மேற்கு ஆசிய (மத்திய கிழக்கு) பிராந்தியத்தில் அதிகரித்துவரும் போர்ப் பதற்றங்கள் மற்றும் சாத்தியமான பாதுகாப்பு அச்சுறுத்தல்களைக் கருத்திற்கொண்டு, அமெரிக்கப் பிரஜைகளுக்காக உலகளாவிய பயண எச்சரிக்கை (Worldwide travel caution) ஒன்றினை அமெரிக்க இராஜாங்கத் திணைக்களம் (US Department of State) சனிக்கிழமை வெளியிட்டுள்ளது.
பிராந்தியத்தில் அமெரிக்கா மற்றும் ஈரான் ஆகிய இரு தரப்பினராலும் முன்னெடுக்கப்பட்டு வரும் தீவிர இராணுவ நடவடிக்கைகளுக்கு மத்தியில், எதிர்பாராத விதமாக மோதல்கள் வெடிக்கக்கூடிய ஒரு சிக்கலான பாதுகாப்புச் சூழல் நிலவுவதாக அமெரிக்கா எச்சரித்துள்ளது.
இராஜாங்கத் திணைக்களம் வெளியிட்டுள்ள உத்தியோகபூர்வ அறிக்கையின் முக்கிய விபரங்கள் கீழே தரப்பட்டுள்ளன:
தீவிரமடையும் அச்சுறுத்தல்களும் பாதுகாப்பு வழிகாட்டல்களும்:
-
அதிகரித்த எச்சரிக்கை: உலகெங்கிலும் உள்ள அமெரிக்கப் பிரஜைகள், குறிப்பாக மேற்கு ஆசியப் பிராந்தியத்தில் வசிப்பவர்கள் அல்லது பயணம் மேற்கொள்பவர்கள், மிக விழிப்புடனும் எச்சரிக்கையுடனும் இருக்குமாறு அறிவுறுத்தப்பட்டுள்ளனர்.
-
தூதரக வழிகாட்டல்: பிராந்தியத்தில் உள்ள அமெரிக்கர்கள் உடனுக்குடன் வெளியாகும் செய்திகளை உன்னிப்பாகக் கவனிப்பதுடன், தமக்கு மிக அருகிலுள்ள அமெரிக்கத் தூதரகம் அல்லது கொன்சியூலர் அலுவலகங்கள் (Consulate) வழங்கும் பாதுகாப்பு வழிகாட்டல்களைப் பின்பற்றுமாறு கேட்டுக்கொள்ளப்பட்டுள்ளனர்.
-
விமானப் போக்குவரத்து பாதிப்பு: பிராந்திய பதற்றங்கள் காரணமாக விமான சேவைகள் இரத்துச் செய்யப்படலாம் அல்லது அவ்வப்போது வான்பரப்புகள் மூடப்படலாம் (Airspace closures) என்பதால், பயணங்கள் பாதிக்கப்படக்கூடிய சாத்தியக்கூறுகள் உள்ளதாக எச்சரிக்கப்பட்டுள்ளது.
-
ஈரான் ஆதரவு குழுக்களின் இலக்குகள்: மத்திய கிழக்கு பிராந்தியத்திற்கு வெளியேயும் உள்ள அமெரிக்கத் தூதரக வளாகங்கள் கடந்த காலங்களில் இலக்கு வைக்கப்பட்டுள்ளதை சுட்டிக்காட்டியுள்ள இராஜாங்கத் திணைக்களம், ஈரான் ஆதரவு குழுக்கள் உலகெங்கிலும் உள்ள அமெரிக்க நலன்கள் அல்லது அமெரிக்கர்களுடன் தொடர்புடைய இடங்களைத் தாக்கக்கூடும் எனவும் குறிப்பிட்டுள்ளது.
பதற்றத்திற்கான பின்னணி:
அமெரிக்கா மற்றும் ஈரான் ஆகிய இரு நாடுகளுக்கும் இடையே பகைமையைக் குறைத்து, ஈரானின் அணுசக்தித் திட்டம் மற்றும் ஹோர்முஸ் நீரிணை (Strait of Hormuz) கடல்சார் பாதுகாப்பு குறித்த பேச்சுவார்த்தைகளுக்கு வழிவகுக்கும் நோக்கில் கடந்த மாதம் கையெழுத்திடப்பட்ட 14 அம்ச புரிந்துணர்வு ஒப்பந்தம் (14-point MoU) முறிவடைந்ததைத் தொடர்ந்தே இந்த உலகளாவிய பயண எச்சரிக்கை விடுக்கப்பட்டுள்ளது.
இந்த ஒப்பந்தத்தின் வீழ்ச்சியானது மேற்கு ஆசியாவில் மீண்டும் மோதலை தீவிரப்படுத்தியுள்ளது. இதன் விளைவாக, ஈரானிய இராணுவ மற்றும் சிவில் சொத்துக்கள் மீது அமெரிக்கா தாக்குதல்களை நடத்தியுள்ளதுடன், அதற்குப் பதிலடியாக வளைகுடாப் பிராந்தியத்தில் உள்ள அமெரிக்க இராணுவ முகாம்களை இலக்கு வைத்து ஈரானும் தாக்குதல்களை மேற்கொண்டு வருகின்றமை குறிப்பிடத்தக்கது.
