சபாநாயகர் ஜகத் விக்ரமரத்னவுக்கு எதிராக எதிர்க்கட்சியால் சமர்ப்பிக்கப்பட்ட நம்பிக்கையில்லாப் பிரேரணை நவம்பர் 3ஆம் திகதி பாராளுமன்றத்தில் விவாதத்திற்கு எடுத்துக்கொள்ளப்பட மாட்டாது என சபைத் தலைவரும் அமைச்சருமான பிமல் ரத்நாயக்க தெரிவித்துள்ளார்.
அமைச்சர் ரத்நாயக்கவின் கூற்றுப்படி, பாராளுமன்ற நிலைக் கட்டளைகளுக்கு ஏற்ப நம்பிக்கையில்லாப் பிரேரணையைத் திருத்தி, அக்டோபர் 28 கெடுவுக்கு முன்னர் மீளச் சமர்ப்பிக்க எதிர்க்கட்சி தவறியமையைத் தொடர்ந்தே இந்தத் தீர்மானம் எடுக்கப்பட்டுள்ளது.
பாராளுமன்றப் பணிகள் பற்றிய குழுக் கூட்டத்தில் எடுக்கப்பட்ட முடிவின்படி, சபாநாயகருக்கு எதிரான நம்பிக்கையில்லாப் பிரேரணை முன்னர் நவம்பர் 3ஆம் திகதி விவாதத்திற்கு விடப்படுவதாகத் திட்டமிடப்பட்டிருந்தது.
இருப்பினும், குறிப்பிட்ட காலக்கெடுவுக்குள் திருத்தப்பட்ட பிரேரணை சமர்ப்பிக்கப்படாத காரணத்தினால், திட்டமிட்டவாறு விவாதம் முன்னெடுக்கப்படாது என அமைச்சர் தெரிவித்தார்.
நம்பிக்கையில்லாப் பிரேரணை மீதான முன்னர் திட்டமிடப்பட்ட விவாதத்திற்குப் பதிலாக, நவம்பர் 3ஆம் திகதி ஒத்திவைப்பு விவாதம் ஒன்று இடம்பெறும் என அமைச்சர் ரத்நாயக்க கூறினார்.
பாராளுமன்ற நிலைக் கட்டளைகளுக்கு இணங்க, சபாநாயகருக்கு எதிரான திருத்தப்பட்ட நம்பிக்கையில்லாப் பிரேரணையை எதிர்க்கட்சி சமர்ப்பித்தால், 2027ஆம் ஆண்டுக்கான ஒதுக்கீட்டுச் சட்டமூலம் (Appropriation Bill) மீதான விவாதம் தொடங்குவதற்கு முன்னர் விவாதத்திற்கான நேரத்தை அரசாத்தால் ஒதுக்க முடியும் என அவர் மேலும் தெரிவித்தார்.
