டிட்வா சூறாவளியைத் தொடர்ந்து இலங்கையின் நிவாரணம், மீட்பு மற்றும் மறுவாழ்வு முயற்சிகளுக்கு ஆதரவளிப்பதற்கான இந்தியாவின் உறுதிப்பாட்டை மீண்டும் உறுதிப்படுத்தி, இந்தியப் பிரதமர் நரேந்திர மோடி ஜனாதிபதி அநுர குமார திஸாநாயக்கவுக்கு கடிதம் எழுதியுள்ளார். தொடர்ச்சியான ஒத்துழைப்பு மற்றும் விரிவான உதவித் தொகுப்பு குறித்து விவாதிக்க வெளிவிவகார அமைச்சர் கலாநிதி எஸ்.ஜெய்சங்கர் விசேட தூதுவராக அனுப்பப்பட்டுள்ளதை இக்கடிதம் உறுதிப்படுத்துகிறது.
இந்தியப் பிரதமர் நரேந்திர மோடி அவர்கள், இலங்கை ஜனாதிபதி அனுரகுமாரதிசநாயக்கவுக்கு எழுதிய விசேட கடிதம்:
டிட்வா சூறாவளியால் ஏற்பட்ட சேதங்களிலிருந்து உங்கள் நாடு மீண்டு வரும் வேளையில், நிவாரணம் மற்றும் மறுவாழ்வுப் பணிகளில் இந்தியா இலங்கையுடன் எவ்வாறு ஒத்துழைக்க முடியும் என்பது குறித்து விவாதிப்பதற்காக எனது விசேட தூதுவராக வெளிவிவகார அமைச்சர் கலாநிதி எஸ்.ஜெய்சங்கர் அவர்களை நான் அனுப்பி வைக்கிறேன்.
எமது ‘அண்டை நாட்டுக்கே முதலிடம்’ (Neighbourhood First) கொள்கை மற்றும் ‘முதலில் பதிலளிப்பவர்’ (First Responder) என்ற உறுதிப்பாட்டிற்கு இணங்க, உடனடி சவால்களை எதிர்கொள்ள ‘ஆபரேஷன் சாகர் பந்து’ (Operation Sagar Bandhu) திட்டத்தை நாங்கள் மேற்கொண்டோம். இந்தியக் கப்பல்கள், விமானங்கள் மற்றும் ஹெலிகாப்டர்கள் நிவாரணப் பொருட்கள் மற்றும் அவசர கால உபகரணங்களைக் கொண்டு வந்தன. உங்கள் தேடல் மற்றும் மீட்பு முயற்சிகளுக்கு அவை ஆதரவளித்தன. அதே வேளையில் மருத்துவ அவசரநிலைகளைக் கையாள்வதற்கும், முக்கியமான போக்குவரத்து மற்றும் தகவல் தொடர்பு இணைப்புகளை மீட்டெடுப்பதற்கும் இந்தியாவின் சிறப்பு குழுக்கள் பணியில் ஈடுபடுத்தப்பட்டன. ‘ஆபரேஷன் சாகர் பந்து’ இலங்கையில் பலரது வாழ்க்கையைத் தொட்டதுடன், நமது ஆழமான பிணைப்பின் வெளிப்பாடாகப் பரவலாகக் கருதப்பட்டதில் நாங்கள் மகிழ்ச்சியடைகிறோம்.
இலங்கை இப்போது அடுத்த கட்டத்தை நோக்கித் தனது கவனத்தைச் செலுத்தும் வேளையில், ஒரு நம்பிக்கைக்குரிய பங்காளியாகவும், நம்பகமான நண்பனாகவும் இந்தியா அனைத்து சாத்தியமான ஆதரவையும் வழங்கும் என்று நான் உங்களுக்கு உறுதியளிக்க விரும்புகிறேன். கடந்த காலத்தைப் போலவே, இலங்கையில் மக்களின் வாழ்வாதாரத்தைக் கட்டியெழுப்புவதிலும், மீளெழுச்சியை உறுதிப்படுத்துவதிலும் நாங்கள் உங்களுடன் தோளோடு தோள் நிற்போம்.
இந்தச் சூழலில், இந்தியா ஒரு விரிவான உதவித் தொகுப்பை வழங்கும் என்பதை உங்களுக்குத் தெரிவிப்பதில் நான் மகிழ்ச்சியடைகிறேன். இந்த உதவித் தொகுப்பை எவ்வாறு சிறந்த முறையில் நடைமுறைப்படுத்தலாம் என்பது குறித்து உங்கள் அரசாங்கத்துடன் கலந்துரையாடுமாறு அமைச்சர் ஜெய்சங்கர் அவர்களை நான் கேட்டுக்கொண்டுள்ளேன்.
இலங்கை முன்னெப்போதையும் விட வலிமையுடன் மீண்டும் எழுச்சி பெறும் என்பதில் நான் உறுதியாக இருக்கிறேன். இந்தப் பயணத்திலும், நாட்டின் வளர்ச்சி மற்றும் முன்னேற்றத்திலும், இந்தியா எப்போதும் இலங்கையின் பக்கபலமாக இருக்கும்.
மேதகு ஜனாதிபதி அவர்களே, எனது உயரிய மரியாதையை ஏற்றுக்கொள்வீர்களாக.
