நிதியியல் குற்றங்களுக்கு எதிரான புதிய சட்டங்கள் சுயாட்சியைப் பலவீனப்படுத்தும் அபாயத்தைக் கொண்டுள்ளன: நாடாளுமன்ற உறுப்பினர்கள் எச்சரிக்கை

•  நாடாளுமன்ற உறுப்பினர் கஜேந்திரகுமார் பொன்னம்பலம் மற்றும்  நாடாளுமன்ற உறுப்பினர் சாணக்கியன் ராசமாணிக்கம் ஆகியோரின் வாதங்கள்.

• பல விதந்துரைகள் FATF இன் இடர்-அடிப்படையிலான (risk-based) கட்டமைப்பை மீறி அமைந்துள்ளதாக வாதம்.

• நீதித்துறை மற்றும் நாடாளுமன்றத்தின் அதிகாரங்களை ஒடுக்கி, நிறைவேற்று அதிகாரத்தை வலுப்படுத்துவதற்காக FATF பயன்படுத்தப்படுவதாக குற்றச்சாட்டு.

• நிதியியல் புலனாய்வுப் பிரிவுக்கு (FIU) நிர்வாக வழிகாட்டல்கள் மூலம் முக்கிய இணக்கத்தன்மை வரம்புகளை (compliance thresholds) நிர்ணயிக்கும் அதிகாரம் வழங்கப்பட்டுள்ளது.

• விரிவுபடுத்தப்பட்ட விசாரணை அதிகாரங்களால் சிவில் சமூக அமைப்புகள், தன்னார்வத் தொண்டு நிறுவனங்கள் (NGOs) மற்றும் ஊடகவியலாளர்கள் பாதிக்கப்படக்கூடிய அபாயம் உள்ளதாகக் சுட்டிக்காட்டு.

• முன்னர் நீதிமன்ற அனுமதி அல்லது போதிய ஆதாரங்கள் இன்றி, சொத்துக்களை முடக்குவதற்கு காவல்துறைக்கு வழங்கப்படும் அதிகாரம் குறித்து கேள்வி.

இலங்கையின் சட்டவிரோத பணப்பரிமாற்றத்திற்கு எதிரான கட்டமைப்பை வலுப்படுத்துவதற்கான முயற்சிகள், நேற்று நாடாளுமன்றத்தில் ஒரு பரந்த அரசியலமைப்பு விவாதத்தைத் தோற்றுவித்துள்ளன. முன்மொழியப்பட்டுள்ள மூன்று முக்கிய நிதியியல் குற்ற மசோதாக்களின் விதந்துரைகள், சர்வதேச தரநிலைகளுக்கு அப்பாற்பட்டு நிறைவேற்று மற்றும் நிர்வாக அதிகாரங்களை விரிவுபடுத்தக்கூடும் என எதிர்க்கட்சி நாடாளுமன்ற உறுப்பினர்கள் எச்சரித்துள்ளனர்.

சட்டவிரோத பணப்பரிமாற்ற தடுப்புச் சட்டம், நிதிப் பரிவர்த்தனை அறிக்கைச் சட்டம் மற்றும் பயங்கரவாதத்திற்கு நிதியளிப்பதைத் தடுப்பதற்கான மாநாட்டுச் சட்டம் ஆகியவற்றைத் திருத்தும் இந்த  சட்டமூலங்கள் , நிதி நடவடிக்கை பணிக்குழுவின் (FATF) தரநிலைகளுக்கு இணங்க இலங்கையின் சட்டவிரோத பணப்பரிமாற்ற  எதிர்ப்பு மற்றும் பயங்கரவாத எதிர்ப்பு நிதியளிப்பு (AML/CFT) கட்டமைப்பை வலுப்படுத்தும் முயற்சிகளின் ஒரு பகுதியாகும்.

இந்த சட்டமூலங்கள் 154 ஆதரவு வாக்குகளுடன் விசேட பெரும்பான்மையால் நிறைவேற்றப்பட்டன, அதேவேளை இதற்கு எதிராக இரண்டு வாக்குகள் மாத்திரமே அளிக்கப்பட்டன.

நாடாளுமன்ற விவாதத்தின் பெரும்பகுதி நீர்கொழும்பு சிறைச்சாலை வன்முறை மற்றும் கடந்தகால அரசாங்கங்களின் முறைகேடுகள் குறித்தே அமைந்திருந்த போதிலும், ஒரு சில எதிர்க்கட்சி நாடாளுமன்ற உறுப்பினர்கள் இந்த முன்மொழியப்பட்ட சட்டங்களின் அரசியலமைப்பு ரீதியான தாக்கங்கள் குறித்து கவனம் செலுத்தினர். பல விதந்துரைகள் நாடாளுமன்றம் மற்றும் நீதித்துறையின் அதிகாரத்தை ஒழுங்குபடுத்துபவர்கள், புலனாய்வாளர்கள் மற்றும் நிறைவேற்று அதிகாரம் கொண்ட தரப்பினரை நோக்கி நகர்த்துவதாக அவர்கள் வாதிட்டனர்.

