ஜனவரி 15, 2026 |
‘டிட்வா’ (Ditwah) சூறாவளியினால் பாதிக்கப்பட்ட சமூகங்களுக்கு உதவுவதற்காக, பிரித்தானியாவில் உள்ள இலங்கை உயர்ஸ்தானிகராலயத்திற்கு அருகில் வசிக்கும் பிரித்தானிய தம்பதியினர், அரசாங்கத்தின் ‘இலங்கையை மீண்டும் கட்டியெழுப்புதல்’ (Rebuilding Sri Lanka) நிதிக்கு £2,000 நன்கொடையாக வழங்கியுள்ளனர்.
திரு. மற்றும் திருமதி ரிச்சர்ட் வுட் (Mr. and Mrs. Richard Wood) ஆகிய இருவருமே இந்தத் தொகையை வழங்கியுள்ளனர். இது தொடர்பான கடிதத்தையும், நிதி வழங்கியதற்கான பற்றுச்சீட்டையும் (Receipt) ஐக்கிய இராச்சியத்திற்கான இலங்கை உயர்ஸ்தானிகர் நிமல் சேனாதீரவிடம் அவர்கள் முறைப்படி கையளித்தனர்.
சூறாவளியினால் பாதிக்கப்பட்ட இலங்கையர்களுக்கான நிவாரணப் பணிகளுக்கு ஆதரவளிப்பதற்காக இந்த நன்கொடை வழங்கப்பட்டதாக அந்தத் தம்பதியினர் தமது கடிதத்தில் குறிப்பிட்டுள்ளனர். மேலும், அண்மையில் கிறிஸ்மஸ் மற்றும் புத்தாண்டு காலப்பகுதியில் இலங்கைக்கு மேற்கொண்ட மூன்று வார கால சுற்றுப்பயணத்தின் இனிமையான நினைவுகளையும் அவர்கள் இதன்போது பகிர்ந்து கொண்டனர்.
இலங்கையின் இயற்கை அழகு, மக்களின் அன்பான உபசரிப்பு மற்றும் போற்றத்தக்க குணங்கள், அத்துடன் இலங்கையின் சுவையான மற்றும் பலதரப்பட்ட உணவு வகைகள் தங்களைக் கவர்ந்ததாக வுட் தம்பதியினர் தெரிவித்துள்ளனர்.
சூறாவளியால் பெரும் அழிவுகள் ஏற்பட்ட போதிலும், அதிலிருந்து மீண்டு வருவதற்கான வலுவான உறுதியையும், மனத்திடத்தையும் இலங்கை வெளிப்படுத்தி வருவதாகவும் அவர்கள் அவதானித்துள்ளனர்.
இலங்கை உயர்ஸ்தானிகராலயத்துடன் தாங்கள் பேணி வரும் சுமூகமான உறவைப் பாராட்டிய அவர்கள், எதிர்காலத்திலும் இந்த நட்பு நீடிக்க வேண்டும் என விருப்பம் தெரிவித்தனர். அத்துடன், இலங்கையின் வரவிருக்கும் தேசிய தினத்தை முன்னிட்டு தமது வாழ்த்துகளையும் அவர்கள் தெரிவித்துக் கொண்டனர்.
இந்த சவாலான நேரத்தில் இலங்கை மக்களுடன் தங்களது ஒற்றுமையை வெளிப்படுத்திய தம்பதியினரின் தாராளமான பங்களிப்பிற்கு உயர்ஸ்தானிகராலயம் தனது நன்றிகளைத் தெரிவித்துக் கொண்டது.
