ஒழுங்கமைக்கப்பட்ட குற்றவியல் சட்டமூலத்தை முற்றிலும் திரும்பப் பெறுங்கள்’: சர்வதேச மன்னிப்புச் சபை கடும் கண்டனம்

இலங்கை நாடாளுமன்றத்தில் சமர்ப்பிக்கப்பட்டுள்ள புதிய சட்டமூலமானது, ‘ஒழுங்கமைக்கப்பட்ட குற்றங்களை’ எதிர்கொள்வது என்ற பெயரில் அதிகாரிகளுக்கு எல்லையற்ற தன்னிச்சையான அதிகாரங்களை வழங்குவதோடு, சந்தேக நபர்களின் மனித உரிமைகளையும் மறுக்கிறது என்றும், எனவே அதனை உடனடியாகத் திரும்பப் பெற வேண்டும் என்றும் சர்வதேச மன்னிப்புச் சபை (Amnesty International) வலியுறுத்தியுள்ளது.

கடந்த அக்டோபர் 6 ஆம் திகதி இலங்கை நாடாளுமன்றத்தில் சமர்ப்பிக்கப்பட்ட ‘ஒழுங்கமைக்கப்பட்ட குற்றங்களைத் தடுக்கும் சட்டமூலம்’ (Prevention of Organised Crimes Bill), வற்புறுத்தல் மூலம் பெறப்பட்ட வாக்குமூலங்களை நீதிமன்றத்தில் சாட்சியமாக ஏற்பதற்கும், விசாரணையின்றி சந்தேக நபர்களை இரண்டு ஆண்டுகள் வரை தடுத்து வைப்பதற்கும், நீதிமன்ற நடவடிக்கைகளை ஊடகங்கள் செய்தி சேகரிப்பதைத் தடை செய்வதற்கும் வழிவகுக்கும் சரத்துகளைக் கொண்டுள்ளது. மேலும், நீதிமன்ற பிடியாணை இன்றி சோதனை நடத்தவும், அதிகாரிகளுக்குத் தகவல் வழங்காதவர்களைச் சிறையில் அடைக்கவும் காவல்துறைக்கு இச்சட்டம் பரந்த அதிகாரங்களை வழங்குகிறது.

இச்சட்டமூலமானது, 1970கள் முதல் சிறுபான்மையினரை இலக்கு வைக்கவும் மாற்றுக்கருத்துகளை ஒடுக்கவும் தவறாகப் பயன்படுத்தப்பட்ட இலங்கையின் அடக்குமுறைச் சட்டமான பயங்கரவாதத் தடைச் சட்டத்தின் (PTA) பல அம்சங்களைப் பிரதிபலிக்கிறது.

“தேசிய மக்கள் சக்தி (NPP) அரசாங்கத்தால் முன்மொழியப்பட்டுள்ள அடக்குமுறைச் சட்டங்களின் வரிசையில், இந்த அசாதாரணமான சட்டமூலமே மிகவும் கவலையளிப்பதாகும். இது பயங்கரவாதத் தடைச் சட்டத்தின் மிக மோசமான பல அம்சங்களை மீண்டும் கொண்டுவந்து, அவற்றை பல்வேறு குற்றங்களுக்கும் விரிவுபடுத்துகிறது,” என்று சர்வதேச மன்னிப்புச் சபையின் தெற்காசியப் பணிப்பாளர் ஸ்மிருதி சிங் (Smriti Singh) தெரிவித்துள்ளார்.

“இலங்கை அரசாங்கம் இந்தச் சட்டமூலத்தை முழுமையாகத் திரும்பப் பெற வேண்டும் என்றும், மனித உரிமைகளைப் பாதுகாக்கும் அதே வேளையில் ஒழுங்கமைக்கப்பட்ட குற்றங்களை எவ்வாறு கையாள்வது என்பது குறித்து அர்த்தமுள்ள பொது கலந்தாய்வுகளில் ஈடுபட வேண்டும் என்றும் நாங்கள் வலியுறுத்துகிறோம்.”

தனியுரிமை மீறல் மற்றும் கண்காணிப்பு அபாயம்

நீதிமன்ற உத்தரவின்றித் தொலைத்தொடர்பு, செயற்கைக்கோள், டிஜிட்டல் மற்றும் தரவுச் சேவை வழங்குநர்களிடமிருந்து நபர்களின் கணக்கு விவரங்கள், அழைப்புப் பதிவுகள் (call records) மற்றும் சாதன இருப்பிடத் தரவு (location data) ஆகிய தனிப்பட்ட தகவல்களைப் பெற காவல்துறைக்கு இச்சட்டம் அதிகாரம் அளிக்கிறது.

இது தனிமனித தனியுரிமை உரிமையை மீறுவதுடன், ஊடகவியலாளர்களின் தொடர்புகள், வழக்கறிஞர்களின் உரையாடல்கள் மற்றும் சட்டப்பூர்வக் கூட்டங்களை ஏற்பாடு செய்வோர் மீதான கண்காணிப்பு உள்ளிட்ட பெரும் துஷ்பிரயோக அபாயங்களை உருவாக்கும்.

தோற்றம், பச்சை குத்துதல் மற்றும் தன்னிச்சையான அளவுகோல்கள்

இலங்கைச் சட்டத்தின்கீழ் ஏற்கனவே குற்றமாக்கப்பட்ட குற்றங்களுக்கும் இச்சட்டம் பொருந்தும் என்ற போதிலும், ஒரு குற்றவியல் குழுவால் அவை செய்யப்படும் போது முறையான சட்டப் பாதுகாப்பு வழிமுறைகளைக் குறைக்கிறது.

ஒரு நபர் அத்தகைய குழுவின் உறுப்பினரா என்பதைத் தீர்மானிக்க:

• அவர்களின் ஆடை முறை (style of dress),

• கை சமிக்ஞைகள் (hand signs),

• பயன்படுத்தும் மொழி அல்லது பச்சை குத்துதல் (tattoos),

• குற்றக் குழுக்கள் நடமாடும் இடங்களுக்குச் செல்லுதல்

போன்ற சூழ்நிலைச் சான்றுகளை நீதிமன்றங்கள் பரிசீலிக்க இச்சட்டம் அனுமதிக்கிறது.

“குற்றவியல் குற்றச்சாட்டு என்பது சட்டத்தால் துல்லியமாக வரையறுக்கப்பட்ட தனிப்பட்ட தவறுகளின் உண்மையான சான்றுகளின் அடிப்படையிலேயே அமைய வேண்டும்; தோற்றம், தொடர்பு அல்லது சந்தேகத்தின் அடிப்படையில் இருக்கக்கூடாது. ஆடை அணியும் முறை, பழகும் நபர்கள் அல்லது செல்லும் இடங்களின் அடிப்படையில் மக்களைக் குற்றவாளிகளாக முத்திரை குத்த அனுமதிக்கும் சரத்துகள், பாகுபாடான அணுகுமுறைக்கும், தன்னிச்சையான தடுப்புக் காவலுக்கும், நியாயமான விசாரணைக்கான உரிமைக்கும் எதிரானவை,” என ஸ்மிருதி சிங் சுட்டிக்காட்டியுள்ளார்.