இலங்கை தனது நிதியமைப்பின் ஒருமைப்பாட்டைப் பாதுகாப்பதற்கும் FATF பரிந்துரைகளுக்கு முழுமையாக இணங்குவதற்கும் கடமைப்பட்டுள்ளது என்று தமிழ்தேசிய மக்கள் முன்னணியின் நாடாளுமன்ற உறுப்பினர் கஜேந்திரகுமார் பொன்னம்பலம் தெரிவித்தார். அவ்வாறு செய்யத் தவறினால் முதலீட்டாளர்களின் நம்பிக்கை குலையக்கூடும், கடன் வாங்கும் செலவுகள் அதிகரிக்கலாம் மற்றும் நாடு மீண்டும் சர்வதேசத்தின் தீவிர கண்காணிப்புக்கு உள்ளாகலாம் என அவர் எச்சரித்தார்.

“இந்தச் சபையின் முன்னால் உள்ள கேள்வி என்னவென்றால், இந்த மசோதாக்கள் உண்மையிலேயே FATF தரநிலைகளை நடைமுறைப்படுத்துகின்றனவா அல்லது FATF அமைப்பு கோராத மற்றும் பரிந்துரைக்காத அதிகாரங்களை வழங்குவதற்காக அதன் பெயர் ஒரு நியாயப்படுத்துதலாகப் பயன்படுத்தப்படுகிறதா என்பதுதான்,” என்று அவர் கூறினார்.

FATF பரிந்துரைகள் எப்பொழுதும் இலக்கு வைக்கப்பட்ட, விகிதாசார மற்றும் இடர்-அடிப்படையிலான ஒழுங்குமுறைகளையே கோருகின்றன, ஆனால் இந்த மசோதாக்களின் பல விதந்துரைகள் பரந்த நிர்வாகப் தற்துணிவு அதிகாரங்களை (administrative discretion) நம்பியிருக்கின்றன, அதே நேரத்தில் முக்கியமான தேவைகளை ஒழுங்குபடுத்துபவர்களால் பின்னர் வெளியிடப்படும் விதிகள் மற்றும் வழிகாட்டல்கள் மூலம் தீர்மானிப்பதற்கு விட்டுவிடுகின்றன என்று பொன்னம்பலம் வாதிட்டார்.

அவரது விமர்சனத்தின் மையமாக நிதியியல் புலனாய்வுப் பிரிவின் (FIU) விரிவாக்கப்பட்ட பங்கு அமைந்திருந்தது. குற்றங்களைச் சட்டமாக்குமாறு நாடாளுமன்றம் கோரப்படும் அதேவேளை, முக்கிய பரிவர்த்தனை வரம்புகள், இணக்கத்தன்மை கடப்பாடுகள் மற்றும் பிற முக்கிய தேவைகள் ஆகியவற்றை FIU இன் தலைவரால் வழங்கப்படும் நிர்வாக வழிகாட்டல்கள் மூலம் பின்னர் தீர்மானிக்கும் நிலை காணப்படுவதாக அவர் கூறினார்.

“இன்று குற்றங்களுக்கு ஒப்புதல் அளிக்குமாறு நாடாளுமன்றம் கேட்கப்படுகிறது, அதே நேரத்தில் சட்டத்தின் உள்ளடக்கத்தை நாளை நிர்வாக வழிகாட்டல்கள் மூலம் தீர்மானிக்க வழிவிடப்படுகிறது. ஒரு அரசியலமைப்பு ஜனநாயகத்தில் சட்டங்கள் இவ்வாறு இயற்றப்படக் கூடாது,” என்று அவர் கூறினார்.

விசாரணை அதிகாரங்கள், தகவல் பகிர்வு மற்றும் சொத்து முடக்கம் தொடர்பான விதந்துரைகள் குறித்தும் கேள்வி எழுப்பிய பொன்னம்பலம், இந்த மசோதாக்கள் அர்த்தமுள்ள நீதித்துறை பாதுகாப்புகளைக் குறைத்து, நிறைவேற்று அதிகாரத்தின் தற்துணிவை விரிவுபடுத்துவதாக வாதிட்டார். இதன் தாக்கங்கள் நிதியியல் குற்ற அமலாக்கத்திற்கு அப்பாலும் நீடிக்கும் என்று அவர் எச்சரித்தார்.

“பாதுகாப்பின் பெயரால் வழங்கப்படும் அதிகாரங்கள் அவற்றின் அசல் நோக்கத்துடன் மட்டும் நின்றுவிடுவதில்லை என்பதை வரலாறு நமக்குக் கற்பிக்கிறது,” என்று அவர் கூறினார். “இன்று, இந்த அதிகாரங்கள் சிவில் சமூக அமைப்புகளுக்கு எதிராகப் பயன்படுத்தப்படலாம். நாளை, அவை ஊடகவியலாளர்களுக்கு எதிராகத் திரும்பலாம். அதற்கு அடுத்த நாள், அது வணிகங்களுக்கு எதிராக மாறலாம்.”

