திருடப்பட்ட பணத்தை கண்டறிவதற்காக வெளிநாட்டு நிறுவனமொன்றை நியமித்துள்ளதாக தேசிய அபிவிருத்தி வங்கி தெரிவித்துள்ளது
சுயாதீன தடயவியல் தணிக்கை (forensic audit) நிறைவடைந்துள்ளதாகக் குறிப்பிட்டுள்ள தேசிய அபிவிருத்தி வங்கி (NDB), டெலாய்ட் (Deloitte) நிறுவனத்தின் இறுதி அறிக்கையின்படி மோசடித் தொகை 13.64 பில்லியன் ரூபாய் எனத் கணக்கிடப்பட்டுள்ளதாகத் தெரிவித்துள்ளது. இது ஜூன் மாத இடைக்கால மதிப்பீட்டை விட 60 மில்லியன் ரூபாய் அதிகமாகும்.
தணிக்கைக் கண்டுபிடிப்புகள் வங்கியின் உள்நாட்டு விசாரணையுடன் பரந்தளவில் ஒத்துப்போவதாகத் தெரிவித்துள்ள வங்கி, இதற்குப் பொறுப்பானவர்களுக்கு எதிராக உள்நாட்டு நடவடிக்கைகளை ஆரம்பித்துள்ளதாகக் கூறியுள்ளது.
வாடிக்கையாளர்கள் எவருக்கும் எவ்வித இழப்பும் ஏற்படவில்லை என வலியுறுத்தியுள்ள வங்கி, கட்டுப்பாடுகள் மற்றும் ஆளுமை குறித்த தடயவியல் பரிந்துரைகள் நடைமுறைப்படுத்தப்பட்டு வருவதாகவும் தெரிவித்துள்ளது.
இந்த ஆண்டின் தொடக்கத்தில் கண்டறியப்பட்ட மோசடியில் இழக்கப்பட்ட நிதியை மீட்பதற்காக, திருடப்பட்ட பணம் மற்றும் டிஜிட்டல் சொத்துக்களைக் கண்டறிவதில் நிபுணத்துவம் பெற்ற வெளிநாட்டு நிறுவனம் ஒன்றை NDB வங்கி நியமித்துள்ளதாக நேற்றுத் தெரிவித்துள்ளது.
டெலாய்ட் டச் தோமாட்சு இந்தியா எல்.எல்.பி (Deloitte Touche Tohmatsu India LLP) நிறுவனத்திடமிருந்து இறுதி அறிக்கையைப் பெற்றுள்ளதாகத் தெரிவித்துள்ள வங்கி, ஜூன் 26 அன்று இடைக்கால அறிக்கையைத் தொடர்ந்து அறிவிக்கப்பட்ட 13,579,664,684 ரூபாய்க்கு மாறாக, மோசடித் தொகை 13,639,664,684 ரூபாய் என்பதை அது உறுதிப்படுத்தியுள்ளதாகக் கூறியுள்ளது.
கூடுதல் 60 மில்லியன் ரூபாய், பொருந்தக்கூடிய கணக்கியல் தரநிலைகளுக்கு ஏற்ப வங்கியின் கணக்குகளில் அங்கீகரிக்கப்படும் என்று NDB தெரிவித்துள்ளது.
துஷ்பிரயோகம் செய்யப்பட்ட நிதியை மீட்க அனைத்து வழிகளையும் பின்பற்றி வருவதாக NDB தெரிவித்துள்ளது. மேலும், இந்த மோசடிக்கு வசதியாக அமைந்த கூட்டுச் சதி, மேற்பார்வைக் குறைபாடு மற்றும் கட்டுப்பாட்டுத் தவறுகளுக்குப் பொறுப்பானவர்கள் என அடையாளம் காணப்பட்டவர்களுக்கு எதிராக உள்நாட்டு நடவடிக்கைகளையும் அது தொடங்கியுள்ளது.
