ஜோர்தானில் இலங்கை தூதரகத்திற்கு வெளியே பயங்கரவாதத் தாக்குதல் -பாதுகாப்பு அதிகாரி உயிரிழப்பு

அம்மான் நகரில் அமைந்துள்ள இலங்கை தூதரகத்திற்கு வெளியே நடத்தப்பட்ட தாக்குதலில் ஜோர்தான் பாதுகாப்பு அதிகாரி ஒருவர் கொல்லப்பட்டுள்ளார். இந்தச் சம்பவத்தைப் பயங்கரவாதச் செயலாக அதிகாரிகள் வகைப்படுத்தியுள்ளனர்.

கூர்மையான ஆயுதத்துடன் வந்த நபர் ஒருவர் தூதரகக் கட்டடத்திற்கு அருகில் கடமையில் ஈடுபட்டிருந்த பாதுகாப்பு அதிகாரி மீது தாக்குதல் நடத்தியதாகக் குறிப்பிட்ட இலங்கைத் தூதரகம், இந்தச் சம்பவம் வியாழக்கிழமை (05) பிற்பகல் 12.20 மணியளவில் இடம்பெற்றதாக உறுதிப்படுத்தியுள்ளது.

கோர்போரல் ஜவாத் அலி கலஃப் அல்-சலைதா (Corporal Jawad Ali Khalaf Al-Salaita) என அடையாளம் காணப்பட்ட குறித்த அதிகாரி, தனது உத்தியோகபூர்வ கடமைகளை நிறைவேற்றும் போதே உயிரிழந்துள்ளார்.

ஜோர்தானின் பொதுப் பாதுகாப்பு இயக்குநரகத்தின் (PSD) கூற்றுப்படி, சம்பவ இடத்திற்கு விரைந்த பொலிஸ் அதிகாரிகள் தாக்குதல்காரரை மடக்கிப் பிடித்துக் கைது செய்துள்ளனர்.

எதிர்வினையாற்றிய ரோந்துப் படையின் கட்டளை அதிகாரி, மோதலின் போது முகத்தில் காயமடைந்து மருத்துவமனையில் அனுமதிக்கப்பட்டுள்ளார்; அங்கு அவர் தற்போது நிலையான உடல்நலத்துடன் சிகிச்சை பெற்று வருகிறார்.

பாதுகாப்புப் பணியாளர்களைக் குறிவைத்து தாக்குதல் நடத்துவதற்குச் சந்தேகநபர் திட்டமிட்டிருந்ததாக முதற்கட்ட விசாரணைகள் மூலம் தெரியవந்துள்ளது என ஜோர்தான் அதிகாரிகள் தெரிவித்தனர். இச்சம்பவம் அதிகாரப்பூர்வமாக ஒரு பயங்கரவாதச் செயலாக வகைப்படுத்தப்பட்டுள்ளது.

அசோசியேட்டட் பிரஸ் (AP) செய்தி நிறுவனத்தின்படி, கொல்லப்பட்ட அதிகாரியின் ஆயுதத்தைக் கைப்பற்றத் தாக்குதல்காரர் முயன்றதாகவும், அதற்குள் மற்றொரு அதிகாரி தலையிட்டுத் தடுத்ததாகவும் ஜோர்தான் மாநிலத் தொலைக்காட்சி செய்தி வெளியிட்டுள்ளது.

இலங்கை தூதரகம் பாதுகாப்பு உறுதி

வெளியிடப்பட்டுள்ள அறிக்கையில், இச்சம்பவத்தைத் தொடர்ந்து அம்மானில் உள்ள இலங்கைத் தூதரகத்தின் அனைத்து ஊழியர்களும், ஜோர்தானில் உள்ள இலங்கைச் சமூக உறுப்பினர்களும் பாதுகாப்பாக இருப்பதாக இலங்கைத் தூதரகம் உறுதிப்படுத்தியுள்ளது.

உயிரிழந்த அதிகாரியின் குடும்பத்தினருக்கும் சக ஊழியர்களுக்கும் தூதரகம் தனது ஆழ்ந்த இரங்கலைத் தெரிவித்துக் கொண்டது.

ஜோர்தானுக்கான இலங்கைத் தூதுவர் விஸ்வநாத் அபோன்சு மற்றும் தூதரக அதிகாரிகள் ஜோர்தான் அதிகாரிகளுடன் ஒருங்கிணைந்து பாதுகாப்பு நிலவரத்தை உன்னிப்பாகக் கண்காணித்து வருகின்றனர்.

இத்தாக்குல் குறித்த விரிவான விசாரணை தற்போது நடைபெற்று வருகிறது.