இந்த ஆண்டுக்கான 2.5 மில்லியன் சுற்றுலாப் பயணிகளின் வருகை இலக்கை நாடு இன்னும் எட்டக்கூடிய நிலையிலேயே உள்ளது என்றும், இதன் மூலம் 3.5 பில்லியன் முதல் 4 பில்லியன் அமெரிக்க டொலர் வரையிலான வருவாயை ஈட்டுவதை நோக்கமாகக் கொண்டுள்ளோம் என்றும் இலங்கையின் சுற்றுலாத் துறை அதிகாரிகள் மீண்டும் உறுதிப்படுத்தியுள்ளனர்.
உலகளாவிய சவால்கள் மற்றும் பிராந்திய புவிசார் அரசியல் பதற்றங்கள் காரணமாக முன்னதாக வான்வெளிகள் மூடப்பட்டமை மற்றும் விமானப் பயணங்கள் ரத்துச் செய்யப்பட்டமை போன்ற தடைகள் ஏற்பட்ட போதிலும், சுற்றுலாத் துறை அமைச்சகம், இலங்கை சுற்றுலா அபிவிருத்தி அதிகார சபை (SLTDA) மற்றும் இலங்கை சுற்றுலா ஊக்குவிப்பு பணியகம் (SLTPB) ஆகியவற்றின் அதிகாரிகள் இந்தத் துறையின் மீட்சி வேகம் குறித்து பலத்த நம்பிக்கை வெளியிட்டுள்ளனர்.
ஜூலை மாத தொடக்கத்தில் இருந்து சுவிட்சர்லாந்து, போலந்து மற்றும் ரஷ்யா உள்ளிட்ட சிஐஎஸ் (CIS) நாடுகளிலிருந்து வரவிருக்கும் சார்ட்டர் (charter – ஒப்பந்த) விமானங்களின் வருகை இந்த நேர்மறையான எதிர்பார்ப்பிற்கு வலுசேர்க்கிறது. இதன் மூலம் மாதத்திற்கு சுமார் 50,000 சுற்றுலாப் பயணிகள் வருவார்கள் என எதிர்பார்க்கப்படுவதுடன், புதிய வணிக ரீதியிலான விமானங்கள் மற்றும் தற்போது நடைமுறையிலுள்ள இலவச விசா திட்டம் ஆகியவையும் இதற்கு பெரும் பக்கபலமாக அமைந்துள்ளன.
சுற்றுலாத் துறையின் மூலோபாய இலக்குகள் குறித்துப் பேசிய சுற்றுலாத் துறை பிரதி அமைச்சர் பேராசிரியர் ருவன் ரணசிங்க, மாறிவரும் உலகளாவிய சூழ்நிலைகளுக்கு ஏற்பவே ஆரம்ப இலக்குகள் கட்டமைக்கப்பட்டதாகக் குறிப்பிட்டார்.
“இருப்பினும், தற்போதைய சூழ்நிலையைப் பார்க்கும்போது, மிக மோசமான நிலையில் 2.5 மில்லியன் வருகையாளர்களையும், சாதாரண சூழ்நிலையின் கீழ் 2.7 மில்லியன் வருகையாளர்களையும், சாதகமான நல்ல சூழ்நிலையின் கீழ் மூன்று மில்லியன் வருகையாளர்களையும் இலக்காகக் கொண்டு எங்களது திட்டங்களைத் தயாரித்திருந்தோம். சாதாரண சூழ்நிலையின் கீழ், இந்த ஆண்டின் இறுதிக்குள் எங்களது 2.5 மில்லியன் வருகையாளர்கள் என்ற இலக்கை எங்களால் சாதிக்க முடியும் என்று எதிர்பார்க்கிறோம்,” என கொழும்பில் நடைபெற்ற ஊடகவியலாளர் சந்திப்பின் போது பேராசிரியர் ரணசிங்க தெரிவித்தார்.
வெறும் சுற்றுலாப் பயணிகளின் எண்ணிக்கையை மட்டும் அதிகரிப்பதை விட, அதிக பணம் செலவழிக்கும் பிரிவினர் மற்றும் மதிப்புமிக்க சுற்றுலாத் திட்டங்கள் (value-driven tourism) மீது அதிக கவனம் செலுத்துவதன் மூலமே இந்த வருகையாளர்களிடமிருந்து அதிகபட்ச பொருளாதார நன்மைகளைப் பெற முடியும் என சுற்றுலாத்துறை அதிகாரிகள் வலியுறுத்தினர்.
நிதி கணிப்புகள் குறித்து விளக்கிய SLTDA மற்றும் SLTPB அமைப்புகளின் தலைவர் புத்திக ஹேவவசம், “இந்த சூழ்நிலைகளின் கீழ் 3.5 முதல் 4 பில்லியன் டாலர் வரையிலான வருமானத்தைப் பெற எதிர்பார்க்கிறோம். அதனால்தான் சுற்றுலாத்துறையின் மதிப்பு கூட்டல்களின் முக்கியத்துவத்தை நான் சுட்டிக்காட்டினேன், ஏனெனில் உண்மையான மதிப்பு அந்த திசையிலிருந்தே வருகிறது என்பதை நாம் காண்கிறோம்” என்றார்.
