முதுமையடையும் மக்கள் தொகை, தாமதமான திருமணம், உயர் எழுத்தறிவு: மக்கள் தொகை கணக்கெடுப்பின் 13 முக்கிய முடிவுகள்

தொகைமதிப்பு மற்றும் புள்ளிவிபரத் திணைக்களம் வெளியிட்டுள்ள 2024-ஆம் ஆண்டுக்கான மக்கள் தொகை மற்றும் வீட்டுவசதி கணக்கெடுப்பின் இறுதி அறிக்கையின்படி, இலங்கையின் மொத்த மக்கள் தொகை 21.78 மில்லியனை எட்டியுள்ளது.

மக்கள் தொகை கணக்கெடுப்பின் 13 முக்கிய தகவல்கள்:

மொத்த மக்கள் தொகை: இலங்கையின் மொத்த மக்கள் தொகை 2,17,81,800 ஆகும். ஒரு சதுர கிலோமீட்டருக்கு 350 பேர் வசிக்கின்றனர். மேல் மாகாணத்தில் அதிக மக்கள் (28.1%) வசிக்கின்றனர். கம்பஹா அதிக மக்கள் தொகை கொண்ட மாவட்டமாகவும், முல்லைத்தீவு குறைந்த மக்கள் தொகை கொண்ட மாவட்டமாகவும் உள்ளன.
முதுமையடையும் சமூகம்: 60 வயதிற்கு மேற்பட்ட முதியவர்கள் 18% ஆக உள்ளனர். 0–14 வயதுடைய சிறுவர்கள் 20.7% ஆக உள்ளனர். சராசரி வயது 35-ஆக அதிகரித்துள்ளது.
கருவுறுதல் விகிதம் குறைவு: நாட்டின் மொத்த கருவுறுதல் விகிதம் 1.3 ஆக உள்ளது. இது மக்கள் தொகை வளர்ச்சி வேகம் குறைவதைக் காட்டுகிறது.
எழுத்தறிவு: நாட்டின் எழுத்தறிவு 97.4% ஆக உயர்ந்து வரலாற்றுச் சாதனை படைத்துள்ளது. டிஜிட்டல் எழுத்தறிவு 67.6% ஆகவும், கணினி அறிவு 34.7% ஆகவும் உள்ளது.
மாற்றுத்திறனாளிகள்: சுமார் 3.22 மில்லியன் மக்கள் ஏதாவதொரு உடல் அல்லது மன ரீதியான சிரமங்களைக் கொண்டுள்ளனர். குருநாகல் மாவட்டத்தில் அதிகப்படியான மாற்றுத்திறனாளிகள் உள்ளனர்.
தொற்றா நோய்கள்: ஐந்தில் ஒரு இலங்கையர் (19.2%) நாள்பட்ட தொற்றா நோய்களால் பாதிக்கப்பட்டுள்ளனர். இரத்த அழுத்தம் (10.1%) மற்றும் நீரிழிவு (8.5%) ஆகியவை மிகவும் பொதுவானவை.
இடம்பெயர்வு: மக்கள் தொகையில் 13% பேர் இடம்பெயர்ந்தவர்கள். வவுனியா, கிளிநொச்சி மற்றும் முல்லைத்தீவு ஆகிய மாவட்டங்கள் அதிக சதவீதத்தைப் பதிவு செய்துள்ளன. திருமணமே இடம்பெயர்வுக்கு முக்கிய காரணமாக உள்ளது.
புலம்பெயர்ந்தோர்: சுமார் 6,72,249 இலங்கையர்கள் தற்காலிகமாக வெளிநாடுகளில் வசிக்கின்றனர். இவர்களில் 86% பேர் வேலைக்காகச் சென்றுள்ளனர். மத்திய கிழக்கு நாடுகள் முதன்மையான இடமாகவும், கல்விக்காக ஆஸ்திரேலியா மற்றும் ஜப்பான் ஆகிய நாடுகள் அடுத்த இடங்களிலும் உள்ளன.
தொழிற்படை: நாட்டின் தொழிற்படை பங்களிப்பு 47.3% ஆக உள்ளது. பெண்களில் பாதிக்கும் மேற்பட்டோர் வீட்டுப் பொறுப்புகள் காரணமாக பொருளாதார ரீதியாகச் செயலற்றவர்களாக உள்ளனர்.
உட்கட்டமைப்பு: 98% வீடுகளுக்கு மின்சார வசதியும், 92.2% வீடுகளுக்கு குடிநீர் வசதியும் உள்ளது.
முதியவர்கள் தனிமை: இலங்கையில் சராசரியாக ஒரு வீட்டில் 3.5 பேர் வசிக்கின்றனர். 10.5% வீடுகளில் தனிநபர்கள் வசிக்கின்றனர், இவர்களில் பெரும்பாலானோர் தனியாக வாழும் முதியப் பெண்கள்.
திருமண வயது அதிகரிப்பு: சராசரி திருமண வயது ஆண்களுக்கு 29.2 ஆகவும், பெண்களுக்கு 25.6 ஆகவும் அதிகரித்துள்ளது.
பெண்களின் எண்ணிக்கை அதிகம்: ஆண்களை விட பெண்களின் எண்ணிக்கை அதிகமாக உள்ளது (பாலின விகிதம் 93.3). 65 வயதிற்கு மேற்பட்ட பெண்களில் 44.2% பேர் விதவைகளாக உள்ளனர், இது ஆண்களை விட (10.5%) மிக அதிகம்.