ஐக்கிய நாடுகளின் அபிவிருத்தித் திட்டத்தின் (UNDP) 2025ஆம் ஆண்டுக்கான மனித மேம்பாட்டு அறிக்கையின்படி, செயற்கை நுண்ணறிவு (AI) தொழில்நுட்பமானது தரவு பகுப்பாய்வு மற்றும் வழக்கமான பணிகளைத் தானியக்கமாக்குவதில் (Automation) சிறந்து விளங்கிய போதிலும், மனிதர்களின் மூலோபாய சிந்தனை மற்றும் தீர்மானங்கள் எடுக்கும் திறன்களுடன் ஒப்பிடுகையில் இன்னும் பின்தங்கியே காணப்படுகிறது. இதன் காரணமாக, AI என்பது மனிதர்களுக்கு மாற்றீடான ஒன்று அல்ல என்றும், மாறாக அது உற்பத்தித் திறனை அதிகரித்து, தங்களை மாற்றியமைத்துக் கொள்ளாத நிறுவனங்களின் திறமையின்மையை வெளிச்சம் போட்டுக் காட்டும் ஒரு சக்தியாகவே உருவெடுத்துள்ளது என்றும் நிபுணர்கள் சுட்டிக்காட்டுகின்றனர்.
இலங்கையின் தற்போதைய பொருளாதார மற்றும் தொழில்நுட்பச் சூழலில் செயற்கை நுண்ணறிவின் தாக்கம் குறித்து முன்னணி நிபுணர்கள் வெளியிட்ட கருத்துக்களின் தொகுப்பு கீழே தரப்பட்டுள்ளது:
ஆரம்பநிலை மற்றும் வழக்கமான வெள்ளைநிறக் காலர் (White-Collar) பணிகளுக்கு உடனடி ஆபத்து
தொழில்நுட்பத் தொழில்முனைவோரும் இணையப் பாதுகாப்பு ஆலோசகருமான லஹிரு லிவேரா ஊடகமொன்றுக்குக் கருத்துத் தெரிவிக்கையில்:
“செயற்கை நுண்ணறிவு என்பது வேலைவாய்ப்புகளை நேரடியாக ஒழித்துவிடாது; மாறாக வேலை செய்யும் முறையை மறுவடிவமைப்பு செய்யும். இதன் மூலம் தொழில் வல்லுநர்கள் வழக்கமான, சலிப்பூட்டும் பணிகளில் செலவிடும் நேரம் குறைந்து, மூலோபாயத் திட்டமிடல் மற்றும் முடிவெடுத்தல் போன்ற முக்கியமான பணிகளில் அதிக கவனம் செலுத்த முடியும்.”
ஆயினும், அடுத்த 3 முதல் 5 ஆண்டுகளில் ஆரம்பநிலை (Entry-level) மற்றும் மீண்டும் மீண்டும் செய்யக்கூடிய கணிணி சார்ந்த நிர்வாகப் பணிகள், தரவு உள்ளீடு (Data entry), வாடிக்கையாளர் சேவை, ஆரம்பநிலை உள்ளடக்க உருவாக்கம் (Junior content production) மற்றும் கணக்குப்பதிவு (Bookkeeping) போன்ற துறைகள் AI தொழில்நுட்பத்தால் பெருமளவில் உள்வாங்கப்படும் என அவர் எச்சரித்துள்ளார்.
இலங்கையைப் பொறுத்தமட்டில், தகவல் தொழில்நுட்பத் துறையிலுள்ள (IT Industry) ஆரம்பநிலை குறியீட்டு உருவாக்கம் (Basic coding), மென்பொருள் சோதனை (Testing) மற்றும் ஆவணமாக்கல் (Documentation) போன்ற பணிகளும், வணிகச் செயல்முறை அவுட்சோர்சிங் (BPO) துறையும் இதனால் பாதிக்கப்படலாம். எனினும், மனித உறவு மேலாண்மை, ஆக்கப்பூர்வமான சிக்கல் தீர்த்தல் மற்றும் ஆளுமை சார்ந்த பணிகள் தொடர்ந்து பாதுகாப்பாக இருக்கும் என லஹிரு லிவேரா குறிப்பிட்டுள்ளார்.