மறுபரிசீலனை செய்யப்பட்ட முறிவின்படி, 2025 ஜனவரி 1 ஆம் திகதிக்கு முந்தைய காலப்பகுதிக்கு 1.46 பில்லியன் ரூபாய் ஒதுக்கப்பட்டுள்ளது (இது இடைக்கால அறிக்கையில் 1.42 பில்லியன் ரூபாயாக இருந்தது). மேலும் 2026 மார்ச் 31 உடன் முடிவடைந்த காலாண்டிற்கு 2.56 பில்லியன் ரூபாய் ஒதுக்கப்பட்டுள்ளது (இது 2.55 பில்லியன் ரூபாயாக இருந்தது). 2025 டிசம்பர் 31 உடன் முடிவடைந்த நிதியாண்டிற்கு ஒதுக்கப்பட்ட 9.62 பில்லியன் ரூபாயில் எந்த மாற்றமும் இல்லை.
இறுதித் தொகையானது, 2026 ஏப்ரல் 6 அன்று வங்கியால் அறிவிக்கப்பட்ட முதற்கட்ட உள்நாட்டு மதிப்பீடான 13.2 பில்லியன் ரூபாயுடன் ஒப்பிடப்படுகிறது, இது அதன் முதல் காலாண்டு இடைக்கால நிதி அறிக்கைகளில் அங்கீகரிக்கப்பட்டது. இடைக்கால டெலாய்ட் தொகை இரண்டாவது காலாண்டு அறிக்கைகளில் அங்கீகரிக்கப்பட்டது.
அறிக்கையின் கண்டுபிடிப்புகள் பொதுவாக உள்நாட்டில் கண்டறியப்பட்டவற்றுடன் ஒத்துப்போவதாக வங்கி தெரிவித்துள்ளது. இந்த விவகாரங்கள் சட்ட அமலாக்க அதிகாரிகளுக்கு அறிவிக்கப்பட்டுள்ளதாகவும், குற்றவியல் நீதிமன்றங்களில் குற்றவாளிகளுக்கு எதிரான நடவடிக்கைகள் நிலுவையில் உள்ளதாகவும் தெரிவிக்கப்பட்டுள்ளது.
செயல்முறையின் சுயாதீனத்தை உறுதிப்படுத்துவதற்காக, இலங்கை மத்திய வங்கியின் (CBSL) வங்கி மேற்பார்வை பணிப்பாளருடன் கலந்தாலோசித்து, அவர்களின் பரிந்துரைகளுக்கு அமையவே டெலாய்ட் நிறுவனம் நியமிக்கப்பட்டதாகவும், அதன் அறிக்கையை நேரடியாக மத்திய வங்கிக்கு சமர்ப்பிக்க வேண்டும் என்றும் (வங்கிக்கு அதன் பிரதி அனுப்பப்பட்டது) வங்கி தெரிவித்துள்ளது.
கட்டுப்பாட்டுத் தவறுகள், தொழில்நுட்பக் குறைபாடுகள் மற்றும் ஆளுமை மேம்பாடுகள் குறித்து அறிக்கையில் செய்யப்பட்டுள்ள பரிந்துரைகள் நடைமுறைப்படுத்தப்பட்டு வருவதாகவும், எடுக்கப்பட்டு வரும் நடவடிக்கைகள் குறித்து மத்திய வங்கிக்கு தொடர்ந்து புதுப்பித்து வருவதாகவும் வங்கி தெரிவித்துள்ளது.
இந்த மோசடியின் காரணமாக எந்தவொரு வாடிக்கையாளரும் இழப்பை சந்திக்கவில்லை என்றும், வாடிக்கையாளர்களின் கணக்கு நிலுவைகள் பாதுகாப்பாக உள்ளதாகவும் NDB மீண்டும் வலியுறுத்தியுள்ளது. வங்கி போதுமான மூலதனத்துடனும் நல்ல திரவத்தன்மை நிலைகளுடனும் இயங்கி வருவதாக அது கூறியுள்ளது.
