டி20 கிரிக்கெட் உலகக் கோப்பையில் மிகவும் எதிர்பார்க்கப்படும் இந்தியா – பாகிஸ்தான் போட்டி, திட்டமிட்டபடி கொழும்பில் நடைபெறுவதற்கு ஆதரவு அளித்த பாகிஸ்தான் பிரதமர் ஷேபாஸ் ஷெரீப்பிற்கு இலங்கை ஜனாதிபதி அனுரகுமார திசநாயக்க தனது நன்றியையும் பாராட்டுகளையும் தெரிவித்துள்ளார்.
சமூக வலைதளத்தில் பகிர்ந்துள்ள செய்தியில் ஜனாதிபதி அனுரகுமார திசநாயக்க, இந்தத் தொடரை இணைந்து நடத்தும் நாடுகளில் ஒன்று என்ற முறையில், இந்த முக்கியமான போட்டி தடையின்றி தொடர்வதை உறுதி செய்ய எட்டப்பட்ட ஒருமித்த கருத்தை எண்ணி இலங்கை மகிழ்ச்சியடைகிறது என்றார். மேலும், இந்தப் போட்டியைச் சுற்றியிருந்த சிக்கல்களைக் கையாண்ட சர்வதேச கிரிக்கெட் கவுன்சில் (ICC) மற்றும் பிற தரப்பினரின் பங்களிப்பையும் அவர் அங்கீகரித்தார்.
கிரிக்கெட் வரலாற்றை நினைவு கூர்ந்த ,ஜனாதிபதி அனுரகுமார திசநாயக்க 1996-ஆம் ஆண்டு உலகக் கோப்பையைச் சுட்டிக்காட்டினார். அப்போது பாதுகாப்பு காரணங்களால் மற்ற நாடுகள் இலங்கைக்கு வரத் தயங்கிய நிலையில், இந்தியா மற்றும் பாகிஸ்தான் ஆகிய இரு நாடுகளும் கொழும்பிற்கு வந்து விளையாடி இலங்கைக்கு ஆதரவாக நின்றதை அவர் நினைவு கூர்ந்தார். இத்தகைய ஒற்றுமை உணர்வு மிக்கச் செயல்கள் பல தசாப்தங்களுக்குப் பிறகும் இன்றும் மக்கள் மனதில் நீங்காத இடத்தைப் பிடித்துள்ளன என்று அவர் குறிப்பிட்டார்.
விளையாட்டு என்பது நாடுகளுக்கு இடையிலான ஒரு பாலமாகும் என்ற இலங்கையின் பரந்த பார்வையையும் அதிபரின் இந்தக் கருத்துக்கள் அடிக்கோடிட்டுக் காட்டுகின்றன. கிரிக்கெட் உலகின் மிகப்பெரிய போட்டியான இந்தியா – பாகிஸ்தான் மோதல் மீண்டும் இலங்கை மண்ணில் நடப்பதன் மூலம், உலகளாவிய விளையாட்டுத் துறையில் இலங்கை ஒரு நம்பகமான மற்றும் வரவேற்கத்தக்க நாடு என்பது மீண்டும் உறுதிப்படுத்தப்பட்டுள்ளதாக அவர் திருப்தி தெரிவித்தார்.
