இலங்கையில் மருந்து உற்பத்தியை வலுப்படுத்தவும், இறக்குமதி மீதான தங்கியிருப்பைக் குறைக்கவும், $20 மில்லியனுக்கும் அதிகமான முதலீட்டுடன் இலங்கையில் மருந்து உற்பத்தித் தொழிற்சாலையொன்றை நிறுவுவதற்காக, ‘ஜைடஸ் லைஃப்சைன்சஸ்’ (Zydus Lifesciences) மற்றும் ‘சன்ஷைன் ஹெல்த்கேர்’ (Sunshine Healthcare) ஆகிய நிறுவனங்கள் நேற்று ஒரு மூலோபாய கூட்டு நிறுவனத்தை (Joint Venture) அறிவித்துள்ளன. ‘ஜைடஸ் சன்ஷைன் லைஃப்சைன்சஸ் லிமிடெட்’ (Zydus Sunshine Lifesciences Ltd.) என்ற பெயரில் இக்கூட்டு நிறுவனம் இயங்கும்.
ஹொரணையில் (Horana) உள்ள முதலீட்டுச் சபை (BOI) வலயத்தில் அமையவுள்ள இத்தொழிற்சாலை, சுமார் நான்கு ஏக்கர் நிலப்பரப்பில் கட்டியெழுப்பப்படவுள்ளது. இத்திட்டத்தின் உத்தியோகபூர்வ ஆரம்பத்தைக் குறிக்கும் வகையில் நேற்று இதற்கான அடிக்கல் நாட்டப்பட்டது. இத்தொழிற்சாலை இலங்கையின் சில்லறை சந்தைக்கான (Retail market) மருந்துப் பொருட்களை உற்பத்தி செய்வதில் கவனம் செலுத்துவதுடன், தேசிய விநியோகச் சங்கிலியின் ஸ்திரத்தன்மைக்கு ஆதரவளிக்கும் அதேவேளை, உயர்தர மருந்துப் பொருட்களைப் பொதுமக்கள் எளிதாகப் பெற்றுக்கொள்வதையும் உறுதிசெய்யும்.
இந்தக் கூட்டு முயற்சியானது, ஜைடஸ் நிறுவனத்தின் மருந்து உற்பத்தி மற்றும் தொழில்நுட்ப அறிவின் உலகளாவிய அனுபவத்தையும், சன்ஷைன் நிறுவனத்தின் உள்நாட்டுச் சந்தை ஆதிக்கம் மற்றும் சுகாதார விநியோகத் திறன்களையும் ஒன்றிணைக்கிறது. இந்த கூட்டாண்மை மூலம் தொழில்நுட்பப் பரிமாற்றம் (Technology transfer) சாத்தியமாவதுடன், உள்நாட்டு உற்பத்தித் திறன் மேம்படுத்தப்பட்டு, புதிய வேலைவாய்ப்புகளும் உருவாக்கப்படும். இது இலங்கையின் சுகாதாரத் துறையின் நீண்டகால வளர்ச்சிக்கு வழிவகுக்கும்.
அத்தியாவசியத் துறைகளில் உள்நாட்டு உற்பத்திக்கு இலங்கை முன்னுரிமை அளித்து வரும் இக்கட்டானதொரு காலகட்டத்தில் இந்த முன்முயற்சி எடுக்கப்பட்டுள்ளது. உள்நாட்டு மருந்து உற்பத்தித் திறனை வலுப்படுத்துவதன் மூலம், விநியோகப் பாதுகாப்பு (Supply security) மேம்படும், இறக்குமதிக்கான தேவை குறையும், அத்துடன் மருந்துகளின் விலை மலிவு மற்றும் இருப்புத் தன்மை அதிகரிக்கும் என எதிர்பார்க்கப்படுகிறது.
ஜைடஸ் லைஃப்சைன்சஸ் நிறுவனம், மருந்துக் கூட்டமைப்புகள் (Formulations), அத்தியாவசிய மருந்து மூலப்பொருட்கள் (APIs), மருத்துவத் தொழில்நுட்பம், நோயறிதல் (Diagnostics), கால்நடை சுகாதாரம் மற்றும் நுகர்வோர் நலன் ஆகியவற்றில் பரந்த அளவிலான திறன்களைக் கொண்டுள்ளது. இத்தொழிற்சாலையை நிறுவுவதிலும் அதன் உற்பத்தியை விரிவுபடுத்துவதிலும் அதன் உலகளாவிய நிபுணத்துவம் முக்கிய பங்கு வகிக்கும்.
இது குறித்து ஜைடஸ் லைஃப்சைன்சஸ் நிறுவனத்தின் நிர்வாக இயக்குனர் டாக்டர் ஷர்வில் பி. படேல் (Dr. Sharvil P. Patel) கூறுகையில்:
“வலுவான உள்நாட்டுத் திறன்களே நிலையான சுகாதாரக் கட்டமைப்பிற்கு மிக முக்கியம் என்பதை நாங்கள் எப்போதும் நம்புகிறோம். ஜைடஸின் உலகளாவிய அனுபவம் மற்றும் உற்பத்திச் சிறப்பை, சன்ஷைன் ஹோல்டிங்ஸின் உள்நாட்டு நிபுணத்துவத்துடன் இணைப்பதன் மூலம், இந்த கூட்டாண்மை இலங்கையின் சுகாதாரத் துறையை வலுப்படுத்துவதிலும், எதிர்காலத்திற்கான நிலையான மருந்து உற்பத்தித் திறன்களை உருவாக்குவதிலும் ஒரு முக்கிய படியாகும்.” என்றார்.
சன்ஷைன் ஹோல்டிங்ஸ் பிஎல்சி (Sunshine Holdings PLC) நிறுவனத்தின் குழும தலைமை நிர்வாக அதிகாரி (Group CEO) ஷியாம் சதாசிவம் கூறுகையில்:
“இந்த கூட்டாண்மையானது இலங்கையின் சுகாதாரப் பாதுகாப்பு மற்றும் தொழில் துறை வளர்ச்சியில் மேற்கொள்ளப்பட்ட ஒரு மூலோபாய முதலீடாகும். ஜைடஸ் நிறுவனத்துடன் இணைந்து, உள்நாட்டு மருந்து உற்பத்தியை மேம்படுத்தவும், திறமையான வேலைவாய்ப்புகளை உருவாக்கவும், இலங்கை நுகர்வோருக்கு அத்தியாவசிய மருந்துகள் கிடைப்பதை மேம்படுத்தவும் நாங்கள் இலக்கு வைத்துள்ளோம்.” என்றார்.
இத்திட்டம் முதலீட்டுச் சபையின் (Board of Investment – BOI) மேற்பார்வையின் கீழ் இயங்குவதுடன், சுகாதார அமைச்சு மற்றும் தேசிய மருந்துகள் ஒழுங்குபடுத்தல் அதிகாரசபை (NMRA) ஆகியன இதன் முக்கிய பங்குதாரர்களாகச் செயல்படும். உற்பத்தி செய்யப்படும் அனைத்துப் பொருட்களும் NMRA இன் விதிமுறைகள் மற்றும் நடைமுறையிலுள்ள விலை நிர்ணயக் கட்டமைப்புகளுக்கு இணங்க அமைந்திருக்கும்.
