அரசாங்கம் மக்கள் பலத்துடன் விளையாட முயலக்கூடாது என தெரிவித்துள்ள அருட்தந்தை சக்திவேல் அரசாங்கம் அரசை பயங்கரவாதத்திலிருந்து பாதுகாக்கும் சட்டமூலத்திற்கு பதில் மக்களை பாதுகாக்கும் சட்டத்தை கொண்டுவரவேண்டும் என வேண்டுகோள் விடுத்துள்ளார்
புதிய பயங்கரவாத எதிர்ப்பு சட்டமூலத்திற்கு எதிராக கொழும்பில் இடம்பெற்ற ஆர்ப்பாட்டத்தில் கலந்துகொண்டு கருத்து தெரிவிக்கையில் இதனை குறிப்பிட்டுள்ள அவர் மேலும் தெரிவித்துள்ளதாவது
தற்போதைய அரசாங்கத்தின் அனுரகுமாரதிசநாயக்க அமெரிக்க ஜனாதிபதியின் தம்பி போல நடந்துகொள்கின்றார் அதேபோல ரணிலின் அண்ணா போல நடந்துகொள்கின்றார்.
ஒடுக்குமுறை சட்டங்களை கொண்டுவந்து அனைத்து மக்களையும் நசுக்குவதற்கு பதிலாக பயங்கரவாத தடைச்சட்டத்தை நீக்குமாறு நாங்கள் கோரினோம்.
தேர்தல் வாக்குறுதியில் பயங்கரவாத தடைச்சட்டம் மாத்திரமல்ல அதுபோன்ற எந்த சட்டமும் கொண்டுவரப்படாது என தெரிவித்தனர்.
ஆனால் பயங்கரவாத தடைச்சட்டத்தை விட ஆபத்தான சட்டத்தை கொண்டுவரமுயல்கின்றனர்.தங்களிடம் 150க்கும் மேற்பட்ட நாடாளுமன்ற உறுப்பினர்கள் இருப்பதாக தெரிவித்து அதனை நாடாளுமன்றத்தில் நிறைவேற்ற முயல்கின்றனர்.
ஆனாலும் மக்களின் பலத்தினால் இதனை தோற்கடிக்க நாங்கள் தயாராகயிருக்கின்றோம்.இந்த ஒடுக்குமுறை அரசாங்கத்தினால் இதனை தொடர்ந்து முன்னெடுத்து செல்ல முடியாது.
எக்காலத்திலும் மக்களின் பலத்துடன் விளையாட முடியாது,மக்களை பாதுகாப்பதற்கும் மக்கள் முன்னேறிச்செல்வதற்குமான ஒரு சட்டத்தை கொண்டுவாருங்கள்,இ;ந்த சட்டத்தை கொண்டுவராதீர்கள் என்பதே எங்கள் கொள்கையாகும் என தெரிவித்தார்.
