CNBC
எலிஸ் பர்ன்ஸ் (Elyse Burns) கடந்த 2019 ஆம் ஆண்டில் டியூக் பல்கலைக்கழகத்தின் (Duke University) சட்டக் கல்லூரியில் சேர்ந்தார். அங்கு ஒரு வருடத்திற்கு 63,000 டாலர் கல்விக்கட்டணம் மற்றும் அவரது வாழ்க்கைச் செலவுகளைக் கவனிப்பதற்காக ஃபெடரல் மாணவர் கடன்களைப் (Federal student loans) பெற்றிருந்தார். சட்டத்துறையில் ஒரு வாழ்க்கையைத் தேர்ந்தெடுப்பது ஒரு நடைமுறை ரீதியான முடிவாகத் தோன்றினாலும், அவர் தனது பட்டப்படிப்பை முடிப்பதற்கு முன்பே, தான் ஒருபோதும் வழக்கறிஞராகப் பணியாற்றப் போவதில்லை என்பதை உறுதியாகத் தெரிந்திருந்தார்.
“ஒரு வழக்கறிஞராக இருந்தால் நல்ல வருமானம் ஈட்ட முடியும், ஆனால் ஒரு கலைஞராக இருந்தால் அவ்வாறு சம்பாதிக்க முடியாது என்ற எண்ணமும் பொதுவான ஒரு முன்முடிவும் (Stereotype) எல்லாரிடமும் இருப்பதை நான் உணர்கிறேன்” என்கிறார் இந்த 28 வயது யுவதி.
முன்னதாக கடந்த 2015 ஆம் ஆண்டில், பர்ன்ஸ் தனது 18 ஆவது பிறந்தநாளின் போது ஒரு வங்கி கணக்கைத் தொடங்கி, அதனை ‘எட்ஸி’ (Etsy) விற்பனையாளர் கணக்குடன் இணைத்து, கையால் வரையப்பட்ட கேன்வாஸ் ஓவியங்களை விற்கத் தொடங்கினார். தொடங்கிய ஒரே வாரத்திற்குள் இரண்டு ஓவியங்கள் விற்பனையாகின. 2020 ஆம் ஆண்டளவில், அவரது ‘எலிஸ் பிரையன் டிசைன்’ (Elyse Breanne Design) என்ற நிறுவனம் 360,000 டாலர்கள் வரை விற்பனை செய்து, ஆறு இலக்க வருவாயை ஈட்டத் தொடங்கியது.
சட்டக் கல்லூரி படிப்பை முடித்த பிறகு, அவர் தனது முழு கவனத்தையும் இந்த வணிகத்தில் செலுத்தினார். தற்பொழுது இவரது நிறுவனம் ஸ்டிக்கர்கள், வண்ணமயமாக்கல் புத்தகங்கள், எழுதுபொருட்கள் (Stationery) மற்றும் வீட்டு உபயோகப் பொருட்களை விற்பனை செய்து வருகிறது. அதன் விளைவாக, செப்டம்பர் 2023க்குள், தான் வழக்கறிஞர் ஆவதற்கான ‘பார் தேர்வு’ (Bar exam) எழுதாமலேயே, தனது சட்டக் கல்விக்காக வாங்கிய முழு கடனையும் அவர் செலுத்தி முடித்தார்.
தான் சட்டத்துறையைத் தனது வாழ்வாதாரமாகத் தேர்ந்தெடுக்கவில்லை என்றாலும், சட்டக் கல்லூரிக்குச் சென்றதற்காக பர்ன்ஸ் ஒருபோதும் வருத்தப்படவில்லை. அது அவருக்கும் அவரது வணிகத்தின் வெற்றிக்கும் ஒரு முக்கியப் பயணமாக இருந்ததாகவே அவர் கருதுகிறார்.
“நான் மிகவும் அதிர்ஷ்டசாலி, நான் இந்த நிலையை அடைந்ததற்குக் காரணம் நான் சட்டக் கல்லூரிக்குச் சென்றதும் ஒரு பகுதியாகும். நான் சட்டக் கல்லூரி படித்துக்கொண்டே ஒரு தொழிலை நடத்துவது குறித்து ‘டிக் டாக்’ (TikTok) தளத்தில் பகிர்ந்துகொண்ட விஷயங்கள் தான், ஆரம்பத்தில் எனது வணிகம் இவ்வளவு பெரிய அளவில் பிரபலமடையக் காரணமாக இருந்தது” என்கிறார் அவர்.
