CBS News
அமெரிக்கா பகிரங்கமாக ஒப்புக்கொள்வதை விட, ரஷ்யா ஈரானின் போர் முயற்சிகளுக்கு நேரடியாகவும் பொருள் ரீதியாகவும் உதவி வருவதாக ஐரோப்பிய நட்பு நாடுகள் பொதுவெளியிலும் தனிப்பட்ட முறையிலும் அமெரிக்க இராஜதந்திரிகளிடம் கூறி வருவதாக CBS News-இடம் ஆதாரங்கள் தெரிவிக்கின்றன.
இரண்டாம் உலகப் போருக்குப் பிறகு ஐரோப்பாவின் மிகப்பெரிய நிலப்போர் என்று கருதப்படும் உக்ரைன் போர், ரஷ்யா மற்றும் ஈரான் இடையிலான ஒத்துழைப்பால் ஈரானியப் போருடன் பின்னிப் பிணைந்துள்ளதாக ஐரோப்பியர்கள் தொடர்ந்து வாதிடுகின்றனர்.
ரஷ்யா-ஈரான் பாதுகாப்பு ஒத்துழைப்பு சமீபத்திய ஆண்டுகளில் மிகப்பெரிய அளவில் அதிகரித்துள்ளதாகவும், ஈரானின் தொழில்நுட்ப முன்னேற்றம் இப்போது மத்திய கிழக்கில் நடக்கும் தாக்குதல்களில் தெரிகிறது என்றும் ஒரு பிரிட்டிஷ் அதிகாரி CBS News-இடம் தெரிவித்தார். உக்ரைன் போர்க்களத்தில் பயன்படுத்துவதற்காக ஈரான் ‘ஷாஹெத்’ (Shahed) ட்ரோன்களை மாஸ்கோவிற்கு வழங்கியது மட்டுமின்றி, அவற்றை தயாரிக்கும் தொழில்நுட்ப அறிவையும் வழங்கியுள்ளதாக ஐரோப்பா மதிப்பிடுகிறது. இது ஈரானின் ட்ரோன் போர் முறையை மேலும் செம்மைப்படுத்த உதவியுள்ளது. இருப்பினும், சமீபத்தில் ரஷ்யாவால் ஈரானுக்கு வன்பொருள் (Hardware) மாற்றப்பட்டதை அந்த பிரிட்டிஷ் அதிகாரியால் உறுதிப்படுத்த முடியவில்லை.
பிரான்ஸ் வெளியுறவு அமைச்சர் ஜீன்-நோயல் பரோட் (Jean-Noël Barrot), ரஷ்யா மற்றும் ஈரானுக்கு இடையிலான உறவை “இருதரப்பு ஒத்துழைப்பு” என்று பகிரங்கமாக விவரித்தார். “ரஷ்யா இப்போது ஈரானின் இராணுவ முயற்சிகளுக்கு ஆதரவளிப்பதாக நம்புவதற்கு காரணங்கள் உள்ளன, அவை குறிப்பாக அமெரிக்க இலக்குகளை நோக்கியதாகத் தெரிகிறது,” என்று பரோட் வியாழக்கிழமை கூறினார்.
இந்த வார தொடக்கத்தில், உக்ரைன் அதிபர் செலென்ஸ்கி ஒரு சமூக ஊடகப் பதிவில், ரஷ்யர்கள் ஈரானிய ஆட்சிக்கு ‘சமிக்ஞை உளவுத்துறை’ (Signals intelligence) மற்றும் மின்னணு உளவுத் திறன்களை வழங்குவதற்குத் தனது நாட்டிடம் “மறுக்க முடியாத ஆதாரங்கள்” இருப்பதாகக் கூறினார். சனிக்கிழமையன்று, மத்திய கிழக்கு மற்றும் வளைகுடா பிராந்தியத்தில் உள்ள அமெரிக்க இராணுவ நிலைகள் “ஈரானின் நலன்களுக்காக ரஷ்ய செயற்கைக்கோள்களால் புகைப்படம் எடுக்கப்பட்டுள்ளன” என்று ஒரு உளவுத்துறை அறிக்கை காட்டுகிறது என்று அவர் கூறினார்.
