AJ+

பலவீனமடைந்த மற்றும் குண்டுவீச்சினால் சிதைந்த வீடுகள் இடிந்து விழுவதால், காசா குடியிருப்பாளர்கள் உயிருக்கு ஆபத்தான குளிர்கால புயல்களை எதிர்கொள்கின்றனர்.

காசாவில் என்ன நடக்கிறது? சமீபத்திய ‘பைரன்’ (Storm Byron) புயலின் போது காசாவில் சேதமடைந்த பல வீடுகள் இடிந்து விழுந்து, மக்கள் இடிபாடுகளுக்குள் சிக்கிக் கொண்டனர். சில சமயங்களில், கட்டிடங்களின் பகுதிகள் மற்றும் சுவர்கள் அருகில் இருந்த கூடாரங்கள் மீது விழுந்தன. அங்கு இடம்பெயர்ந்த பாலஸ்தீனியர்கள் ஏற்கனவே ஆபத்தான நிலையில் வாழ்ந்து வருகின்றனர். போரில் தங்கள் வீடுகளை இழந்த ஆயிரக்கணக்கான குடும்பங்கள், பாதுகாப்பான இடங்கள் இல்லாததால் பலவீனமான கட்டிடங்களில் தஞ்சமடைந்துள்ளனர். புயலின் கனமழை இந்த கட்டிடங்களை நேரடி அச்சுறுத்தலாக மாற்றியுள்ளது.

இந்த வீடுகள் ஏன் இடிந்து விழுகின்றன? இதற்கு மழை மட்டுமே காரணமல்ல; இஸ்ரேலின் இரண்டு ஆண்டுகால தீவிர குண்டுவீச்சு இந்த கட்டிடங்களின் அடித்தளத்தை நிலை குலையச் செய்துள்ளது.

• முற்றுகை: காசாவிற்குள் கட்டுமானப் பொருட்கள் நுழைவதை இஸ்ரேல் தடுத்துள்ளதால், மக்களால் தங்கள் வீடுகளை பழுதுபார்க்க முடியவில்லை.

• கட்டமைப்பு சேதம்: நேரடித் தாக்குதல்கள் மற்றும் தரைவழி ஊடுருவல்கள் காரணமாக கட்டிடங்களின் தூண்கள் மற்றும் அடித்தளங்களில் விரிசல்கள் ஏற்பட்டுள்ளன.

• மழையின் தாக்கம்: கனமழை இந்த விரிசல்களை மேலும் மோசமாக்குகிறது. நீர் கசிவு காரணமாக அடித்தளம் பலவீனமடைந்து திடீர் இடிபாடுகள் ஏற்படுகின்றன.

• அதிக நெரிசல்: ஒரே வீட்டில் பல குடும்பங்கள் தங்குவது பலவீனமான கட்டிடங்களுக்கு கூடுதல் அழுத்தத்தை அளிக்கிறது.

இரண்டு வருட குண்டுவீச்சு காரணமாக காசாவின் 80 வீதமான கட்டிடங்கள் அழிக்கப்பட்டுள்ளன.இதன் காரணமாக 1.9 மில்லியன் மக்கள் கூடாரங்களில் வசிப்பதுடன் மாரி காலத்தில் கடும் மழை கடும் குளிரையும் கோடைகாலத்தில் கடும் வெயிலையும் எதிர்கொள்கின்றனர்.

பாதிப்புகள் எவ்வளவு பயங்கரமானவை? சமீபத்திய புயலினால் 24 மணி நேரத்திற்குள் 11 பாலஸ்தீனியர்கள் உயிரிழந்தனர். அரசு ஊடக அலுவலகத்தின்படி, 13 வீடுகள் இடிந்து விழுந்ததுடன், 27,000 கூடாரங்கள் வெள்ளத்தில் மூழ்கின அல்லது அடித்துச் செல்லப்பட்டன. உயிரிழந்தவர்களில் குழந்தைகள், பெண்கள் மற்றும் முதியவர்கள் அடங்குவர். ஒரு பச்சிளம் பெண் குழந்தை கடும் குளிரால் உயிரிழந்தது உறுதி செய்யப்பட்டுள்ளது.

ஆனால் கடும் மழை வெள்ளத்தால் கூடாரங்கள் அடித்துசெல்லப்படுகின்ற நிலையில் பாலஸ்தீனியர்களிற்கு இடிந்த வீடுகளில் வசிப்பதே ஒரே வழியாக உள்ளது.

பாதிக்கப்பட்டவர்களுக்கு உதவி கிடைக்கிறதா? இஸ்ரேல் விதித்துள்ள கட்டுப்பாடுகள் காரணமாக அவசரகால மீட்பு நடவடிக்கைகள் மிகவும் குறைவாகவே உள்ளன.

• கனரக இயந்திரங்கள், மீட்பு உபகரணங்கள் மற்றும் எரிபொருள் தட்டுப்பாடு காரணமாக இடிபாடுகளுக்குள் சிக்கியவர்களை மீட்பதில் சிவில் பாதுகாப்பு குழுக்கள் சிரமப்படுகின்றன.

• அதிகாரிகளால் மக்களுக்கு மாற்று தங்குமிடங்களையோ அல்லது வசிக்கக்கூடிய கூடாரங்களையோ வழங்க முடியவில்லை.

• நகராட்சிகளால் வடிகால் அமைப்புகளை சீரமைக்கவோ அல்லது பழுதுபார்க்கும் பணிகளை மேற்கொள்ளவோ முடியவில்லை.

• 

காசாவில் எஞ்சியிருக்கின்ற கட்டிடங்களில் 80 வீதமானவை சேதமடைந்துள்ளதுடன் வசிப்பதற்கு ஆபத்தானவையாக காணப்படுகின்றன.

பாதுகாப்பாக இருக்க வழிகள் ஏதேனும் உண்டா? துரதிர்ஷ்டவசமாக, பாலஸ்தீனியர்களுக்கான வாய்ப்புகள் மிகக் குறைவாகவே உள்ளன. பாதுகாப்பான தங்குமிடங்கள் இல்லாததாலும், இஸ்ரேலிய இராணுவக் கட்டுப்பாட்டில் உள்ள பகுதிகளால் நகர்வு கட்டுப்பாடுகள் இருப்பதாலும் மக்களால் பாதுகாப்பான இடங்களுக்கு இடம்பெயர முடியவில்லை.

ஐக்கிய நாடுகள் சபையின் அகதிகள் முகமை (UNRWA), மனிதாபிமான உதவிகள் எவ்வித தடையுமின்றி அனுமதிக்கப்பட்டால் மட்டுமே இந்த துயரத்தை குறைக்க முடியும் என தெரிவித்துள்ளது. அக்டோபர் 10 அன்று போர்நிறுத்தம் தொடங்கப்பட்ட போதிலும், இஸ்ரேல் உதவிகளைத் தடுப்பது போர்நிறுத்த உடன்படிக்கையை மீறுவதாக அமைந்துள்ளதால், பாலஸ்தீனியர்களின் நிலைமை இன்னும் மேம்படவில்லை.