வழக்கறிஞர் பணிக்கு மேல் கலை வணிகத்தைத் தேர்ந்தெடுக்கக் காரணம்
பர்ன்ஸ் சட்டக் கல்லூரியைத் தொடங்கியபோது அவரது கலை வணிகம் ஒரு பகுதி நேரத் தொழிலாகவே (Side hustle) இருந்தது. கோடை விடுமுறையில் அவர் பல்கலைக்கழகத்தின் சட்டக் கிளினிக் ஒன்றில் பணிபுரிந்த போதிலும், அவரது மனம் எப்போதும் கலையின் பக்கமே ஈர்க்கப்பட்டது.
“நான் சட்டரீதியாகச் செய்ய விரும்பியதைத்தான் அங்கு செய்துகொண்டிருந்தேன், ஆனாலும் என் மனம் ‘அப்பாடா, இந்த வேலை எப்போது முடியும், நாம் எப்போது ஓவியம் வரையலாம்’ என்றுதான் ஏங்கியது” என்கிறார் பர்ன்ஸ்.
அவர் 2020 இல் டிக் டாக் தளத்தில் இணைந்து தனது படைப்புகளைப் பதிவிடத் தொடங்கினார். மேலும் ‘ஃபேர்’ (Faire) என்ற தளம் மூலம் தனது வடிவமைப்புகளை மொத்தமாக (Wholesale) சில்லறை விற்பனையாளர்களுக்கு விற்கத் தொடங்கினார். அப்போதுதான் வணிகம் மிக வேகமாக வளரத் தொடங்கியது. சட்டக் கல்வி படித்துக்கொண்டே கலை வணிகத்தையும் நடத்துவது பற்றிய அவரது பதிவுகள் டிக் டாக் பார்வையாளர்களிடையே பெரும் வரவேற்பைப் பெற்றன.
தனது கலை வணிகத்தின் மூலம் ஒரு நிலையான வருமானம் கிடைக்கத் தொடங்கியதும், பர்ன்ஸ் தனது சட்டத் துறை சார்ந்த எதிர்காலத்தை மறுபரிசீலனை செய்யத் தொடங்கினார். கார்ப்பரேட் சட்டத்துறையில் பணிபுரிந்து அதிக சம்பளம் பெற்று கடனை விரைவாக அடைப்பது அல்லது பொதுநலச் சட்டத்துறையில் இணைந்து 10 ஆண்டுகள் பொதுச் சேவை மூலம் கடன் தள்ளுபடி பெறுவது ஆகிய இரண்டு வழிகளுமே அவருக்கு உகந்ததாகத் தோன்றவில்லை.
சட்டப் பணியைத் தவிர்த்துவிட்டு முழுநேர வணிகத்தில் ஈடுபடும் தனது யோசனையை அவர் தனது கணவரிடம் (அப்போதைய காதலன்) கூறினார். சட்டத்துறையில் பணியாற்றினால் தான் மனச்சோர்வடைவதோடு, அது தனது வாழ்க்கையின் மகிழ்ச்சியையே பறித்துவிடும் என்று அவர் உணர்ந்தார். அவர் ஆர்வமாக இருக்கும் ஒரு துறையைத் தேர்ந்தெடுப்பதற்கு அவரது கணவர் முழு ஆதரவை வழங்கியதோடு, கடனைத் திருப்பிச் செலுத்தும் அவரது திறமையின் மீதும் நம்பிக்கை வைத்தார். இருப்பினும், தான் தொடங்கிய சட்டப் படிப்பை முடித்தே தீர வேண்டும் என்பதில் பர்ன்ஸ் உறுதியாக இருந்தார்.
“இந்தக் கல்விப் பட்டம் எனக்குப் பெரிய அளவில் உதவப் போவதில்லை என்று தெரிந்திருந்தாலும், நான் அதைச் செய்து முடிக்க வேண்டும் என்பதில் உறுதியாக இருந்தேன்” என்கிறார் பர்ன்ஸ்.
