டுபாயில் இருந்து டெல் அவிவ் நோக்கிச் சென்ற விமானத்தின் ஒரு விமானி, சக விமானியைக் குத்திவிட்டு விமானத்தைக் கட்டுப்பாட்டுக்குள் கொண்டுவர முயன்ற சம்பவத்தில் ஈரானுக்கு ஏதேனும் தொடர்புள்ளதா என்பது குறித்துக் கூறுவது இன்னும் முன்கூட்டிய ஒன்றாகும் என்று இஸ்ரேலிய பிரதமர் தெரிவித்துள்ளார்.
புதன்கிழமை தனது பயணத்தின் இரண்டு மணிநேரத்தில் ‘பிளைடுபாய்’ (Flydubai) விமானம் 17,000 அடிகளுக்கும் (5,200 மீ) அதிகமான உயரத்திலிருந்து திடீரெனக் கீழே இறங்கியது. பின்னர் பயணிகள் மற்றும் பணியாளர்கள் தாக்குதல் நடத்தியவரைக் கட்டுப்படுத்தி, விமானத்தின் கட்டுப்பாட்டை மீண்டும் பெற்று பாதுகாப்பாகத் தரையிறக்கினர்.
கத்திக்குத்து காயமடைந்த விமானியான இந்தியக் நாட்டவரான கப்டன் ஸ்மித் மச்சார் (Smit Machchhar) மருத்துவமனையில் அனுமதிக்கப்பட்டு சீரான நிலையில் உள்ளார், மேலும் அவரை ஒரு “உண்மையான வீரன்” என்று பிரதமர் பெஞ்சமின் நெதன்யாகு பாராட்டியுள்ளார்.
விமானத்தைச் செயலிழக்கச் செய்ய முயன்ற தாக்குதல்தாரியை, மற்ற பயணிகள் பிடித்து வைப்பதற்கு முன்னர் தான் அவரது கழுத்தை நெரித்துப் பிடித்ததாக யானிவ் ஹயூன் (Yaniv Hayun) என்ற பயணி விவரித்தார்.
சவூதி அரேபியாவில் கைது செய்யப்பட்ட சந்தேக நபரான தாக்குதல்தாரி, விமானம் புறப்பட்ட ஐக்கிய அரபு அமீரகத்திற்கு மாற்றப்படுவார் என எதிர்பார்க்கப்படுவதாக Fox News ஊடகத்திடம் நெதன்யாகு தெரிவித்தார்.
இதுவரை ஈரானின் தொடர்பு குறித்த ஏதேனும் அறிகுறி உள்ளதா என்று கேட்கப்பட்டதற்கு, “அதைச் சொல்வது இன்னும் முன்கூட்டிய ஒன்றாகும்” என்று அவர் பதிலளித்தார். அந்த விமானி “தற்போது சவூதி அரேபியாவில் விசாரணைக்கு உட்படுத்தப்பட்டு வருகிறார்” என்றும் அவர் மேலும் கூறினார்.
இச்சம்பவத்தைத் தொடர்ந்து நெதன்யாகுவுடன் பேசியதாகக் கூறிய அமெரிக்க ஜனாதிபதி டொனால்ட் ட்ரம்ப், தாக்குதல் நடத்தியவர் “ஒருவேளை பயங்கரவாதியாக இருக்கலாம்” அல்லது இந்தத் தாக்குதலுக்கு வேறு காரணங்கள் இருக்கலாம் என்று தோன்றுவதாகக் கூறினார்.
கூடுதல் விவரங்கள் எதையும் வழங்காமல், இஸ்ரேலிய பாதுகாப்பு அமைச்சர் இஸ்ரேல் காட்ஸ் இதனை ஒரு “ஜிஹாதி பயங்கரவாதத் தாக்குதல் முயற்சி” என்று அழைத்துள்ளார்.
174 பயணிகளுடன் இஸ்ரேலுக்குப் பறந்து கொண்டிருந்த விமானத்தில் நடந்த இச்சம்பவம் குறித்து இஸ்ரேலுக்கு எந்தவொரு முன்னெச்சரிக்கையோ அல்லது உளவுத்துறைத் தகவலோ இருக்கவில்லை என்று நெதன்யாகு CNN ஊடகத்திடம் தெரிவித்தார்.
