உள்நாட்டு வருவாய்த் திணைக்களத்தின் கடுமையான அமலாக்க விதிகள் அவசியமானவை -நிதி அமைச்சின் வரிவிதிப்புக் கொள்கை ஆலோசகர் 

நிதி அமைச்சின் வரிவிதிப்புக் கொள்கை ஆலோசகர் தனுஜா பெரேரா, நாட்டின் பலவீனமான வரி இணக்கத்தன்மை (tax compliance) சூழலைக் கையாள்வதற்கு உள்நாட்டு வருவாய்த் திணைக்களத்தின் கடுமையான அமலாக்க விதிகள் அவசியமானவை என நியாயப்படுத்தியுள்ளார். தற்போது நான்கில் ஒரு பங்கிற்கும் குறைவான முதலாளிகளே கட்டாய வரி அறிக்கைகளைத் (returns) தாக்கல் செய்கின்றனர் என அவர் சுட்டிக்காட்டியுள்ளார்.

சரியான முறையில் வரி செலுத்தும் வர்த்தக நிறுவனங்கள் அச்சப்படத் தேவையில்லை என்றும், விருப்பத்தின் பேரிலான வாட் (VAT) பதிவு நடைமுறை தொடர்ந்து சாத்தியமானது என்றும், பெரும்பாலான வாட் வரித் திரும்பப் பெறுதல்கள் (VAT refunds) தற்போது சட்டப்பூர்வ காலக்கெடுவிற்குள் செயலாக்கப்பட்டு வருவதாகவும் அவர் தெரிவித்துள்ளார்.

இலங்கையின் வரிக் கொள்கை குறித்து அரிதாக இடம் பெறும் பகிரங்க விளக்கமளிப்பு ஒன்றில், நிதி அமைச்சின் வரிவிதிப்புக் கொள்கை ஆலோசகர் தனுஜா பெரேரா, சமீபத்திய வரிச் சீர்திருத்தங்கள் வரி முறையை நவீனமயமாக்கவும், நீதியை மேம்படுத்தவும், வரி இணக்கத்தன்மையை வலுப்படுத்தவுமே கொண்டுவரப்பட்டுள்ளன என்றும், முறையாக வரி செலுத்துவோர் மீது கூடுதல் சுமைகளை ஏற்றுவதற்காக அல்ல என்றும் வர்த்தகர்களுக்கு மறுஉறுதியளித்தார்.

‘கார்ப்பரேட் மேனேஜ்மென்ட் கன்சல்டன்ட்ஸ்’ (Corporate Management Consultants) ஏற்பாடு செய்திருந்த சமீபத்திய வரி மாற்றங்கள் குறித்த கருத்தரங்கில் உரையாற்றிய பெரேரா, வெளிநாட்டு டிஜிட்டல் சேவைகள் மீதான பெறுமதி சேர்க்கப்பட்ட வரி (VAT), சமீபத்திய சட்டத் திருத்தங்கள் மற்றும் உள்நாட்டு வருவாய் சட்டத்தின் கீழ் கொண்டுவரப்பட்டுள்ள கடுமையான அமலாக்க விதிகள் ஆகியவற்றின் பின்னணியில் உள்ள காரணங்களை விளக்கினார். அத்துடன், வரி இணக்கச் செலவுகள், வாட் வரித் திரும்பப் பெறுதல் மற்றும் இறக்குமதி செய்யப்படும் டிஜிட்டல் சேவைகளை நடத்தும் விதம் குறித்த கவலைகளுக்கும் அவர் பதிலளித்தார்.

அவரது உரையின் முக்கிய அங்கமாக, ஜூலை 1 ஆம் தேதி முதல் நடைமுறைக்கு வந்துள்ள, இலங்க நுகர்வோருக்கு வழங்கப்படும் வெளிநாட்டு டிஜிட்டல் சேவைகள் மீதான வாட் (VAT) வரி அறிமுகம் அமைந்திருந்தது.

