பொதுமக்கள் மற்றும் சம்பந்தப்பட்ட தரப்பினருடன் கலந்தாலோசிக்காமல் அரசை பயங்கரவாதத்திலிருந்து பாதுகாக்கும் சட்டமூலத்தையும் ஒழுங்கமைக்கப்பட்ட குற்றங்கள் தொடர்பான சட்டமூலத்தையும் நாடாளுமன்றத்தில் அரசாங்கம் நிறைவேற்றாது என ஜனாதிபதி அனுரகுமார திசநாயக்க உறுதியளித்துள்ளார்.
சனிக்கிழமை தேசிய தொழிற்சங்க மாநாட்டில் உரையாற்றிய ஜனாதிபதி மேலும் தெரிவித்துள்ளதாவது
முன்மொழியப்பட்டுள்ள சட்டமூலங்கள் தொடர்பில் கவலைகளை வெளியிட்டுள்ள சிவில் சமூக அமைப்புகள் உள்ளிட்ட சம்பந்தப்பட்ட தரப்பினருடன் அரசாங்கம் பேச்சுவார்த்தைகளை மேற்கொண்டு சட்டமூலத்தை நிறைவேற்றுவதற்கு முன்னர் பரந்தளவிலான உடன்பாட்டை எட்டும்.
அதிகாரத்தில் நீடித்திருப்பதற்கான சட்டங்களை பயன்படுத்தும் எண்ணம் எனக்கும் எனது அரசாங்கத்திற்கும் இல்லை.
நாங்கள் சட்டம் மற்றும் விதிமுறைகள் மூலம் அதிகாரத்திலிருக்கும் ஒரு அரசாங்கம் அல்ல.
மக்களின் ஜனநாயக விருப்பத்திற்கு எனது அரசாங்கம் மதிப்பளிக்கும்,தேர்தலின் மூலம் எங்களை ஆட்சியிலிருந்து அகற்ற மக்கள் தீர்மானித்தால் அதனை ஏற்றுக்கொள்ள நாங்கள் தயார் எனஜனாதிபதி தெரிவித்துள்ளார்.