பிளைடுபாய் நிறுவனத்தின் FZ1073 என்ற விமானம், அமீரகத்தின் டுபாய் சர்வதேச விமான நிலையத்திலிருந்து ஜிஎம்டி 03:05 மணிக்கு (உள்ளூர் நேரம் காலை 07:05) பென் குரியன் விமான நிலையத்தை நோக்கிப் புறப்பட்டது.
இரண்டு மணி நேரத்திற்குப் பிறகு, 17,000 அடி உயரம் குறைந்தமை Flightradar24 என்ற விமானக் கண்காணிப்பு இணையதளத்தில் பதிவானது. சில நிமிடங்களுக்குப் பிறகு விமானம் ‘squawk 7700’ என்ற அவசரக் குறியீட்டைச் சமிக்ஞை செய்தது, பின்னர் அதை ‘squawk 7500’ என்ற கடத்தல் குறித்த குறியீட்டிற்கு மாற்றியது.
இந்தக் குறியீடுகள் சமிக்ஞை செய்யப்பட்டு சுமார் 20 நிமிடங்களுக்குப் பிறகு, விமானம் சவூதி அரேபியாவில் தரையிறங்குவதற்காகக் கைகளால் இயக்கும் இறங்குதலைத் (manual descent) தொடங்கியது. ஒரு மணி நேரத்திற்கும் குறைவான நேரத்தில், விமானம் மீண்டும் ‘squawk 7700’ குறியீட்டிற்கு மாறியது.
நேரில் கண்ட சாட்சிகளின் கூற்றுக்கள் மற்றும் நெதன்யாகுவின் அறிக்கை ஆகியன, விமானிகளில் ஒருவர் மற்றவரைக் கத்தியால் குத்தியதை உறுதிப்படுத்தின, மேலும் இஸ்ரேலிய பிரதமரின் கூற்றுப்படி, அவர் “விமானத்தை மோதி அழிக்க முயன்றதாகத் தெரிகிறது”.
விமானத்தில் இருந்த தானும் மற்றவர்களும் எவ்வாறு தாக்குதல்தாரியைக் கட்டுப்படுத்தினார்கள் என்பதை பயணி ஹயூன் விவரித்தார்.
“கத்தியால் குத்தப்பட்ட விமானி கதவுக்கு மிக அருகில் இருந்தார், அதனால் எங்களால் அதைத் திறப்பது கடினமாக இருந்தது,” என்று பிரதமரின் அலுவலகத்தால் சமூக வலைத்தளங்களில் வெளியிடப்பட்ட வீடியோவில் ஹயூன் கூறினார், ஆனால் காயமடைந்த விமானி மயங்கி விழுவதற்கு முன், கதவைத் திறக்க முடிந்தது.
விமானத்தைச் செயலிழக்கச் செய்ய முயன்ற தாக்குதல்தாரியை, மற்ற பயணிகள் பிடித்து வைப்பதற்கு முன்னர் தான் அவரது கழுத்தை நெரித்துப் பிடித்ததாக யானிவ் கூறினார்.
தான் விமானத்தின் “கட்டுப்பாடுகளை இழுத்ததாகக்” கூறிய அவர், விமானம் சமநிலையை அடைந்ததும் மற்றொரு விமானி கட்டுப்பாட்டைப் பொறுப்பேற்றதாகச் சேர்த்துக் கூறினார்.
விமானத்தில் பயணம் செய்த இரண்டு பணியாளர்கள் விமானத்தைப் பாதுகாப்பாகத் தரையிறக்கியதை பிளைடுபாய் நிறுவனம் உறுதிப்படுத்தியுள்ளது.
