மத்திய கிழக்கு மோதல்கள் மேலும் தீவிரமடைந்தால், அது இலங்கையின் பொருளாதாரத்திற்குப் பல வழிகளில் அச்சுறுத்தலை ஏற்படுத்தும் என்றும்; இறக்குமதிச் செலவுகள், ஏற்றுமதிகள், வெளிநாட்டுப் பணப்பாய்வுகள் (Remittances), சுற்றுலாத்துறை, அந்நியச் செலாவணி கையிருப்பு மற்றும் அரசாங்கத்தின் நிதி நிலைமை ஆகியவற்றை ஒரே நேரத்தில் பாதிக்கக்கூடும் என்றும் ஆசிய அபிவிருத்தி வங்கி (ADB) எச்சரித்துள்ளது.
தனது ‘ஆசிய அபிவிருத்தி தொலைநோக்கு – செப்டம்பர் 2026’ (Asian Development Outlook September 2026) அறிக்கையில் ADB தெரிவித்துள்ள முக்கிய அம்சங்கள்:6 பொருளாதார சவால்கள்:
எரிபொருள், சரக்குக் கட்டணம் (Freight), உரம், உணவு மற்றும் மானியச் செலவுகள் அதிகரிப்பதுடன்; ஏற்றுமதி, வெளிநாட்டுப் பணப்பாய்வு, சுற்றுலா மற்றும் கையிருப்பு ஆகியவை ஒரே நேரத்தில் நெருக்கடிக்கு உள்ளாகக்கூடும்.
வெளிநாட்டு வர்த்தகப் பற்றாக்குறை: 2026 ஆம் ஆண்டின் முதல் ஏழு மாதங்களில் நாட்டின் நடைமுறைக் கணக்கில் (Current Account) $387 மில்லியன் பற்றாக்குறை பதிவாகியுள்ளது. இறக்குமதிகள் 25.8% அதிகரித்துள்ள அதேவேளை, ஏற்றுமதி வளர்ச்சி 4.4% ஆக மட்டுமே இருந்தது. இதனால் வர்த்தகப் பற்றாக்குறை 69% அதிகரித்து $6.5 பில்லியனாக விரிவடைந்துள்ளது. அந்நியச் செலாவணி கையிருப்பு & ரூபாய் மதிப்பு: 2025 இறுதியில் $6.8 பில்லியனாக இருந்த உத்தியோகபூர்வ கையிருப்பு ஜூலை இறுதியில் $6.6 பில்லியனாகக் குறைந்துள்ளது (சுமார் 3.2 மாத கால இறக்குமதிக்கு போதுமானது). அமெரிக்க டாலருக்கு எதிரான இலங்கை ரூபாயின் மதிப்பு ஜூலை இறுதியில் 7.8% வீழ்ச்சியடைந்த போதிலும், ஆகஸ்ட் மாதத்தில் ஓரளவு மீட்சியடைந்து 5.5% ஆகக் காணப்பட்டது.
சுற்றுலாத் துறைக்கான பின்னடைவு: 2026 ஆம் ஆண்டில் 3 மில்லியன் சுற்றுலாப் பயணிகளை ஈர்க்கும் இலங்கையின் இலக்கு கைக்கூடுவது கடினம் என ADB சுட்டிக்காட்டியுள்ளது. ஆகஸ்ட் இறுதி வரை 1.5 மில்லியன் சுற்றுலாப் பயணிகளே வருகை தந்துள்ளனர். முதல் 7 மாதங்களில் சுற்றுலாப் பயணிகளின் வருகை 1.8% குறைந்துள்ளதுடன், வருவாய் 11.5% சரிவடைந்துள்ளது.
பாதை மாற்றங்கள், அதிக விமானக் கட்டணம் மற்றும் ஜெட் எரிபொருள் விலை உயர்வே இதற்குக் காரணங்களாகும்.
பணப்பாய்வு ஆதரவு: வெளிநாட்டுப் பணப்பாய்வு (Remittances) ஜனவரி-ஜூலை காலத்தில் 21.4% அதிகரித்து, நாட்டின் பொருளாதாரத்தைப் பாதுகாக்கும் முக்கிய காரணியாக உள்ளது. இருப்பினும், மத்திய கிழக்கில் வேலை வாய்ப்புகள் குறைந்தால் இதற்கும் ஆபத்து ஏற்படலாம்.
எல் நினோ (El Niño) இயற்கை அச்சுறுத்தல்: மத்திய கிழக்கு மோதல்களுடன் தீவிர எல் நினோ காலநிலையும் இணைந்து பயிர்ச் செய்கையைப் பாதிப்பதுடன், நீர்மின் உற்பத்தியையும் அச்சுறுத்துகிறது. பொருளாதார வளர்ச்சி கணிப்பு: இந்த அபாயங்களுக்கு மத்தியிலும், ADB இலங்கையின் 2026 மற்றும் 2027 ஆம் ஆண்டுகளுக்கான ஜிடிபி (GDP) வளர்ச்சி கணிப்பை 4% ஆகத் தக்கவைத்துள்ளது. பணவீக்கம் இந்த ஆண்டில் 6% ஆகவும், அடுத்த ஆண்டில் 5.2% ஆகவும் இருக்கும் என எதிர்பார்க்கப்படுகிறது