திறமையான சட்ட அமலாக்கத்திற்கும் தனிநபர் சுதந்திரத்திற்கும் இடையிலான அரசியலமைப்பு சமநிலையையும், நீதித்துறை மேற்பார்வை மற்றும் உரிய சட்ட நடைமுறைகளையும் பாதுகாக்கும் அதேவேளையில், இந்தச் சட்டம் FATF தரநிலைகளை உண்மையாகப் பிரதிபலிப்பதை நாடாளுமன்றம் உறுதி செய்ய வேண்டும் என்று அவர் வலியுறுத்தினார்.

இலங்கைத் தமிழரசுவுக் கட்சியின் (ITAK) நாடாளுமன்ற உறுப்பினர் சாணக்கியன் ராசமாணிக்கமும் ஊழல் எதிர்ப்பு மற்றும் பணச்சலவை எதிர்ப்புச் சட்டங்களை வலுப்படுத்துவதை ஆதரித்தார், ஆனால் நீதிமன்றத்தின் முன்கூட்டிய அனுமதியின்றி சொத்துக்களை முடக்குவதற்கு காவல்துறை அதிகாரிகளுக்கு அனுமதி அளிக்கும் விதந்துரைகள் குறித்து கேள்வி எழுப்பினார்.

முன்மொழியப்பட்ட திருத்தங்கள், காவல்துறை அதிகாரிகள் ஆரம்பத்தில் 14 நாட்களுக்கு சொத்து முடக்க உத்தரவுகளை பிறப்பிக்கவும், பின்னர் நீதித்துறை பரிசீலனையைப் பெறுவதற்கு முன்னர் அந்த கட்டுப்பாடுகளை நீடிக்கவும் அனுமதிக்கும் என்றும், முறையான பாதுகாப்புகள் இல்லாவிட்டால் இது துஷ்பிரயோகங்களுக்கு வழிவகுக்கும் என்றும் அவர் கூறினார்.

“ஒரு குறிப்பிட்ட சொத்துக்கு தொடர்பு இருப்பதாக ஒரு காவல்துறை அதிகாரி கருதினால், போதுமான ஆதாரங்கள் இல்லாவிட்டாலும், நீதிமன்றத்திற்குச் செல்லாமல் அந்தச் சொத்துக்களை முடக்கும் அதிகாரம் வழங்கப்படுகிறது,” என்று அவர் கூறினார்.

இந்தச் சட்டத்தை எதிர்கால அரசாங்கங்களின் பின்னணியிலும் பார்க்க வேண்டும் என்று ராசமாணிக்கம் குறிப்பிட்டார்.

“ஊழலைத் தடுப்பதற்கான சட்டங்களைக் கொண்டு வருவதை நாங்கள் ஆதரிக்கிறோம். பணச்சலவைகளைத் தடுப்பதற்கான சட்டங்களைக் கொண்டு வருவதை நாங்கள் ஆதரிக்கிறோம். ஆனால் இந்தச் சட்டங்களின் கட்டுப்பாடு தவறான கைகளில் சிக்கினால், எப்போதாவது ஒரு நாள் தேசிய மக்கள் சக்தி (NPP) ஆட்சியை இழந்தால் என்ன நடக்கும் என்று கற்பனை செய்து பாருங்கள்,” என்று அவர் கூறினார்.

இந்த விவாதம், நெருக்கடிக்குப் பிந்தைய இலங்கையின் ஒழுங்குமுறை சீர்திருத்தங்களுக்குள் நிலவும் பதற்றத்தை வெளிப்படுத்தியுள்ளது: நிறைவேற்று அதிகாரம், நாடாளுமன்றம் மற்றும் நீதித்துறை ஆகியவற்றிற்கு இடையிலான அதிகாரச் சமநிலையை அடிப்படை ரீதியாக மாற்றாமல், நிதியியல் குற்ற அமலாக்கத்தை எவ்வாறு வலுப்படுத்துவது என்பதே அந்த சவாலாகும்.

இலங்கை FATF தரநிலைகளுக்கு இணங்க வேண்டியதன் அவசியத்தை இரு நாடாளுமன்ற உறுப்பினர்களும் மறுக்கவில்லை. அவர்களின் வாதம் குறுகியதானது, ஆனால் அரசியலமைப்பு ரீதியாக முக்கியத்துவம் வாய்ந்தது: சர்வதேச ஒழுங்குமுறை கடப்பாடுகள், அந்த தரநிலைகள் கோருவதற்கும் அப்பால் நிறைவேற்று மற்றும் நிர்வாக அதிகாரங்களை நிரந்தரமாக விரிவுபடுத்துவதற்கான ஒரு கருவியாக மாறக்கூடாது என்பதே அதுவாகும்.