மொத்த வருகையாளர்களில் 20 முதல் 25 சதவீதத்தைக் கொண்டுள்ள இந்திய சந்தையின் முக்கியத்துவத்தை ஹேவவசம் சிறப்பாகக் குறிப்பிட்டார். அதாவது, 1.2 மில்லியன் அடிப்படை வருகையாளர்களில் சுமார் 300,000 சுற்றுலாப் பயணிகள் இந்தியாவிலிருந்து வருகிறார்கள். இந்தியப் பயணிகள் ஒரு நாளைக்கு சராசரியாக 150 அமெரிக்க டாலருக்கும் அதிகமாகச் (பொதுவாக 154 முதல் 157 டாலர் வரை, இது பொதுவான சுற்றுலாப் பயணியின் சராசரியான 148 டாலரை விட அதிகம்) செலவிடுகிறார்கள் என்றும், அவர்கள் தங்கும் சராசரி காலம் ஐந்து முதல் ஆறு நாட்கள் வரை நீடிப்பதால், அவர்கள் உள்ளூர் சுற்றுலாத் துறையினருக்கு அதிக லாபம் தரும் பிரிவினராக மாறுகிறார்கள் என்றும் அவர் குறிப்பிட்டார்.
புதிய விமான வழித்தடங்களின் அறிமுகம் மற்றும் உலகளாவிய இருக்கை வசதிகளின் கணிசமான விரிவாக்கம் காரணமாக சுற்றுலாப் பயணிகளின் வருகை மேலும் துரிதமடையும் என எதிர்பார்க்கப்படுகிறது. ‘வியட்ஜெட்’ (VietJet) மற்றும் ‘வியட்நாம் ஏர்லைன்ஸ்’ (Vietnam Airlines) போன்ற வணிக ரீதியிலான விமான நிறுவனங்கள் புதிய சேவைகளைத் தொடங்குகின்றன. அதேவேளை ஆஸ்திரேலியாவின் ‘ஜெட்ஸ்டார்’ (Jetstar) மற்றும் ‘பிரெஞ்ச் பீ’ (French bee) ஆகிய நிறுவனங்கள் இலங்கையை வளர்ந்து வரும் உலகளாவிய மையங்களுடன் இணைக்க புதிய சார்ட்டர் சேவைகளைத் திட்டமிட்டுள்ளன.
தற்போது சேவையில் உள்ள முக்கிய விமான நிறுவனங்களும் தங்களது செயல்பாடுகளை தீவிரப்படுத்தி வருகின்றன; ‘பிரிட்டிஷ் ஏர்வேஸ்’ (British Airways) செப்டம்பர் மாதம் கொழும்புக்கான தனது விமான சேவைகளை மீண்டும் தொடங்க திட்டமிட்டுள்ளதுடன், ‘எமிரேட்ஸ்’ (Emirates) நிறுவனம் குளிர்கால சுற்றுலாப் பயணிகளின் வருகைக்கு ஆதரவாக தனது விமானங்களின் எண்ணிக்கையை தீவிரமாக அதிகரித்து, அதன் கொள்ளளவையும் மேம்படுத்தி வருகிறது. இந்த வணிக ரீதியிலான விமான விரிவாக்கங்களுக்கு மேலாக, கிழக்கு ஐரோப்பா மற்றும் சிஐஎஸ் பிராந்தியங்களில் இருந்து, குறிப்பாக போலந்து மற்றும் ரஷ்யா போன்ற அதிக சாத்தியக்கூறுகளைக் கொண்ட சந்தைகளைக் குறிவைத்து வரும் சார்ட்டர் விமானங்கள் வரவிருக்கும் மாதங்களில் சுற்றுலாப் பயணிகளின் நிலையான வருகையை உறுதி செய்யவுள்ளன.
மேலும், தற்போது நடைமுறையிலுள்ள இலவச விசா திட்டமானது நுழைவுத் தடைகளைக் குறைத்து, சர்வதேசப் பயணிகளை அதிகளவில் ஈர்ப்பதில் முக்கிய பங்கு வகிக்கிறது. இந்தத் திட்டத்தின் நீண்ட கால செயல்பாட்டை மதிப்பிடுவதற்காக இது ஒரு ஆறு மாத முன்னோடித் திட்டமாக (pilot programme) செயல்படுத்தப்பட்டுள்ளது. இதன் மூலம் அரசு கருவூலத்திற்கு நேரடியாகச் செல்லும் விசா கட்டணங்கள் உடனடியாகத் தள்ளுபடி செய்யப்பட்ட போதிலும், ஒட்டுமொத்த பொருளாதார வருவாயை அதிகரிப்பதற்காகவே இது வடிவமைக்கப்பட்டுள்ளது. இந்த கொள்கை முடிவின் பின்னணியிலுள்ள காரணத்தை விளக்கிய பேராசிரியர் ரணசிங்க, “இந்த முடிவின் மூலம், அந்த நாடுகளிலிருந்து சுற்றுலாப் பயணிகளின் வருகை தொடர்ந்து அதிகரித்தால், பொதுவாக நாட்டின் பொருளாதாரத்திற்கு கிடைக்கும் வருவாய் அதிகமாக இருக்கும் என்று நாங்கள் திட்டமிட்டுள்ளோம். எனவே, அதுவே எங்களது அனுமானமாக இருந்ததுடன், ஆறு மாதங்களுக்குப் பிறகு இது கண்காணிக்கப்பட்டு மறுபரிசீலனை செய்யப்படும்” என்றார்.