இந்தியப் பெருங்கடலில் உள்ள அமெரிக்க-பிரிட்டிஷ் கூட்டு இராணுவத் தளமான டியகோ கார்சியா (Diego Garcia), குவைத் சர்வதேச விமான நிலையம், சவுதி அரேபியாவில் உள்ள பிரின்ஸ் சுல்தான் விமானத் தளம் மற்றும் துருக்கி மற்றும் கத்தாரில் உள்ள இடங்களை ரஷ்யாவின் செயற்கைக்கோள்கள் படம்பிடித்ததாக அவர் சமூக ஊடகப் பதிவில் குறிப்பிட்டுள்ளார்.
பிரான்சில் வெள்ளிக்கிழமை நடந்த ஜி7 (G7) கூட்டத்தைத் தொடர்ந்து, அமெரிக்க இராஜாங்கச் செயலாளர் மாக்கோ ரூபியோ (Marco Rubio) ஈரான் மற்றும் ரஷ்யாவிற்கு இடையிலான ஒத்துழைப்பைக் குறைத்துக் காட்டினார். “ரஷ்யா ஈரானுக்காகச் செய்யும் எதுவும் எங்கள் செயல்பாட்டையோ அல்லது அதன் செயல்திறனையோ எந்த வகையிலும் தடுக்கவில்லை அல்லது பாதிக்கவில்லை. இதை நான் இப்படித்தான் சொல்ல முடியும்,” என்று ரூபியோ செய்தியாளர்களிடம் கூறினார்.
சனிக்கிழமையன்று, ரஷ்யாவுடன் நெருங்கிய உறவைக் கொண்டுள்ள ஐக்கிய அரபு அமீரகத்திற்கு செலென்ஸ்கி விஜயம் செய்தார். அமெரிக்க தளங்களைக் கொண்டுள்ள வளைகுடா நாடுகள் சமீபத்தில் ஈரானின் இலக்குகளாக மாறியுள்ளதால், உக்ரைன் பாதுகாப்பு நோக்கங்களுக்காகப் பயன்படுத்தும் தனித்துவமான ட்ரோன் எதிர்ப்பு தொழில்நுட்பத்தை அவர் ஐக்கிய அரபு அமீரகத்திற்கு வழங்கி வருகிறார்.
நேரடித் தொடர்புடைய மூத்த அமெரிக்க அதிகாரி உள்ளிட்ட பல ஆதாரங்கள், மத்திய கிழக்கில் உள்ள அமெரிக்க நிலைகள் குறித்த உளவுத் தகவல்களை ரஷ்யா ஈரானுக்கு வழங்குவதாக இம்மாத தொடக்கத்தில் CBS News-இடம் தெரிவித்திருந்தன. ஐரோப்பிய ஒன்றியத்தின் உயர்மட்ட இராஜதந்திரி வியாழக்கிழமை கூறுகையில், ரஷ்யா “அமெரிக்கர்களைக் கொல்வதற்காக” ஈரானுக்கு உளவுத்துறை ஆதரவை வழங்குகிறது என்றார்.
“அமெரிக்கர்களை இலக்கு வைக்கவும், அவர்களைக் கொல்லவும் ரஷ்யா ஈரானுக்கு உளவுத் தகவல்களை வழங்குவதையும், அண்டை நாடுகள் மற்றும் அமெரிக்க இராணுவத் தளங்களைத் தாக்குவதற்கு ஏதுவாக ரஷ்யா இப்போது ஈரானுக்கு ட்ரோன்கள் மூலம் ஆதரவளிப்பதையும் நாங்கள் காண்கிறோம்,” என்று காஜா காலாஸ் (Kaja Kallas) ஜி7 தலைவர்களிடம் தெரிவித்தார்.
