பாக்கிஸ்தானின் பெசாவர் நகரில் தனியார் பாடசாலையொன்றின் கூரை இடிந்து விழுந்ததில் 27 மாணவர்களும் ஒரு ஆசிரியையும் பலியான துயர சம்பவம் இடம்பெற்றுள்ளது.
உயிரிழந்தவர்களையும் காயமடைந்தவர்களையும் லேடி ரீடிங் மருத்துவமனைக்கு கொண்டுவந்துள்ளனர் என மருத்துவமனையின் இயக்குநர் தெரிவித்துள்ளார்.
கூரை இடிந்த விழுந்தமைக்கான காரணம் இன்னமும் தெரியவரவில்லை.
பல மாணவர்கள் இன்னமும் இடிபாடுகளுக்குள் சிக்குண்டுள்ளனர் என அவசரசேவை பிரிவின் அதிகாரியொருவர் தெரிவித்துள்ளார்.சிக்குண்டுள்ளவர்களை மீட்பதற்கான நடவடிக்கைகள் இடம்பெறுவதாக அவர் குறிப்பிட்டுள்ளார்.
கட்டிடத்தின் உரிமையாளர் கைதுசெய்யப்பட்டுள்ளார் என தெரிவித்துள்ள பொலிஸார் கட்டிடம் பலவீனமான நிலையிலேயே இருந்துள்ளது என குறிப்பிட்டுள்ளனர்.
பாடசாலை கட்டிடத்தின் பாதுகாப்பு குறித்து கேள்விகள் எழுந்துள்ளதை தொடர்ந்து பொலிஸார் விசாரணைகளை தீவிரப்படுத்தியுள்ளனர்.
பாக்கிஸ்தானில் கட்டிட கட்டுமான தரநிலைகள் பெரும்பாலும் சரியான விதத்தில் அமுல்படுத்தப்படுவதில்லை என குற்றச்சாட்டுகள் காணப்படுவது குறிப்பிடத்தக்கது.
கட்டுமான செலவுகளை குறைப்பதற்காக தரமற்ற பொருட்களை பயன்படுத்தி கட்டிடங்களை கட்டுவதுடன் பாதுகாப்பு விதிமுறைகளும் புறக்கணிக்கப்படுகின்றன.
கடந்த மாதம் லாகூரில் பாடசாலை கட்டிடம் இடிந்து விழுந்ததில் நான்கு மாணவர்கள் உயிரிழந்தனர்.
இன்றைய சம்பவத்தில் கொல்லப்பட்ட மாணவர்கள் 13 வயதிற்கு குறைந்தவர்கள் என அதிகாரிகள் தெரிவித்துள்ளனர்.
மருத்துவமனை வட்டாரங்கள் இதனை உறுதி செய்துள்ளதுடன் மருத்துவமனையில் அவசரநிலை பிறப்பிக்கப்பட்டுள்ளதாக தெரிவித்துள்ளன.
இடிபாடுகளை அகற்றும் நடவடிக்கைகள் இடம்பெறுவதால் உயிரிழப்பு அதிகரிக்கலாம் என்ற அச்சம் காணப்படுகின்றது.
பெரும்துயருடன் பிள்ளைகளை தேடும் பெற்றோர்.
துயரத்தில் சிக்குண்டுள்ள பெற்றோர் பாடசாலைக்கு வெளியேயும் மருத்துவமனையிலும் தகவல்களை பெறுவதற்காக காத்திருக்கின்றனர்.
