இந்தியாவின் மிகப்பெரிய பணக்காரர்கள் தங்கள் பணத்தை என்ன செய்கிறார்கள் என்று எப்போதாவது யோசித்திருக்கிறீர்களா? அதற்கான பதில் இப்போது வெளியாகியுள்ளது! ஒவ்வொரு ஆண்டும் இந்தியாவின் தாராளமயமான செல்வந்தர்களைப் பட்டியலிடும் ‘எடில்கிவ் ஹருன் இந்தியா பரோபகாரப் பட்டியல் 2025’ வெளியாகி, அனைவரின் கவனத்தையும் ஈர்த்துள்ளது. இந்த ஆண்டு, இந்தப் பட்டியலில் ஒரு பெண்மணி முதலிடம் பிடித்து சாதனை படைத்துள்ளார். அவர் வேறு யாருமல்ல, ‘ரோஹிணி நிலேகனி பிலந்த்ரோபிஸ்’ அமைப்பின் தலைவர் ரோஹிணி நிலேகனிதான்.
மலைக்க வைக்கும் நன்கொடை
ரோஹிணி நிலேகனி இந்த 2025-ம் ஆண்டில் மட்டும் வழங்கிய நன்கொடையின் மதிப்பு எவ்வளவு தெரியுமா? 204 கோடி ரூபாய். சமூகத்தில் புத்தாக்கத்தையும், அமைப்பு ரீதியான மாற்றத்தையும் கொண்டு வரும் நற்பணிகளுக்காக அவர் இந்த தொகையை வழங்கியுள்ளார். கடந்த 5 ஆண்டுகளில் மட்டும் இவருடைய ஒட்டுமொத்த நன்கொடை சுமார் 763 கோடி ரூபாயைத் தொடுகிறது. இது இவரை மற்ற கொடையாளர்களிடம் இருந்து தனி ஒரு நட்சத்திரமாக ஜொலிக்க வைக்கிறது. பாலின சமத்துவம், கல்வி, சுற்றுச்சூழல், நீதி மற்றும் சமூகத்தை வலுப்படுத்துதல் எனப் பல துறைகளில் ஆழமான அக்கறை கொண்டவர் இவர். சரி, இவ்வளவு பெரிய தொகையை சமூகத்திற்காகச் செலவிடும் இவர் யார்? இவரது பின்னணி என்ன?
நடுத்தரக் குடும்பம் முதல் எழுத்தாளர் வரை
இன்று கோடிகளைக் கொடையாக வழங்கும் ரோஹிணி, மும்பையில் ஒரு நடுத்தரக் குடும்பத்தில் பிறந்தவர். எல்பின்ஸ்டோன் கல்லூரியில் பிரெஞ்சு இலக்கியம் பயின்ற இவர், தன் பயணத்தை ஒரு பத்திரிகையாளராகத் தொடங்கினார். ‘பாம்பே மேகசின்’, ‘சண்டே மேகசின்’ போன்ற இதழ்களில் பணியாற்றிய இவர், ஒரு சிறந்த எழுத்தாளரும் கூட. ‘ஸ்டில்போர்ன்’ என்ற மருத்துவத் திரில்லர் நாவல் மூலம் வாசகர்களிடையே பிரபலமானார். அதுமட்டுமின்றி, ‘அன்காமன் கிரவுண்ட்’, ‘தி ஹங்ரி லிட்டில் ஸ்கை மான்ஸ்டர்’ (சிறுவர் புத்தகம்) மற்றும் தனது 10 ஆண்டுகால பேட்டிகள், கட்டுரைகளைத் தொகுத்து ‘சமாஜ், சர்கார், பஜார்’ போன்ற பல புத்தகங்களையும் எழுதியுள்ளார்.
பரோபகாரப் பயணத்தின் தொடக்கம்
இவரது கணவர், இன்ஃபோசிஸ் இணை நிறுவனரான நந்தன் நிலேகனி. இந்தத் தம்பதியினர் பல ஆண்டுகளாகவே சமூகப் பணிகளில் ஈடுபட்டு வருகின்றனர். 2001ல், ரோஹிணி தனது தனிப்பட்ட நிதியிலிருந்து 150 கோடி ரூபாய் செலவில் ‘அர்க்யம்’ என்ற அறக்கட்டளையை தொடங்கினார். ஆரம்பத்தில், நீர் மற்றும் சுகாதார பிரச்னைகளில் கவனம் செலுத்திய இந்த அமைப்பு, படிப்படியாக சமூகத்தின் பிற முக்கிய பிரச்னைகளுக்கும் தனது சேவையை விரிவுபடுத்தியது.
சுற்றுச்சூழல் ஆராய்ச்சிக்காக (ATREE) 50 கோடி ரூபாய், டெல்லியில் புதிய இந்திய மையத்தை உருவாக்க 50 கோடி ரூபாய், பெங்களூரு NIMHANS மருத்துவமனையில் மனநல ஆராய்ச்சி மற்றும் சிகிச்சைக்காக சமீபத்தில் 100 கோடி ரூபாய். இவை எல்லாமே இத்தம்பதியினரின் சமூக அக்கறைக்குச் சில உதாரணங்கள் மட்டுமே. 2013-ல், பரோபகாரப் பணிகளுக்காகவே தனது இன்ஃபோசிஸ் பங்குகளில் 164 கோடி ரூபாய் மதிப்பிலான பங்குகளை அவர் விற்றது குறிப்பிடத்தக்கது.
ஒரு புத்துணர்ச்சியூட்டும் உதாரணம்
பெரும்பாலான கோடீஸ்வரர்கள் தங்கள் செல்வத்தைக் குவித்து வைத்துக் கொள்வதிலேயே குறியாக இருக்கும் இன்றைய உலகில், ரோஹிணி நிலேகனி போன்ற சிலர் விதிவிலக்காகத் திகழ்கிறார்கள். ஏழைகளுக்கும் பணக்காரர்களுக்கும் இடையிலான இடைவெளியைக் குறைக்கும் நோக்கில், இவர் செய்யும் உதவிகள் இவரை ‘எடில்கிவ் ஹருன் இந்தியா’ பட்டியலில் முதல் இடத்திற்குத் தகுதியானவராக ஆக்கியுள்ளது. இவர் சமூகத்தின் மீது வைத்துள்ள நம்பிக்கை, பலருக்கும் ஒரு புத்துணர்ச்சியூட்டும் பாடமாக அமைந்துள்ளது