“இந்தத் தடயவியல் அறிக்கையை இந்த அத்தியாயத்தின் முடிவாக வங்கி கருதவில்லை என்பதை அதன் வைப்பாளர்கள், வாடிக்கையாளர்கள் மற்றும் ஏனைய அனைத்து தரப்பினருக்கும் உறுதிப்படுத்த விரும்புகிறது,” என NDB இன் பணிப்பாளர்/பிரதான நிறைவேற்று அதிகாரி கெலும் எதிரிசிங்க கையொப்பமிட்டு வெளியிட்டுள்ள அறிக்கையில் தெரிவிக்கப்பட்டுள்ளது. தனது நம்பகத்தன்மையையும் நற்பெயரையும் மீண்டும் கட்டியெழுப்புவதற்கான ஒரு படியாகவே இந்த அறிக்கையை வங்கி கருதுவதாகவும், நிதித்துறைக்கு ஒரு முன்மாதிரியாக விளங்கும் இணக்கம் மற்றும் ஆளுமைச் சட்டகத்தை உருவாக்க அர்ப்பணிப்புடன் இருப்பதாகவும் தெரிவித்துள்ளார்.
NDB இந்த மோசடியை முதன்முதலில் 2026 ஏப்ரல் 2 அன்று வெளிப்படுத்தியது. சில ஊழியர்கள், மூன்றாம் தரப்பினருடன் இணைந்து இதில் ஈடுபட்டுள்ளதாகக் கூறியதுடன், முதற்கட்ட விசாரணைகளின்படி இதன் தாக்கம் சுமார் 380 மில்லியன் ரூபாயாக இருக்கும் என்றும் விசாரணைகள் தொடர்வதாகவும் தெரிவித்திருந்தது. சில நாட்களுக்குப் பிறகு, வங்கி தனது மதிப்பீட்டை 13.2 பில்லியன் ரூபாயாக உயர்த்தியது. அதனைத் தொடர்ந்து டெலாய்ட் இந்தியா நிறுவனம் தடயவியல் தணிக்கையாளராக நியமிக்கப்பட்டது.
மே மாதத்தில், வங்கியின் பொதுப் பேரேட்டுக் கணக்கிலிருந்து (general ledger account) நிதியைத் தவறாகப் பயன்படுத்தியமைக்கு உடந்தையாக இருந்ததாகக் கண்டறியப்படும் எந்தவொரு உயர் NDB அதிகாரிகளையும் கைது செய்து நீதிமன்றத்தில் ஆஜர்படுத்துமாறு கொழும்பு தலைமை நீதவான் குற்றப் புலனாய்வுத் துறைக்கு (CID) உத்தரவிட்டார்.
அக்காலப்பகுதியில் விளக்கமறியலில் வைக்கப்பட்டிருந்த சந்தேகநபர்கள்: நிதிப் பிரிவின் உதவிப் முகாமையாளர் லஹிரு கொடிகார, அவரது சகோதரர் பத்தும் கொடிகார, வங்கியின் தரவு ஆபரேட்டர் சரங்க கோசல மற்றும் தொழிலதிபர் மொஹமட் இன்ஹமுல் ஹஷன் ஆவர்.
முதலாவது சந்தேகநபர் ஏனைய அதிகாரிகளின் நம்பிக்கையைப் பெற்று இந்த மோசடியைத் திட்டமிட்டு நடத்தியதாகவும், 2022 முதல் பொதுப் பேரேட்டுக் கணக்கில் எந்தவொரு தணிக்கையும் நடத்தப்படவில்லை என்றும், 900 சந்தேகத்திற்கிடமான கணக்குகள் அடையாளம் காணப்பட்டுள்ளதாகவும் CID நீதிமன்றத்தில் தெரிவித்தது. இந்த மோசடி தொடர்பான புகார்களைத் தொடர்ந்து மத்திய வங்கி வெளியிட்ட பரிந்துரைகளை உயர் அதிகாரிகள் மறைத்தார்களா என்பது குறித்து அறிக்கை சமர்ப்பிக்குமாறும் நீதவான் கோரியிருந்தார்.
