இந்தியப் பெருங்கடல் வல்லரசுப் போட்டிகளுக்கான களமாக மாறக்கூடாது – சீனத் தூதுவர்

இந்தியப் பெருங்கடல் வல்லரசு நாடுகளின் போட்டித் தளமாக மாறக்கூடாது எனவும், அதற்குப் பதிலாக நாடுகளுக்கிடையிலான ஒத்துழைப்பு மற்றும் பொதுவான நலன்களுக்கான தளமாக அது அமைய வேண்டும் எனவும் இலங்கையிலுள்ள சீனத் தூதுவர் சி சென்ஹாங் (Qi Zhenhong) வலியுறுத்தியுள்ளார்.

“கடல் என்பது வல்லரசுப் போட்டிகளுக்கான அரங்கமாக இருக்கக்கூடாது, மாறாக பரஸ்பர நன்மை மற்றும் ஒத்துழைப்புக்கான ஒரு பரந்த மேடையாக இருக்க வேண்டும் என்பதே எமது நிலையான நிலைப்பாடாகும்” என்று குறிப்பிட்ட அவர், இந்தியப் பெருங்கடல் “அமைதி, வளர்ச்சி, வெளிப்படைத்தன்மை மற்றும் ஒத்துழைப்புக்கான ஒரு கடலாக” பரிணமிக்க வேண்டும் என்றும் கூறினார்.

இத்தகைய தொலைநோக்குப் பார்வை பிராந்திய நாடுகளின் மற்றும் பரந்த சர்வதேச சமூகத்தின் பொதுவான நலன்களைப் பிரதிபலிக்கிறது என அவர் வலியுறுத்தினார். மேலும், இதற்கு எதிரான அணுகுமுறைகள் ஆதரவைப் பெறத் தவறிவிடும் என்றும் அவர் எச்சரித்தார்.

பிராந்திய ஒத்துழைப்பு குறித்த ஒரு மன்றத்தில் உரையாற்றிய தூதுவர், பண்டைய காலத்திலிருந்தே உலகளாவிய வர்த்தகம் மற்றும் கலாச்சாரப் பரிமாற்றங்களுக்கான பாதையாக இந்தியப் பெருங்கடல் கொண்டுள்ள முக்கியத்துவத்தைச் சுட்டிக்காட்டினார். சீனாவுக்கும் இந்தியப் பெருங்கடல் நாடுகளுக்கும் இடையிலான வரலாற்று ரீதியான உறவுகள் மற்றும் நட்புறவுப் பரிமாற்றங்களின் பாரம்பரியத்தையும் அவர் இதன்போது நினைவுகூர்ந்தார்.

இலங்கையானது இந்தியப் பெருங்கடலின் மையப்பகுதியில் ஒரு மூலோபாய முக்கியத்துவம் வாய்ந்த இடத்தைப் பெற்றுள்ளதுடன், கிழக்கு-மேற்கு கடல்சார் வழித்தடங்களில் ஒரு முக்கிய மையமாகச் செயல்படுகிறது என்று அவர் கூறினார். இந்த அமைவிடம், பிராந்தியப் பரிமாற்றம் மற்றும் ஒத்துழைப்பை வளர்ப்பதில் இலங்கை ஒரு தனித்துவமான மற்றும் செல்வாக்குமிக்க பங்கைப் வகிக்க இடமளிப்பதாக அவர் குறிப்பிட்டார்.

இருதரப்பு உறவுகள் குறித்துக் கருத்துத் தெரிவித்த தூதுவர், இரு நாட்டுத் தலைவர்களின் மூலோபாய வழிகாட்டலின் கீழ் அண்மைய ஆண்டுகளில் சீனா-இலங்கை கடல்சார் ஒத்துழைப்பு “சிறந்த முடிவுகளை” வழங்கியுள்ளதாகக் கூறினார். துறைமுகக் கட்டுமானம், கப்பல் போக்குவரத்து மற்றும் தளவாடங்கள் (Logistics), கடல்சார் பொருளாதார நடவடிக்கை, அனர்த்தத் தடுப்பு மற்றும் தணிப்பு உள்ளிட்ட பல துறைகளில் ஒத்துழைப்பு விரிவடைந்துள்ளதோடு, இது இரு நாட்டு மக்களுக்கும் நேரடியான நன்மைகளைக் கொண்டு வந்துள்ளதாக அவர் மேலும் தெரிவித்தார்.