இலங்கைக்கான சர்வதேச நாணய நிதியத்தின் (IMF) அவசர உதவிக்கான கோரிக்கை, அதாவது விரைவு நிதியுதவிக் கருவி (RFI), தற்போது அந்நிறுவனத்தின் உயர் முன்னுரிமையாக உள்ளது. இதன்மூலம் இலங்கைக்கு ஒரு குறிப்பிடத்தக்க நிதி உதவி கிடைக்கவுள்ளது.
சமீரத்தி்ல் ஏற்பட்ட ‘தித்வா’ சூறாவளியின் பேரழிவுகரமான தாக்கத்தைத் தொடர்ந்து இந்த நடவடிக்கை எடுக்கப்பட்டுள்ளது. சூறாவளியால் நாட்டின் பொருளாதாரம் மற்றும் மீட்பு முயற்சிகள் பெரும் அழுத்தத்திற்கு உள்ளாகியுள்ளன.
இலங்கையின் RFI கோரிக்கையை வாரியத்தின் பரிசீலனைக்கு எடுத்துக்கொள்வது இந்த நேரத்தில் முதன்மை முன்னுரிமை என்று இன்று (7) சர்வதேச நாணய நிதிய பேச்சார் உறுதிப்படுத்தினார். இது நாட்டின் உடனடித் தேவைகளுக்கு அவசர ஆதரவை வழங்குவதற்கான சமிக்ஞையாகும்.
இந்த RFI உதவி, இலங்கையின் தற்போதைய நீட்டிக்கப்பட்ட நிதியுதவி வசதி (EFF) திட்டத்திற்கு கூடுதலாக வழங்கப்படும். EFF திட்டம் நாட்டின் பொருளாதார நிலைப்படுத்துதல் மூலோபாயத்தின் ஒரு முக்கிய அடிப்படையாகத் தொடர்கிறது.
IMF பேச்சாளர் தெரிவித்ததாவது: “இலங்கை அதிகாரிகளின் அவசரகால நிதியுதவிக் கோரிக்கையின் வெளிச்சத்தில், விரைவு நிதியுதவிக் கருவி (RFI) கோரிக்கையை சர்வதேச நாணய நிதியம் பரிசீலிப்பது தற்போதைய நிலையில் முதன்மை முன்னுரிமையாக உள்ளது. நீட்டிக்கப்பட்ட நிதியுதவி வசதியின் (EFF) ஐந்தாவது மறுஆய்வை முடிப்பதற்கான பேச்சுவார்த்தைகளை மீண்டும் தொடங்குவதற்காக, IMF குழு ஒன்று 2026 ஆம் ஆண்டின் தொடக்கத்தில் இலங்கைக்கு விஜயம் செய்யும். RFI-இன் கீழ் வழங்கப்படும் ஆதரவு, இலங்கையின் EFF அணுகலுடன் கூடுதலாக இருக்கும்.”
‘தித்வா’ சூறாவளியின் பேரழிவுகரமான தாக்கத்திற்குப் பிறகு, சர்வதேச நாணய நிதியம் (IMF) இலங்கைக்குத் தனது ஒற்றுமையை வெளிப்படுத்தியுள்ளதுடன், அவசரகால நிதி உதவியின் கோரிக்கை தற்போது ஆய்வில் உள்ளதையும் உறுதிப்படுத்தியுள்ளது.
இலங்கைக்கான சர்வதேச நாணய நிதிய பணிப்பாளர் எவன் பாப்பஜோர்ஜியு (Evan Papageorgiou), வெள்ளிக்கிழமை (5) ஒரு அறிக்கையை வெளியிட்டார். அதில் அழிவின் அளவை ஒப்புக்கொண்டதுடன், இந்த இக்கட்டான காலகட்டத்தில் இலங்கை அதிகாரிகளுடன் தொடர்ந்து ஈடுபடுவதாகவும் உறுதியளித்தார்.
“பேரழிவை ஏற்படுத்திய ‘தித்வா’ சூறாவளியின் தாக்கத்தாலும், பரவலான அழிவாலும் ஆழமாகப் பாதிக்கப்பட்ட இலங்கை மக்களுக்கு எமது ஆழ்ந்த இரங்கலைத் தெரிவித்துக் கொள்கிறோம்,” என்று பாப்பஜோர்ஜியு கூறினார்.