இந்த நடவடிக்கை ஒரு புதிய வரி என்ற கருத்தை நிராகரித்த பெரேரா, இது வாட் வரி சேகரிக்கப்படும் முறையையும், அது எங்கு வசூலிக்கப்பட வேண்டும் என்பதையும் மட்டுமே மாற்றுகிறது என்று வாதாடினார்.

“இந்தச் சீர்திருத்தம் குறித்த மிகப்பெரிய தவறான புரிதல் என்னவென்றால், டிஜிட்டல் வாட் என்பது ஒரு புதிய வரி என்பதாகும்,” என்று கூறிய அவர், வழங்குநர் எங்கு இருந்தாலும், வாட் வரி என்பது எப்போதும் உள்நாட்டு நுகர்வு மீதான வரியாகவே வடிவமைக்கப்பட்டுள்ளது என்று விளக்கினார்.

இலங்கையின் முந்தைய வாட் கட்டமைப்பு, உள்ளூர் வர்த்தக நிறுவனங்களால் வழங்கப்படும் சேவைகளுக்கு வரி விதித்த போதிலும், வெளிநாடுகளில் இருந்து வழங்கப்படும் டிஜிட்டல் சேவைகள் உள்நாட்டில் நுகரப்படும் போது, அவற்றைக் வரி வலையமைப்பிற்குள் கொண்டுவருவதற்கான பயனுள்ள வழிமுறையைக் கொண்டிருக்கவில்லை என்று அவர் கூறினார். எனவே, இந்தத் திருத்தங்கள் சர்வதேச அளவில் அங்கீகரிக்கப்பட்ட ‘இலக்குக் கொள்கையை’ (destination principle) ஏற்றுக்கொண்டுள்ளன. இதன்படி, சேவை வழங்குநர் எங்கு செயல்படுகிறார் என்பதைக் காட்டிலும், நுகர்வோர் எங்கு அமைந்திருக்கிறாரோ அங்கேயே நுகர்வுக்கு வரி விதிக்கப்படும்.

ஐரோப்பிய ஒன்றியம், ஐக்கிய இராச்சியம், ஆஸ்திரேலியா, சிங்கப்பூர், இந்தியா மற்றும் தென்னாப்பிரிக்கா உள்ளிட்ட பல நாடுகளில் இக்கொள்கை பரவலாகப் பயன்படுத்தப்பட்டு வருவதாகப் பெரேரா குறிப்பிட்டார்.

புதிய கட்டமைப்பு முதன்மையாக வர்த்தகத்திலிருந்து நுகர்வோருக்கான (B2C) பரிவர்த்தனைகளை இலக்கு வைக்கிறது. இதன் மூலம் வெளிநாட்டு டிஜிட்டல் சேவை வழங்குநர்கள் இலங்கை நுகர்வோருக்குச் சேவைகளை வழங்கும்போது வாட் வரியைப் பதிவு செய்து கணக்குக் காட்ட வேண்டும். இருப்பினும், பல வர்த்தகத்திலிருந்து வர்த்தகத்திற்கான (B2B) பரிவர்த்தனைகள், இந்தத் தற்காலிகப் பதிவுக் கட்டமைப்பிற்கு வெளியே வருவதால், வாட் பதிவு செய்துள்ள உள்ளூர் வர்த்தக நிறுவனங்களின் வரி இணக்கச் சுமைகள் குறையும்.

இறக்குமதி செய்யப்படும் மென்பொருட்கள் (software) மற்றும் கிளவுட் சேவைகளை (cloud services) பெரிதும் நம்பியிருக்கும் புத்தொழில்கள் (startups) மற்றும் வர்த்தக நிறுவனங்களுக்கும் பெரேரா மறுஉறுதியளித்தார். விற்றுமுதல் (turnover) வரம்பைப் பொருட்படுத்தாமல், விருப்பத்தின் பேரிலான வாட் பதிவு நடைமுறை தொடர்ந்து சாத்தியமாகும் என்று அவர் குறிப்பிட்டார். விருப்பத்தின் பேரில் பதிவு செய்யும் வர்த்தக நிறுவனங்கள் உள்நாட்டு வருவாய்த் திணைக்களத்தின் (IRD) வாட் பதிவேட்டில் இடம்பெறுவர். இதன் மூலம், வெளிநாட்டு வழங்குநர்கள் அவர்களைப் பதிவு செய்த நபர்களாக அங்கீகரித்து, முன்கூட்டியே வாட் வரி விதிப்பதைத் தவிர்க்க முடியும் (இதற்கு அறிக்கையிடல் தேவைகள் பொருந்தும்).