கடந்தகால தொழிற்புரட்சிகளைப் பிரதிபலிக்கும் தற்போதைய மாற்றம்
அட்வகேடா நிறுவனத்தின் (Advocata Institute) பிரதம நிறைவேற்று அதிகாரி தனநாத் பெர்னாண்டோ இது குறித்துப் பொருளாதார ரீதியிலான விரிவான பார்வையொன்றைப் பகிர்ந்துள்ளார்:
“கடந்த கால தொழிற்புரட்சிகளின் போது இயந்திரங்களும் கணினிகளும் அறிமுகமான போது, நீலநிறக் காலர் (Blue-collar) எனப்படும் உடலுழைப்பு சார்ந்த தொழிலாளர்களின் வேலைவாய்ப்புகள் குறித்தே பேசப்பட்டது. ஆனால், தற்போதைய AI புரட்சியானது முக்கியமாக வெள்ளைநிறக் காலர் (White-collar) எனப்படும் அலுவலகப் பணியாளர்களின் வேலைகளையே பாதிக்கப் போகிறது.”
இருப்பினும், வரலாற்று ரீதியாக தொழில்நுட்ப மாற்றங்கள் சில வேலை இழப்புகளை ஏற்படுத்தினாலும், அவை எப்போதும் புதிய வேலைவாய்ப்புகளையும் உற்பத்தித் திறனையும் தோற்றுவித்துள்ளன என்பதை அவர் சுட்டிக்காட்டியுள்ளார்.
பணிகளின் தன்மையே மாறுகின்றதே தவிர வேலைகள் அழியவில்லை
இலங்கையின் தேசிய AI ஆலோசனைக் குழுவின் முன்னாள் தலைவர் கலாநிதி ரொமேஷ் ரணவன இது குறித்துக் கருத்துத் தெரிவிக்கையில், செயற்கை நுண்ணறிவு முழுமையான ஒரு தொழிலை ஒழித்துவிடாது என்றும், மாறாக மிகச் சலிப்பான மற்றும் வழக்கமான பணிகளை மட்டுமே மாற்றியமைக்கும் என்றும் குறிப்பிட்டுள்ளார்:
“1980 அல்லது 90களின் முற்பகுதியில் ஒரு கணக்காளரின் (Accountant) பணியையும், இன்றைய கணக்காளரின் பணியையும் ஒப்பிட்டுப் பாருங்கள். இறுதி முடிவு ஒன்றுதான், ஆனால் அவர்கள் கணினி மற்றும் எக்செல் (Excel) கோப்புகளைப் பயன்படுத்தி வேலை செய்யும் முறை முற்றிலும் மாறியுள்ளது. இதையேதான் AI-யும் செய்யப் போகிறது.”
உள்கட்டமைப்பும் சட்ட விதிமுறைகளும் தான் தத்தெடுப்பு வேகத்தைத் தீர்மானிக்கும்
தனியார் துறையினர் எவ்வித சட்டக் கட்டுப்பாடுகளும் இன்றி AI தொழில்நுட்பத்தை மிக வேகமாகத் தத்தெடுத்து, தங்களது செயல்திறனை அதிகரித்து டிஜிட்டல் மயமாக்கலை நோக்கி நகர முடியும் என்று கலாநிதி ரொமேஷ் ரணவன தெரிவித்துள்ளார்.
இருப்பினும், வங்கி மற்றும் நிதித்துறை, பொது நிர்வாகம் மற்றும் அரச சேவைகள் போன்ற கடுமையான சட்ட விதிமுறைகளுக்குட்பட்ட துறைகளில் AI இன் பயன்பாடு மெதுவாகவே இருக்கும். தனிநபர் தரவுப் பாதுகாப்புச் சட்டங்கள் (Personal data protection laws), தனியுரிமை விதிமுறைகள் மற்றும் எல்லை கடந்த தரவுப் பரிமாற்றக் கட்டுப்பாடுகள் ஆகியன இத்துறைசார்ந்த மாற்றங்களுக்குப் பெரும் முட்டுக்கட்டையாக அமையலாம். எனவே, நாட்டின் உள்கட்டமைப்பு மேம்பாடும் சட்டச் சீர்திருத்தங்களும் இணையாக நகர்ந்தால் மட்டுமே அரச மற்றும் நிதித் துறைகளில் டிஜிட்டல் பரிணாமம் சாத்தியமாகும் என அவர் மேலும் விளக்கியுள்ளார்.
Chanod Iddawela
