இலங்கை சுற்றுலா வளர்ச்சி அதிகாரசபையின் தரவுகளின்படி, ஜப்பான் மற்றும் ஆஸ்திரேலியாவில் இருந்து சுற்றுலாப் பயணிகளின் வருகை கணிசமாக அதிகரித்துள்ளதால், கடந்த மூன்று மாதங்களாக காணப்பட்ட சரிவுக்கு முற்றுப்புள்ளி வைக்கும் வகையில் செப்டம்பர் முதல் 27 நாட்களில் சுற்றுலாப் பயணிகளின் வருகை கடந்த ஆண்டின் இதே காலப்பகுதியுடன் ஒப்பிடுகையில் 0.4 சதவீதம் உயர்ந்துள்ளது.
செப்டம்பர் 01 முதல் 27 வரை இலங்கைக்கு 143,623 சுற்றுலாப் பயணிகள் வருகை தந்துள்ளனர். கடந்த ஆண்டு இதே காலப்பகுதியில் 143,085 சுற்றுலாப் பயணிகள் வருகை தந்திருந்தனர்.
கடந்த செப்டம்பரின் மொத்த வருகையான 158,971 ஐ விட அதிகரிக்க, இறுதி மூன்று நாட்களில் மேலும் 15,348 பயணிகள் வருகை தர வேண்டும். 2025 இல் இதே மூன்று நாட்களில் 15,886 பயணிகள் வந்திருந்தனர். இது நடந்தால், மே மாதத்திற்குப் பிறகு பதிவாகும் முதல் மாதாந்த வளர்ச்சியாக இது அமையும்.
ஜப்பானில் இருந்து 5,187 சுற்றுலாப் பயணிகள் வருகை தந்துள்ளனர். இது கடந்த செப்டம்பரின் முழு மாத மொத்தமான 4,137 ஐ விட அதிகமாகும். இதன் மூலம் சுற்றுலா சந்தைப் பட்டியலில் ஜப்பான் 10 ஆவது இடத்தில் இருந்து 6 ஆவது இடத்திற்கு முன்னேறியுள்ளது.
ஆகஸ்ட் 25 அன்று ஜெட்ஸ்டார் (Jetstar) நிறுவனம் மெல்போர்ன் – கொழும்பு இடையே நேரடி குறைந்த கட்டண விமான சேவையைத் தொடங்கியதைத் தொடர்ந்து, ஆஸ்திரேலியாவின் வருகையும் கடந்த செப்டம்பரின் 9,105 ஐத் தாண்டி 10,067 ஆக உயர்ந்து, 5 ஆவது இடத்தில் இருந்து 3 ஆவது இடத்திற்கு முன்னேறியுள்ளது. சீனா 10,081 வருகைகளுடன் 2 ஆம் இடத்திற்கு நகர்ந்துள்ளது.
இருப்பினும், கடந்த ஆண்டு செப்டம்பர் முழுவதிலும் ஜெர்மனியிலிருந்து 9,344 பேர் வந்த நிலையில், இம்முறை 6,745 பயணிகள் மட்டுமே வந்துள்ளனர். ஸ்பெயினில் இருந்து 4,841 க்கு பதிலாக 3,163 பேரும், பங்களாதேஷில் இருந்து 4,953 க்கு பதிலாக 3,923 பேரும் வந்துள்ளனர்.
கடந்த செப்டம்பரில் 4,433 வருகைகளுடன் 9 ஆம் இடத்தில் இருந்த நெதர்லாந்து, இம்முறை முதல் 10 இடங்களுக்குள் இடம்பெறவில்லை. செப்டம்பர் 27 வரையிலான மொத்த வருகையான 1,678,745 ஆகும், இது கடந்த ஆண்டின் இதே காலப்பகுதியுடன் ஒப்பிடும்போது 30,863 அல்லது 1.8 சதவீதம் குறைவாகும். ஜனவரி மற்றும் பிப்ரவரி மாதங்களில் சுற்றுலாப் பயணிகளின் வருகை 12.9 சதவீதம் வளர்ச்சியடைந்த போதிலும், மேற்கு ஆசிய மோதல் காரணமாக விமானத் தொடர்புகள் பாதிக்கப்பட்டதால் மார்ச் மாதத்திலிருந்து 7.8 சதவீதம் சரிவைச் சந்தித்துள்ளது.
வளைகுடா வான்வெளி மூடப்பட்டதால், மோதலின் முதல் நாட்களில் இலங்கைக்கு மற்றும் இலங்கையிலிருந்து இயக்கப்படவிருந்த 205 விமானங்கள் ரத்து செய்யப்பட்டன. மேலும் ஐரோப்பாவிற்கான விமானங்கள் மத்திய கிழக்கு வான்வெளியைத் தவிர்க்க வேறு பாதைகளில் திருப்பி விடப்பட்டன.
இந்தியாவிலிருந்தான வருகை கடந்த ஆண்டின் முதல் ஒன்பது மாதங்களுடன் ஒப்பிடுகையில் ஏற்கனவே 14.9 சதவீதம் அதிகரித்து 431,162 ஆக உள்ளது. அதேவேளையில் ரஷ்யாவிலிருந்தான வருகை 32.3 சதவீதம் குறைந்து 82,733 ஆக உள்ளது.
இதற்கிடையில், குளிர்கால உச்ச காலத்திற்கு முன்னதாக விமானத் தொடர்புகள் மேம்படவுள்ளன. பிரிட்டிஷ் ஏர்வேஸ் (British Airways) 11 ஆண்டுகளுக்கு மேலான இடைவெளிக்கு பிறகு அக்டோபர் 23 அன்று லண்டன் கேட்விக் – கொழும்பு விமான சேவையை மீண்டும் தொடங்குகிறது. எடெல்வீஸ் (Edelweiss) நிறுவனம் அக்டோபர் 26 முதல் சூரிச் – கொழும்பு சேவையை வாரத்திற்கு மூன்று விமானங்களாக உயர்த்தவுள்ளது. ஃபிரெஞ்ச் பீ (French Bee) நிறுவனமும் டிசம்பர் 19 அன்று பாரிஸ் ஓர்லி – கொழும்பு விமான சேவையைத் தொடங்க உள்ளது.
ரஷ்ய விமான நிறுவனங்கள் அக்டோபர் முதல் ஏப்ரல் வரை எட்டு ரஷ்ய நகரங்களில் இருந்து மத்தள மற்றும் கொழும்புக்கு சுமார் 50,000 குளிர்கால ஆசனங்களைக் கொண்டுவரவுள்ளன. இது நடப்பு ஆண்டில் 39,411 வருகைச் சரிவைச் சந்தித்துள்ள ரஷ்ய சந்தைக்குப் புத்துயிர் அளிக்கூடும்.
ஆண்டின் இறுதிக்குள் 2.5 மில்லியன் சுற்றுலாப் பயணிகளை ஈர்க்கும் இலக்கை அடைவதற்கு இந்த கூடுதல் விமானச் சேவைகள் மிகவும் முக்கியமாகும். இந்த இலக்கை அடைய செப்டம்பர் 28 முதல் டிசம்பர் 31 வரை 821,255 பயணிகள் வருகை தர வேண்டும். இது கடந்த ஆண்டின் இதே காலப்பகுதியுடன் ஒப்பிடும்போது 25.8 சதவீத வளர்ச்சியாகும். 2025 ஆம் ஆண்டின் இதே காலப்பகுதியில் இலங்கை 652,913 சுற்றுலாப் பயணிகளை வரவேற்று 12.2 சதவீத வளர்ச்சியைப் பதிவு செய்திருந்தமை குறிப்பிடத்தக்கது
