிகள் “அலட்சியமாக விமானத்தைச் செலுத்தியதே” தங்களைக் கடுமையான வான்சுழற்சிக்கு உள்ளாக்கியதாக அவர்கள் குற்றம் சாட்டியுள்ளனர். ‘சால்ட் லேக் ட்ரிபியூன்’ (Salt Lake Tribune) நாளிதழின்படி, கடந்த வாரம் யூட்டாவின் 3வது மாவட்ட நீதிமன்றத்தில் இந்த வழக்குத் தாக்கல் செய்யப்பட்டுள்ளது.
பாதிக்கப்பட்ட பயணிகள் சார்பில் முன்னிலையாகும் ஏவியேஷன் லா குரூப் (Aviation Law Group) வழக்கறிஞரான கேசி டுபோஸ் (Casey DuBose) நீதிமன்றத் தாக்கலில் குறிப்பிடுகையில், “டெல்டா நிறுவனத்திடம் வானிலையைக் கணிக்கும் கருவிகள் இருந்தன; இந்த மோசமான வானிலையைத் தவிர்ப்பதற்கான வழிகளும் இருந்தன. ஆனால் அவர்கள் எச்சரிக்கைகளைப் பொருட்படுத்தாமல் புறக்கணிக்க முடிவு செய்தனர்” என்று தெரிவித்துள்ளார்.
மேலும், அந்தத் தாக்கலில் பயணிகள் இந்தச் சம்பவத்தை “2.5 நிமிட பயங்கரம்” என்று விவரித்துள்ளனர். “இருக்கை வார்ப்புகளை (seatbelts) அணியாத பயணிகள், விமானத்தின் கூரையில் மோதி, உட்புறப் பகுதிகளை உடைக்கும் அளவுக்கு அதிவேகத்துடன் தூக்கி வீசப்பட்டனர்” என அந்த வழக்குக் மனுவில் கூறப்பட்டுள்ளது. இதனால் பயணிகளுக்குத் தலைக்காயம், முதுகெலும்புக் காயம், மூளை அதிர்ச்சி, வெட்டுக் காயங்கள் மற்றும் எலும்பு முறிவுகள் ஏற்பட்டுள்ளன.
விமானம் வான்சுழற்சியில் சிக்கிய தருணத்தில், பயணிகளுக்கான ‘இருக்கை வார்ப் பூட்டு’ (seatbelt sign) ஒளிரவிடப்பட்டிருக்கவில்லை என்பதும் குறிப்பிடத்தக்கது.
தேசிய போக்குவரத்து பாதுகாப்பு வாரியம் (NTSB) இச்சம்பவம் குறித்து விசாரணை நடத்தி, விமானிகள் எதிர்பாராத விதமாகவே புயலில் சிக்கிக் கொண்டனர் எனத் தீர்மானித்தது. எனினும், தேசிய வானிலை சேவை மையம் (NWS) அந்த வான்வழியில் இடியுடன் கூடிய பலத்த புயல் வீசக்கூடும் என்று ஏற்கனவே எச்சரிக்கை விடுத்திருந்ததாக வாதி தரப்பு சுட்டிக்காட்டியுள்ளது. விமானிகள் அந்த வான்வழியின் மோசமான நிலை குறித்த பல எச்சரிக்கைகளையும், சால்ட் லேக் சிட்டியின் வான் போக்குவரத்து கட்டுப்பாட்டாளரின் (air traffic controller) எச்சரிக்கைகளையும் முற்றாக நிராகரித்துவிட்டதாக வழக்குக் கூறுகிறது.
விமானிகள் தங்கள் ரேடார் மூலமும், நேரடியாகப் பார்த்தும் மோசமான வானிலையை உறுதிப்படுத்திய பிறகும், ஆபத்தான பகுதிக்குள்ளேயே தொடர்ந்து பயணித்ததாகக் குற்றம் சாட்டப்பட்டுள்ளது.
அதுமட்டுமன்றி, வான்சுழற்சி ஏற்பட்ட உடனடியாக எடுக்கப்பட்ட முடிவுகளையும் பயணிகள் கேள்விக்குள்ளாக்கியுள்ளனர். சம்பவத்திற்குப் பிறகு விமானத்தை அருகிலுள்ள சால்ட் லேக் சிட்டி அல்லது டென்வர் (Denver) நோக்கித் திருப்பியிருக்க வேண்டும், ஆனால் அதற்குப் பதிலாக மினசோட்டாவிற்கு அனுப்பியதால், ஏற்கனவே அச்சமடைந்திருந்த பயணிகளின் பயண நேரம் மேலும் 90 நிமிடங்கள் நீடித்ததாக அவர்கள் வாதிடுகின்றனர். மினியாபோலிஸ்-செயின்ட் பால் (Minneapolis-St. Paul) சர்வதேச விமான நிலையம் டெல்டா நிறுவனத்தின் பிரதான முனையமாக (hub) இருந்ததால், விமானப் பராமரிப்புச் செலவு மற்றும் பயணிகளுக்கான மாற்று முன்பதிவுச் செலவுகளை மிச்சப்படுத்தவே டெல்டா நிறுவனம் இந்த முடிவை எடுத்ததாக வழக்குத் தரப்பில் குற்றம் சாட்டப்பட்டுள்ளது.