இதனை நடைமுறைப்படுத்துவதற்கு முன்னதாக முக்கிய வெளிநாட்டு டிஜிட்டல் சேவை வழங்குநர்களுடன் அரசாங்கம் கலந்தாலோசித்ததாகவும், அவர்களின் கருத்துக்களுக்கு இணங்க பதிவு மற்றும் வரித் தாக்கல் நடைமுறைகளை எளிமையாக்கியுள்ளதாகவும் அவர் கூறினார். இந்த வரி ஜூலை 1 முதல் அமலுக்கு வந்தாலும், வெளிநாட்டு வழங்குநர்கள் உள்நாட்டு வருவாய்த் திணைக்களத்தில் பதிவை நிறைவு செய்ய செப்டம்பர் 30 வரை அவகாசம் உள்ளது.

இந்தச் சீர்திருத்தங்கள், வெளிநாட்டு வழங்குநர்களும் உள்ளூர் வர்த்தக நிறுவனங்களுக்கு இணையாக வாட் வரிப் பொறுப்புகளை எதிர்கொள்வதை உறுதி செய்வதன் மூலம் சந்தையில் போட்டி நடுநிலைமையை (competitive neutrality) மீண்டும் நிலைநிறுத்தும் என்று பெரேரா கூறினார்.

“வர்த்தக நிறுவனங்கள் தரம், கண்டுபிடிப்பு மற்றும் செயல்திறன் ஆகியவற்றில் போட்டியிட வேண்டுமே தவிர, ஒரு நிறுவனம் வரி வலையமைப்பிற்கு வெளியே இருப்பதன் காரணமாகப் போட்டியிடக் கூடாது,” என்று கூறிய அவர், உள்ளூர் வழங்குநர்கள் நீண்டகாலமாக வாட் வரியைச் சேகரித்து வந்த அதேவேளை, இலங்கையின் வாட் கட்டமைப்புக்கு வெளியே இயங்கும் வெளிநாட்டு வழங்குநர்களுடன் போட்டியிட வேண்டியிருந்தது என்பதைச் சுட்டிக்காட்டினார்.

சமீபத்திய சட்டத் திருத்தங்கள் குறித்து நிலவும் குழப்பங்களுக்கும் அவர் தெளிவுபடுத்தினார்.

ஆண்டு வாட் பதிவு வரம்பை 36 மில்லியன் ரூபாயாகக் குறைக்க வரவுசெலவுத் திட்டத்தில் (Budget) முன்மொழியப்பட்ட போதிலும், நாடாளுமன்றம் இறுதியாகச் சட்டத்தை இயற்றும்போது தற்போதைய 60 மில்லியன் ரூபாய் வரம்பையே தக்க வைத்துக் கொண்டது. இருப்பினும், சமூக பாதுகாப்பு பங்களிப்பு வரி (SSCL) வரம்பு தனிச் சட்டத்தின் கீழ் ஏற்கனவே 36 மில்லியன் ரூபாயாகக் குறைக்கப்பட்டுள்ளதுடன், அது ஜூலை 1 முதல் அமலுக்கு வந்துள்ளது என்பதை அவர் வலியுறுத்தினார்.

சமூக பாதுகாப்பு பங்களிப்பு வரி (SSCL) வரம்பும் மீண்டும் 60 மில்லியன் ரூபாயாக உயர்த்தப்பட்டதாக வெளிவந்த செய்திகள் தவறானவை என்று பெரேரா கூறினார்.

உள்நாட்டு வருவாய் சட்டத்தின் கீழ் அறிமுகப்படுத்தப்பட்ட கடுமையான அமலாக்க விதிகளை நியாயப்படுத்திய பெரேரா, அவை முறையாக வரி செலுத்துவோரைத் தண்டிப்பதற்காக அல்ல, மாறாகத் தொடர்ந்து நீடித்து வரும் பலவீனமான வரி இணக்கத்தன்மைக்கு அளிக்கப்பட்ட ஒரு பதிலடியாகும் என்றார்.

