பிரதியமைச்சர் சுனில் வடகல மற்றும் முன்னாள் அமைச்சர் குமார ஜயகொடி ஆகியோரின் சொத்துக்கள் குறித்து முழுமையான விசாரணை: இலஞ்ச ஊழல் ஆணைக்குழு தீர்மானம்

பிரதி பொதுப் பாதுகாப்பு அமைச்சர் சுனில் வடகல (Sunil Watagala) மற்றும் முன்னாள் மின்சக்தி மற்றும் வலுசக்தி அமைச்சர் குமார ஜயகொடி (Kumara Jayakody) ஆகியோரின் சொத்துக்கள் குறித்து முழுமையான விசாரணைகளை மேற்கொள்வதற்கு இலஞ்சம் அல்லது ஊழல் பற்றிய குற்றச்சாட்டுகளை புலனாய்வு செய்வதற்கான ஆணைக்குழு (CIABOC) தீர்மானித்துள்ளது.

இவர்களின் சொத்துக்கள் தொடர்பில் மேற்கொள்ளப்பட்ட ஆரம்பக்கட்ட விசாரணைகளின் பின்னர் எழுந்த சந்தேகங்கள் மற்றும் சிக்கல்களைக் கருத்திற் கொண்டு இந்த விரிவான விசாரணையை நடத்த ஆணைக்குழு முடிவெடுத்துள்ளது.

ஐந்து அமைச்சர்கள் மற்றும் ஒரு பிரதி அமைச்சருக்கு எதிராக சிவில் உரிமை செயற்பாட்டாளர் ஒருவர் அளித்த புகாரைத் தொடர்ந்து இந்த ஆரம்பக்கட்ட விசாரணை தொடங்கப்பட்டது. அமைச்சர்களான பிமல் ரத்நாயக்க, வசந்த சமரசிங்க, சுனில் ஹந்துன்னெத்தி மற்றும் நலிந்த ஜயதிஸ்ஸ ஆகியோரே ஏனைய அமைச்சர்களாவர்.

குறித்த நபர்கள் முன்னர் சமர்ப்பித்த சொத்து விபரப் பிரகடனங்களுக்கும், பின்னதாகச் சமர்ப்பிக்கப்பட்ட பிரகடனங்களுக்கும் இடையே காணப்படும் முரண்பாடுகள் காரணமாகவே இந்த விரிவான விசாரணை முன்னெடுக்கப்பட்டு வருகிறது.

கடந்த ஆண்டின் செப்டம்பர் மாதம் சிவில் உரிமை செயற்பாட்டாளரான ஜாமுனி சமந்த துஷார டி சில்வா என்பவரால் அளிக்கப்பட்ட முறைப்பாட்டின் அடிப்படையில், சட்டவிரோதச் சொத்துக் குவிப்பு தொடர்பில் பணமோசடித் தடுப்புச் சட்டத்தின் (Money Laundering Act) கீழ் இலஞ்ச ஊழல் ஆணைக்குழு இந்த விசாரணையைத் தொடங்கியது.

ஆரம்பக்கட்ட விசாரணையின் போது, சொத்து விலைகளின் ஏற்ற இறக்கங்கள் காரணமாக சில சொத்துக்களின் மதிப்பு உயர்ந்துள்ளது தெரியவந்தது. இருப்பினும், புதிதாகப் பிரகடனப்படுத்தப்பட்டுள்ள கூடுதல் சொத்துக்கள் காரணமாக மேலதிக விசாரணைகள் தேவைப்படுவதாக ஆணைக்குழு சுட்டிக்காட்டியுள்ளது.