ஜூன் மாதத்தில், நாடாளுமன்ற உறுப்பினர் கலாநிதி ஹர்ஷ டி சில்வா தலைமையிலான நாடாளுமன்ற அரசாங்க நிதி பற்றிய குழு (CoPF), வங்கியின் கணக்குகளில் சந்தேகத்திற்கிடமான நிலுவைகள் குவிந்தபோது மேற்பார்வைக் குறைபாடுகள் ஏற்பட்டதா மற்றும் எச்சரிக்கை சமிக்ஞைகள் தவறவிடப்பட்டனவா என்பது குறித்து மத்திய வங்கியை தீவிர விசாரணைக்கு உட்படுத்தியது.
விசாரணையில் உள்ள நிறுவனமாக NDB இருந்தபோதிலும், தடயவியல் தணிக்கையின் குறிப்புரைகளை (terms of reference) வரைவதில் அது ஏன் பங்கேற்றது என்று உறுப்பினர்கள் கேள்வி எழுப்பினர். மத்திய வங்கி ஆளுநர் கலாநிதி நந்தலால் வீரசிங்க, ஒழுங்குமுறை அமைப்பே அதன் நோக்கம் மற்றும் வரம்பை வரையறுத்ததாகத் தெரிவித்தார்.
மோசடியின் மையத்தில் இருப்பதாகக் கூறப்படும் ஊழியர், ஒப்பிட்டுப் பார்த்தல் (reconciliation) மற்றும் பரிவர்த்தனை உள்ளீட்டுச் செயல்பாடுகளில் ஒன்பது ஆண்டுகளுக்கும் மேலாகப் பணியாற்றியதால், மதிப்பாய்வு 10 ஆண்டுகளுக்கு நீட்டிக்கப்பட்டதாக மத்திய வங்கி தெரிவித்துள்ளது.
வழக்கமாக சில மணிநேரங்களுக்குள் தீர்க்கப்படும் நிகழ்நேர இடைவங்கி செலுத்தல் அமைப்பான ‘வாடிக்கையாளர் மின்னணு நிதிப் பரிமாற்ற’ (CEFT) பரிவர்த்தனைகளுடன் தொடர்புடைய பெறத்தக்கவைகள் (receivables), தீவிர பரிசீலனை இன்றி எவ்வாறு சுமார் 3 பில்லியன் ரூபாயில் இருந்து 12 பில்லியன் ரூபாய்க்கும் அதிகமாக உயர்ந்தது என மக்கள் பிரதிநிதிகள் கேள்வி எழுப்பினர்.
வங்கி மேற்பார்வை என்பது முன்னெச்சரிக்கை தன்மையுடையது என்றும் அது பரிவர்த்தனை அளவிலான தணிக்கைகளுக்கு நீட்டிக்கப்படாது என்றும் மத்திய வங்கி அதிகாரிகள் குறிப்பிட்டனர், இந்த விளக்கத்தைப் பல உறுப்பினர்கள் விமர்சித்தனர். இந்த மோசடியைத் தொடர்ந்து செயல்பாட்டு இடர் மேலாண்மை மற்றும் நிதி ஒழுக்கச் சட்டகங்களின் மேற்பார்வையை வலுப்படுத்த வேண்டியதன் அவசியத்தை சுட்டிக்காட்டிய IMF இன் மே மாத மதிப்பாய்வையும் உறுப்பினர்கள் மேற்கோள் காட்டினர். இடைக்கால மற்றும் இறுதி அறிக்கைகள் பெறப்பட்ட பிறகு CoPF இந்த விவகாரத்தை மீண்டும் பரிசீலிக்கும் என்று கலாநிதி டி சில்வா தெரிவித்தார்
