கலகொட அத்தே ஞானசார தேரருக்கு, பௌத்த விநய விதிகளுக்கு அமைவாக மீண்டும் காவியுடை அணிவிப்பதற்குத் தேவையான நடவடிக்கைகளை முன்னெடுக்குமாறு பௌத்த பிக்குகள் குழுவொன்று அதிகாரிகளிடம் மீண்டும் வலியுறுத்தியுள்ளது.
கோட்டே ஸ்ரீ கல்யாணி சாமக்ரி தர்ம மகா சங்க சபையின் மகாநாயக்க தேரர் விடுத்த கோரிக்கையைத் தொடர்ந்தே இந்த வலியுறுத்தல் முன்வைக்கப்பட்டுள்ளது.
மகாநாயக்க தேரரின் கோரிக்கைக்கு அமைவாக எடுக்கப்பட்டுள்ள நடவடிக்கைகள் குறித்துக் கேட்டறிவதற்காக, பௌத்த பிக்குகள் குழுவொன்று இன்று (16) சிறைச்சாலைத் தலைமையகத்திற்கு விஜயம் செய்ததுடன், அதனைத் தொடர்ந்து ஊடகங்களுக்குத் தமது கரிசனைகளை வெளிப்படுத்தியது.
ஞானசார தேரர் சிறையிலிருந்த போது அவரது காவியுடை அகற்றப்பட்டமை பொதுமக்கள் மத்தியில் பெரும் சர்ச்சையை ஏற்படுத்தியிருந்தது.
குறித்த சம்பவத்தைத் தொடர்ந்து, தடுத்து வைக்கப்பட்டுள்ள பௌத்த பிக்குகள் சிறைக்குள் காவியுடை அணிவதற்கு அனுமதிக்கும் வகையில் சிறைச்சாலை நிலையான கட்டளைகளில் திருத்தங்கள் மேற்கொள்ளப்பட்டன.
எவ்வாறாயினும், பௌத்த சமய ஒழுக்க விதிகளுக்கு (விநய விதிகள்) அமைவாக ஞானசார தேரருக்கு மீண்டும் காவியுடை அணிவிப்பதற்கான ஏற்பாடுகளைச் செய்யுமாறு மகாநாயக்க தேரர் விடுத்த கோரிக்கை தொடர்பில் எடுக்கப்பட்டுள்ள நடவடிக்கைகள் குறித்து விளக்கமளிக்குமாறு, இன்று சிறைச்சாலைத் தலைமையகத்திற்குச் சென்ற பிக்குகள் கோரிக்கை விடுத்துள்ளனர்.