யாழ்ப்பாணம்:
தியாக தீபம் திலீபன் அவர்களின் நினைவிடத்தை அகற்றுமாறு யாழ். மாவட்ட பிரதி பொலிஸ் மா அதிபர் பிறப்பித்துள்ள உத்தரவுக்குத் தமிழ்த் தேசிய மக்கள் முன்னணி (TNPF) தனது வன்மையான கண்டனத்தைப் பதிவு செய்துள்ளது.
இது தொடர்பாகத் தமிழ்த் தேசிய மக்கள் முன்னணியின் பொதுச் செயலாளர் செல்வராசா கஜேந்திரன் வெளியிட்டுள்ள கண்டன அறிக்கையில் குறிப்பிடப்பட்டுள்ளதாவது:
சட்டவிரோதக் கட்டடம் என்பது அப்பட்டமான பொய்
“தியாக தீபம் திலீபன் அவர்களின் நினைவிடம் ஒரு சட்டவிரோதமான கட்டடம் எனக் கூறி அகற்றுமாறு யாழ். மாவட்ட பிரதி பொலிஸ் மா அதிபர் அறிவித்தல் விடுத்துள்ளார். இது முற்றிலும் அப்பட்டமான பொய்யாகும்.
தமிழ் மக்களின் கூட்டு நினைவேந்தல் உரிமையை முழுமையாக நசுக்கும் நோக்கிலேயே பொலிஸார் இந்த அறிவித்தலை விடுத்துள்ளனர்.”
அனுர அரசாங்கத்தின் மீதான விமர்சனம்
மேலும் அந்த அறிக்கையில், இந்த நடவடிக்கை தற்போதைய அனுர குமார திசாநாயக்க தலைமையிலான அரசாங்கத்தின் இனவாதக் கொடூர முகத்தையே வெளிப்படுத்துவதாகச் சுட்டிக்காட்டப்பட்டுள்ளது.
போர் முடிவுக்கு வந்து 17 ஆண்டுகள் கடந்துள்ள போதிலும், பொலிஸார் இன்னும் தமிழர்களுக்கு எதிரான இனவாத மனநிலையிலிருந்து விடுபடவில்லை என்பதையே இந்த அறிவித்தல் தெள்ளத்தெளிவாகக் காட்டுகிறது என்றும் செல்வராசா கஜேந்திரன் தனது அறிக்கையில் குற்றம் சாட்டியுள்ளார்.