அவர் வாங்கிய கடன்கள் அனைத்தும் ஃபெடரல் கடன்கள் என்பதால், அவர் 2022 இல் பட்டமளித்தபோது பெருந்தொற்று காலத்தின் வட்டி இல்லாத சலுகைக் காலத்தில் இருந்தன. இது வட்டி ஏறுவதற்கு முன்பாகவே கடனை விரைவாக அடைக்க அவருக்குப் பெரும் ஊக்கமளித்தது. 2023 ஆம் ஆண்டில், அவர் 75,000 டாலருக்கும் அதிகமான நிலுவைக் கடன்களை முழுமையாகச் செலுத்தி முடித்தார்.
தொடர்ந்து அதிவேகமாக வளரும் வணிகம்
2025 ஆம் ஆண்டில், ‘எலிஸ் பிரையன் டிசைன்’ நிறுவனம் பல்வேறு இணையத்தளங்கள் மூலமாகவும், 2022 இல் வட கரோலினாவின் டர்ஹாமில் அவர் திறந்த ‘மில் அண்ட் மெடோ’ (Mill and Meadow) என்ற எழுதுபொருள் கடை மூலமாகவும் சுமார் 4.6 மில்லியன் டாலர் விற்பனையை ஈட்டியுள்ளது. இந்த நிறுவனத்தின் முழு உரிமையாளரான பர்ன்ஸ், வணிகத்தை விரிவுபடுத்தும் நோக்கில் அதன் லாபத்தை மீண்டும் தொழிலிலேயே முதலீடு செய்து வருகிறார். தற்பொழுது இந்நிறுவனத்தில் 18 முழுநேர ஊழியர்கள் பணிபுரிகின்றனர்.
ஒரு சிறு தொழில்முனைவோராக பர்ன்ஸ் பல சவால்களை எதிர்கொண்டுள்ளார், குறிப்பாகத் தனது வணிகம் வளர வளர ஒரு நிறுவனத்தை எவ்வாறு நிர்வகிப்பது என்பதைக் கற்றுக்கொள்வது அவருக்குப் பெரிய சவாலாக இருந்தது. “வணிகம் வளரும்போது தேவைகளும் தொடர்ந்து விரிவடைகின்றன, இது ஒரு நல்ல சவால்தான்” என்கிறார் அவர்.
2021 இல் அவர் கிடங்கு இடத்தை (Warehouse space) வாடகைக்கு எடுக்கத் தொடங்கியதிலிருந்து, வணிக வளர்ச்சிக்கு ஏற்பப் பெரிய இடங்களுக்கு மாற வேண்டியிருந்தது. பர்ன்ஸின் அடுத்த இலக்கு, தனது தயாரிப்புகளை இன்னும் பெரிய சில்லறை விற்பனை நிலையங்களுக்குக் கொண்டு செல்வதாகும். தற்பொழுது, வாடிக்கையாளர்கள் அவரது வடிவமைப்புகளை ‘பிளிக் ஆர்ட் மெட்டீரியல்ஸ்’ (Blick Art Materials) கடைகளிலும், சுமார் 40 ‘ஹால்மார்க்’ (Hallmark) கிளைகளிலும் பெற்றுக் கொள்ள முடியும்.
சில நேரங்களில் பர்ன்ஸ் அதிக வேலைப்பளுவினால் சோர்வடையும் போது, யாராவது தனது நிறுவனத்தைக் கையகப்படுத்தக் கூடாதா என்று நினைப்பதுண்டு. ஆனால், உண்மையில் தனது நிறுவனத்தை விற்கும் வாய்ப்பு வந்தால், தான் அதைச் செய்ய மாட்டார் என்றே கூறுகிறார். “ஏனென்றால், இதைத் தவிர வேறு என்ன செய்வது என்று எனக்குத் தெரியவில்லை. இதில் எனது பெயர் பொறிக்கப்பட்டுள்ளது. இதை விற்றாலும், மீண்டும் இதே போன்ற மற்றொரு தொழிலைத் தான் நான் தொடங்குவேன்” என்று கூறும் எலிஸ் பர்ன்ஸ், இனி வரும் காலத்திலும் தனது இந்த கலைப் பயணத்தைத் தொடர்ந்து முன்னெடுத்துச் செல்ல திட்டமிட்டுள்ளார்.
