குவைத்தில் ஈரானியத் தாக்குதலில் அமெரிக்கப் படையினருக்குக் கடும் காயம்: தீக்காயங்கள், மூளை பாதிப்பு 

CBS

ஈரான் உடனான போர் தொடங்கிய ஆரம்ப நேரத்தில், குவைத்தில் நடத்தப்பட்ட ஈரானிய ட்ரோன் (Drone) தாக்குதலில் ஆறு அமெரிக்கப் படைவீரர்கள் கொல்லப்பட்ட சம்பவம், முன்னர் அறிவிக்கப்பட்டதை விட மிகவும் தீவிரமானது என்று தெரியவந்துள்ளது. இத்தாக்குதலில்  பலஅமெரிக்கப் படைவீரர்கள்ள் மூளை அதிர்ச்சி (Brain trauma), உடல் சிதைவுகள் மற்றும் தீக்காயங்களால் பாதிக்கப்பட்டுள்ளதாக சிபிஎஸ் நியூஸ் (CBS News) செய்தி வெளியிட்டுள்ளது. குறைந்தபட்சம் ஒரு வீரருக்கு உடல் உறுப்பு நீக்கம் (Amputation) செய்ய வேண்டிய நிலை ஏற்பட்டுள்ளது.

தாக்குதல் நடந்த விதம்

மார்ச் 1-ஆம் தேதி குவைத் நகருக்கு வெளியே உள்ள சுவைபா (Shuaiba) துறைமுகத்தில் அமைந்திருந்த ராணுவ தந்திரோபாய செயல்பாட்டு மையத்தின் மீது இந்தத் தாக்குதல் நடத்தப்பட்டது. தாக்குதலுக்குப் பிறகு கட்டிடம் முழுவதும் புகை மூட்டமாக இருந்ததால், உள்ளே இருந்தவர்களை மீட்பதில் பெரும் சிரமம் ஏற்பட்டதாகத் தகவல்கள் தெரிவிக்கின்றன.

தற்போதைய நிலைமை

• செவ்வாய்க்கிழமை இரவு நிலவரப்படி, 30-க்கும் மேற்பட்ட படைவீரர்கள் போர்க்காயங்களுடன் மருத்துவமனைகளில் அனுமதிக்கப்பட்டுள்ளனர்.

• வாஷிங்டன் டி.சி.யில் உள்ள வால்டர் ரீட் மருத்துவமனையில் 12 பேரும், ஜெர்மனியில் உள்ள லேண்ட்ஸ்டூல் (Landstuhl) மருத்துவ மையத்தில் சுமார் 25 பேரும் சிகிச்சை பெற்று வருகின்றனர்.

• இதில் 20 வீரர்கள் “அவசரத் தேவை” (Urgent) என்ற அடிப்படையில் ராணுவ விமானம் மூலம் ஜெர்மனிக்குக் கொண்டு செல்லப்பட்டனர். இவர்களில் பலருக்குத் தீவிர மூளைப் பாதிப்பு மற்றும் நினைவாற்றல் இழப்பு ஏற்பட்டுள்ளது.

பென்டகனின் விளக்கம்

ஆரம்பத்தில் ஐந்து பேர் மட்டுமே பலத்த காயமடைந்ததாகத் தெரிவித்திருந்த அமெரிக்கப் பாதுகாப்புத் துறை, தற்போது காயமடைந்தவர்களின் எண்ணிக்கை அதிகமாக இருப்பதை மறைமுகமாக ஒப்புக்கொண்டுள்ளது.

பாதுகாப்புச் செயலாளர் பீட் ஹெக்செத் (Pete Hegseth) கூறுகையில், “எங்களிடம் வான் பாதுகாப்பு அமைப்புகள் உள்ளன, வரும் தாக்குதல்களில் பெரும்பாலானவற்றை நாங்கள் தடுத்து விடுகிறோம். ஆனால் துரதிர்ஷ்டவசமாக, சில நேரங்களில் ஒன்று அல்லது இரண்டு ஏவுகணைகள் ஊடுருவி விடுகின்றன. அத்தகைய ஒன்றுதான் பலமாகப் பாதுகாக்கப்பட்ட இந்த மையத்தைத் தாக்கியுள்ளது,” என்று தெரிவித்தார்.

போர் தொடங்கி 11 நாட்கள் முடிந்துள்ள நிலையில், இதுவரை சுமார் 140 அமெரிக்கப் படைவீரர்கள் காயமடைந்துள்ளதாகப் பென்டகன் செய்தித் தொடர்பாளர் சீன் பார்னெல் தெரிவித்துள்ளார். இவர்களில் 108 பேர் ஏற்கனவே பணிக்குத் திரும்பியுள்ளனர்