இலங்கை கிரிக்கெட் அணியின் புகழ்பெற்ற முன்னாள் வீரரான குமார் சங்கக்கார, டப்ளின் விமான நிலையத்தில் வைத்து தனது குடும்பத்தினரிடம் ரைனயர் (Ryanair) விமான நிறுவன ஊழியர்கள் பாகுபாட்டுடனும் அச்சுறுத்தும் வகையிலும் நடந்துகொண்டதாகக் குற்றம் சாட்டியுள்ளார்.
இது குறித்து எக்ஸ் தளத்தில் பதிவிட்டுள்ள அவர், “டப்ளின் விமான நிலையத்தில் ரைனயர் நிறுவனத்தின் கேட் (Gate) ஊழியர்களிடம் யாராவது பாகுபாட்டை அனுபவித்திருக்கிறீர்களா? நானும் எனது குடும்பத்தினரும் இப்போது அதை அனுபவித்தோம். அது மிகவும் அதிர்ச்சியளிப்பதாக இருந்தது. அவர்களின் பேச்சுத் தொனி, நடைமுறைகளைக் கையாண்ட விதம் மற்றும் அச்சுறுத்தும் நடத்தைகள் எந்தவொரு பயணியாலும் ஏற்றுக்கொள்ள முடியாதவை. டப்ளினில் எனக்குக் கிடைத்த முதல் மோசமான அனுபவம் இதுவாகும்” எனத் தெரிவித்துள்ளார்.
49 வயதான முன்னாள் சர்வதேச கிரிக்கெட் நட்சத்திரமும் தற்போதைய வர்ணனையாளருமான சங்கக்கார, இந்த அனுபவம் மிகவும் மனவேதனை அளிப்பதாகக் குறிப்பிட்டுள்ளார்.
இந்தச் சம்பவத்திற்கு ஆதரவு தெரிவித்து பதிவிட்டுள்ள பிரபல தொலைக்காட்சி தொகுப்பாளர் பியர்ஸ் மோர்கன் (Piers Morgan), “சங்கக்காரவை விட மிகவும் கண்ணியமான மற்றும் பண்பான ஒருவரை நான் கண்டதில்லை. அவர் இவ்வாறு கூறுகிறார் என்றால், அது நிச்சயமாக மிகவும் வெட்கக்கேடான நடத்தையாகத்தான் இருந்திருக்க வேண்டும். ரைனயர் நிறுவனம் இதனை உடனடியாகவும் முறையாகவும் விசாரிக்க வேண்டும் என நம்புகிறேன்” எனக் குறிப்பிட்டுள்ளார்.
அத்துடன், இலங்கையைச் சேர்ந்த தொழிலதிபர் சஞ்சீவ வீரவர்ண என்பவரும் இந்தப்பதிவில் கருத்துத் தெரிவிக்கையில், மேலைநாடுகளில் தானும் இவ்வாறான பாகுபாடுகளை எதிர்கொண்டுள்ளதாகக் குறிப்பிட்டுள்ளார். அதற்குப் பதிலளித்த சங்கக்கார, “இவ்வாறான சம்பவங்களை எதிர்கொள்ளும்போது அது மிகவும் வேதனையளிக்கிறது” எனக் கூறியுள்ளார்.
ரைனயர் விமான நிறுவனத்தின் விளக்கம்:
இச்சம்பவம் குறித்து ரைனயர் விமான நிறுவனத்தின் பேச்சாளர் ஒருவர் கருத்து தெரிவிக்கையில், “கட்டாய குடிவரவுச் சோதனைகளை மேற்கொண்ட வாயில் முகவர் (Gate Agent) தேவையான விசா ஆவணங்களைக் கோரியபோது, இப்பயணி அவற்றை வழங்க மறுத்தார். எனினும், இச்சோதனைகள் நிறைவடைந்த பின்னரும், பயணிக்கத் தகுதிபெற்றவர் என்பது உறுதிசெய்யப்பட்ட பின்னரும், அவர் டப்ளினில் இருந்து பிரிஸ்டல் நோக்கிச் சென்ற குறித்த விமானத்தில் பயணித்தார்” எனத் தெரிவித்துள்ளார்.
