காங்கேசன்துறை துறைமுக அபிவிருத்தி திட்டம் குறித்த பேச்சுவார்த்தைகள் இறுதி கட்டத்தை எட்டியுள்ளன என தெரிவித்துள்ள துறைமுக சிவில் விமானப்போக்குவரத்து துறை அமைச்சர் அருண கருணதிலக இதில் தொடர்பில் இலங்கையும் இந்தியாவும் கைச்சாத்திடுவதற்காக இரண்டு நாடுகளின் அமைச்சர்களின் அங்கீகாரத்திற்காக காத்திருப்பதாக தெரிவித்துள்ளார்.
அமைச்சர் மேலும் தெரிவித்துள்ளதாவது
காங்கேசன்துறை துறைமுக அபிவிருத்தி திட்டத்தில் எந்த பின்னடைவும் இல்லை,இது தொடர்பான உடன்படிக்கை இறுதிகட்டத்தை எட்டியுள்ளது,உடன்படிக்கையில் கைசாத்திடுவதற்கான நடவடிக்கைகளும் இறுதி கட்டத்தில் உள்ளன
ஆரம்பகால கடன்திட்டம் மானிய உதவியமாக மாற்றப்பட்டதை தொடர்ந்து இந்த திட்டத்திற்கு இந்தியாவிடமிருந்து மானியமாக கிடைக்கும் நிதியே முழுமையாக பயன்படுத்தப்படும்
இலங்கையின் பல்வேறுபட்ட பங்குதாரர்களை உள்ளடக்கிய பல சுற்றுப்பேச்சுவார்த்தைகளின் பின்னர் புரிந்துணர்வு உடன்படிக்கையின் விதிமுறைகள் தொடர்பில் இரண்டு நாடுகளின் அரசாங்கத்திற்கும் இடையில் இணக்கப்பாடின்மையே தாமதத்திற்கு காரணம்
இலங்கை தரப்பிலிருந்து பாதுகாப்பு அமைச்சு வெளிவிவகார அமைச்சு சட்டவரைவாளர்கள் திணைக்களம் அனைத்து பங்குதாரர்களும் இதில் ஈடுபட்டிருந்தனர்,பல கருத்துவேறுபாடுகள் காணப்பட்டன ஆனால் எப்படியோ இது இறுதி கட்டத்தை எட்டிவிட்டது.
முன்மொழியப்பட்ட திட்டத்தில் கூட்டு பங்களிப்பு காணப்படும்,இதன் செயற்பாடுகள் தற்போது 25 ஆண்டுகள் என கணிப்பிடப்படுகின்றது.இருப்பினும் ஒப்பந்தம் இறுதியாக்கப்படுவதற்கு முன்னர் இந்த விதிமுறைகள் மாறக்கூடும்
தற்போதைக்கு இந்த திட்டம் 25 வருடங்களுக்கானது ஆனால்; இது மாறலாம் என அமைச்சர் தெரிவித்துள்ளார்.