சில வர்த்தக நிறுவனங்கள் புதிய விதிகளை “கொடூரமானவை” (draconian) என்று விவரித்துள்ளதை ஒப்புக்கொண்ட அவர், வரி இணக்க நிலைகள் விதிவிலக்கான முறையில் மிகக் குறைவாக இருந்ததால் கடுமையான அபராதங்கள் அவசியமாகின என்று வாதாடினார். தற்போது நான்கில் ஒரு பங்கிற்கும் குறைவான முதலாளிகளே கட்டாய வேலைவாய்ப்பு வருமானப் பிரகடனங்களைத் (employment income declarations) தாக்கல் செய்கிறார்கள் என்று கூறிய அவர், தானாக முன்வந்து வரி செலுத்துவோரின் எண்ணிக்கை அதிகரிக்கும் போது அமலாக்க நடவடிக்கைகளின் தேவை குறையும் என்றார்.

“நேரத்திற்கு வரி அறிக்கையைத் தாக்கல் செய்யுமாறு நான் உங்களிடம் கேட்டுக்கொள்கிறேன். நீங்கள் எவ்வளவு அதிகமாக விதிமுறைகளுக்கு இணங்குகிறீர்களோ, அவ்வளவு தூரம் உங்கள் பிரச்சினைகள் குறையும்,” என்று அவர் கூறினார்.

ஏற்றுமதியாளர்களின் கவலைகளுக்குப் பதிலளித்த பெரேரா, வர்த்தக சமூகத்துடனான கலந்துரையாடல்களின்படி, பெரும்பாலான வாட் வரித் திரும்பப் பெறுதல்கள் (VAT refunds) தற்போது சட்டப்பூர்வ காலக்கெடுவிற்குள் செயலாக்கப்பட்டு வருவதாகக் குறிப்பிட்டார். இது சட்டச் சீர்திருத்தங்களுடன் வரி நிர்வாகத்திலும் ஏற்பட்டுள்ள முன்னேற்றங்களைக் காட்டுகிறது என்றார்.

நுகர்வோர் மீதான இந்தச் சீர்திருத்தங்களின் தாக்கம் குறித்துப் பேசிய அவர், விலை உயர்வு என்பது வெறும் சட்டத்தை மட்டும் சார்ந்தது அல்ல; அது சந்தைப் போட்டிச் சூழல், உற்பத்திச் செலவுகள் மற்றும் வர்த்தக நிறுவனங்களின் விலை நிர்ணய உத்திகள் ஆகியவற்றைப் பொறுத்தே அமையும் என்றார். போட்டி நிறைந்த சந்தைகளில் இயங்கும் வர்த்தக நிறுவனங்கள் கூடுதல் வரிச் சுமையின் ஒரு பகுதியை நுகர்வோருக்கு முழுமையாகக் கடத்தாமல், தாங்களே ஏற்றுக்கொள்ளக்கூடும் என்றும் அவர் குறிப்பிட்டார்.

பொருளாதாரம் பெருகிய முறையில் டிஜிட்டல் மயமாகி வரும் நிலையில், இலங்கையின் வாட் வரித் தளத்தைப் பாதுகாப்பதும், அதே வேளையில் மிகவும் நிலையான, சமமான மற்றும் நீடித்த வருவாய் கட்டமைப்பிற்கு ஆதரவளிப்பதுமே இந்தச் சீர்திருத்தங்களின் பரந்த நோக்கமாகும் என்று பெரேரா தெரிவித்தார்.

“ஒரு சேவை இலங்கையில் நுகரப்பட்டால், சேவை வழங்குநர் இலங்கையிலோ அல்லது வேறு எங்கு இருந்தாலும், அதற்கு இலங்கையிலேயே வரி விதிக்கப்பட வேண்டும்,” என்று அவர் தனது உரையை நிறைவு செய்தார்.