மேலும் வியாழக்கிழமை, பிரிட்டிஷ் பாதுகாப்புச் செயலாளர் ஜான் ஹீலி (John Healey), ஈரானின் போர் முயற்சிக்குப் பின்னால் “புடினின் மறைந்திருக்கும் கை” (hidden hand of Putin) இருப்பதை தான் காண்பதாக BBC செய்திகளிடம் தெரிவித்தார்.
ரஷ்யா ஈரானுடன் உளவுத் தகவல்களைப் பகிர்ந்து கொள்வது குறித்த அறிக்கைகள் பற்றி கேட்டபோது, அமெரிக்கப் பாதுகாப்புச் செயலாளர் பீட் ஹெக்செத் (Pete Hegseth), ஜனாதிபதி டிரம்ப் “யார் யாருடன் பேசுகிறார்கள் என்பதை நன்கு அறிவார்” என்றும், “நடக்கக்கூடாத எதற்கும்… வலுவான முறையில் முகம் கொடுக்கப்படும்” என்றும் கூறினார்.
சீனா, ரஷ்யா, ஈரான் மற்றும் வடகொரியா ஆகிய நாடுகளுக்கு இடையே “அமெரிக்க முயற்சிகள் மற்றும் நடவடிக்கைகளை சமநிலைப்படுத்தும்” பொதுவான குறிக்கோளுடன் “தேர்ந்தெடுக்கப்பட்ட ஒத்துழைப்பு” (selective cooperation) இருப்பதாக அமெரிக்க உளவுத்துறை இந்த மாதம் பகிரங்கமாக வெளிப்படுத்தியது. ஆனால், இது முழுமையான “எதிரி அணிசேர்க்கை” (adversary alignment) நிலைக்குக் குறைவாகவே உள்ளது என்று கண்டறியப்பட்டது. அமெரிக்க தேசிய உளவுத்துறை இயக்குநரின் உலகளாவிய அச்சுறுத்தல் மதிப்பீடு, இந்த நான்கு நாடுகளும் அமெரிக்காவை நேரடியாக எதிர்கொள்வது குறித்து கவலை கொண்டுள்ளதாகவும், இது அவர்களின் உறவுகளின் எல்லையை கட்டுப்படுத்துவதாகவும் முடிவு செய்துள்ளது.
இதேவேளை, இஸ்ரேல், வளைகுடா நட்பு நாடுகள் மற்றும் உக்ரைன் ஆகியவற்றுக்கு இடையே அமெரிக்க தயாரிப்பு ஏவுகணை தடுப்பு ஆயுதங்களை (interceptors) வாங்குவதற்கு அதிக தேவை உள்ளது.
உக்ரைனுக்கு தற்காப்பு உபகரணங்களை விற்பனை செய்வதற்கும் ஒதுக்குவதற்கும், மத்திய கிழக்கில் ஏவுகணை தடுப்பு ஆயுதங்களின் தேவையால் எந்த பாதிப்பும் ஏற்படவில்லை என்று ரூபியோ வாதிட்டார். அந்த ஆயுதங்களை வாங்குவதற்கான நேட்டோ (NATO) வழிமுறை பாதிக்கப்படவில்லை என்று அவர் கூறினார், ஆனால் எதிர்காலத்தில் அமெரிக்கா ஆயுதங்களை திசைதிருப்ப வாய்ப்புள்ளது என்பதை அவர் ஒப்புக்கொண்டார்.
“அமெரிக்காவிற்கு ஏதாவது தேவைப்பட்டால், அது அமெரிக்கப் பொருளாக இருந்தால், அதை அமெரிக்காவிற்கே முதலிடத்தில் வைப்போம். ஆனால் இதுவரை அப்படி நடக்கவில்லை,” என்று ரூபியோ கூறினார்.
