தேசிய வீடமைப்பு அபிவிருத்தி அதிகாரசபையில் (NHDA) இடம்பெற்ற காணி முறைகேடுகள், நிதி ஒழுங்கீனங்கள் மற்றும் நிர்வாகக் குறைபாடுகள் குறித்து முறையான விசாரணை நடாத்துவதற்காக, அது தொடர்பான விவகாரங்களை குற்றப்புலனாய்வுத் திணைக்களம் (CID) மற்றும் இலஞ்ச அல்லது ஊழல் பற்றிய குற்றச்சாட்டுகளைப் புலனாய்வு செய்வதற்கான ஆணைக்குழுவிடம் (CIABOC) ஒப்படைக்குமாறு அரசாங்கப் பொறுப்பு முயற்சிகள் பற்றிய குழு (COPE) பரிந்துரைத்துள்ளது.
2022 மற்றும் 2023ஆம் ஆண்டுகளுக்கான கணக்காய்வாளர் நாயகத்தின் அறிக்கைகளை பரிசீலிப்பதற்கும், தேசிய வீடமைப்பு அபிவிருத்தி அதிகாரசபையின் தற்போதைய தொழிற்பாடுகளை மீளாய்வு செய்வதற்கும் பாராளுமன்ற உறுப்பினர் கலாநிதி நிஷாந்த சமரவீர தலைமையிலான கோப் குழு அண்மையில் கூடியபோதே இந்தத் தீர்மானம் மேற்கொள்ளப்பட்டது.
மாளிகாவத்தை, எல்விடிகல மாவத்தை மற்றும் தம்புள்ளை – ரங்கிரிகம ஆகிய பகுதிகளில் தேசிய வீடமைப்பு அபிவிருத்தி அதிகாரசபைக்குச் சொந்தமான பெறுமதிமிக்க காணிகளை, அமைச்சரவை அனுதியின்றி குறைந்த குத்தகை அடிப்படையில் வெளிநபர்களுக்கு வழங்கியமை, ஒப்பந்தங்களுக்குப் புறம்பான தேவைகளுக்காக அக்காணிகளைப் பயன்படுத்தியமை மற்றும் சொத்துக்களைப் பாதுகாப்பதில் தவறியமை ஆகியவை குறித்து இதன்போது விரிவாக ஆராயப்பட்டது.
குறித்த கொடுக்கல்வாங்கல்கள் பல அதிகாரசபையின் நோக்கங்களுக்கும் சட்டப்பூர்வ ஏற்பாடுகளுக்கும் முரணான வகையில் முன்னெடுக்கப்பட்டுள்ளதாகச் சுட்டிக்காட்டிய கோப் குழு, இந்த ஒழுங்கீனங்கள் தொடர்பில் முறையான சட்ட நடவடிக்கை எடுப்பதற்காக விரிவான அறிக்கைகளை குற்றப்புலனாய்வுத் திணைக்களம் மற்றும் லஞ்ச ஒழல் ஆணைக்குழுவுக்கு அனுப்புமாறு பணிப்புரை விடுத்தது.
மேலும், உள்நாட்டு தணிக்கைகளை விரைவுபடுத்தி, இதற்குப் பொறுப்பான அதிகாரிகளை அடையாளம் கண்டு அவர்களுக்கு எதிராக ஒழுக்காற்று நடவடிக்கை எடுக்குமாறும் அதிகாரிகளுக்கு உத்தரவிடப்பட்டது. எதிர்காலத்தில் இவ்வாறான முறைகேடுகள் இடம்பெறுவதைத் தடுக்கும் வகையில் சொத்து நிர்வாகம் மற்றும் உள்நாட்டுப் கட்டுப்பாட்டு அமைப்புகளை வலுப்படுத்துமாறும் கோப் குழு பரிந்துரைத்துள்ளது.