மற்றொரு பயணியான ஸ்விகா மெனஸ் (Zvika Meness), இஸ்ரேலிய பொது ஒளிபரப்பான Kan News இடம் பேசுகையில், தானும் பிற பயணிகளும் தாக்குதல்தாரியை “அவரது சொந்த ஜிப் டைகளாலாலும் (zip ties) மற்றும் மல்டிமீடியா ஹெட்ஃபோன்களாலும்” கட்டியதாகத் தெரிவித்தார்.
அவர் கூறுகையில்: “இங்கே குழந்தைகளும் குடும்பத்தினரும் உள்ளனர், அவர்கள் மிகவும் கடுமையான, அதிர்ச்சிகரமான நிகழ்வைக் கடந்து வந்துள்ளனர்.”
காயமடைந்த விமானி மச்சாரை “வீரன்” என்று நெதன்யாகுவும் இந்தியப் பிரதமர் நரேந்திர மோடியும் பாராட்டியுள்ளனர்.
“கத்தியால் குத்தப்பட்டு பலத்த காயமடைந்த போதிலும், அவர் போராடி, எதிர்த்து, காக்பிட் (cockpit) கதவைத் திறந்து, பயணிகளும் பணியாளர்களும் தாக்குதல்தாரியைக் கட்டுப்படுத்த உதவினார் – இதன் மூலம் வான்வெளியில் நேரவிருந்த ஒரு பேரழிவைத் தடுத்துள்ளார்,” என்று நெதன்யாகு X தளத்தில் பதிவிட்டுள்ளார்.
விமானியின் செயலைப் பாராட்டிய மோடி X தளத்தில், “மிகக் கடுமையான ஆபத்தை எதிர்கொண்டபோதும், பலத்த காயமடைந்தபோதிலும், அவர் மற்றவர்களின் உயிரைப் பாதுகாக்க அளப்பரிய தைரியத்தையும் தளராத மன உறுதியையும் காட்டினார்” என்று எழுதியுள்ளார்.
இந்தியப் பிரதமர் மோடியும், இந்திய அரசாங்கமும் ஸ்மித் மச்சார் காட்டிய “அளப்பரிய தைரியத்திற்காக” அவருக்குப் பாராட்டு தெரிவித்துள்ளனர்.
கிட்டத்தட்ட அனைவரும் இஸ்ரேலியர்களான பயணிகள், புதன்கிழமை பிற்பகுதியில் மற்றொரு விமானம் மூலம் டெல் அவிவுக்கு அழைத்துச் செல்லப்பட்டனர்.
விமான நிலையத்தில் கூடியிருந்த மக்கள், இசை அமைத்தும், பாடியும், நடனமாடியும், இஸ்ரேலிய கொடிகளை அசைத்தும் அவர்களை வரவேற்றனர்.
“விமானத்தை விட்டு வெளியேறிய பல மக்கள் மிகவும் உணர்ச்சிவசப்பட்டு அழுதனர்” என்று இஸ்ரேலின் அவசர ஆம்புலன்ஸ் சேவையைச் சேர்ந்த ஒரு மருத்துவ உதவியாளர் BBC இடம் தெரிவித்தார்.
“விமானத்தின் காக்பிட்டில் ஒரு தகராறு ஏற்பட்டது” என்றும், “விமானத்தில் பயணம் செய்த பிளைடுபாய் பணியாளர்களால் விமானம் வெற்றிகரமாகப் பாதுகாக்கப்பட்டு, தபூக் (Tabuk) விமான நிலையத்திற்குத் திருப்பி விடப்பட்டு பாதுகாப்பாகத் தரையிறக்கப்பட்டது” என்றும் பிளைடுபாய் தனது அறிக்கையில் தெரிவித்துள்ளது.
அந்நிறுவனத்தின் செய்தித் தொடர்பாளர் மேலும் கூறுகையில்: “இச்சம்பவத்தில் தொடர்புடைய அனைத்து பயணிகள் மற்றும் பணியாளர்களின் பாதுகாப்பு, சுகாதாரம் மற்றும் நலனை உறுதிப்படுத்துவதும், உத்தியோகபூர்வ விசாரணைக்கு ஆதரவளிப்பதுமே எங்களின் உடனடி முன்னுரிமையாகும்” என்றார்
