இலங்கை நாடாளுமன்றத்தில் கேள்வி: IRIS Dena கப்பல் டார்பிடோவால் தாக்கப்படுவதற்கு முன்பு 11 மணிநேரம் காத்திருக்க வைக்கப்பட்டதா?
INDIAN EXPRESS | மார்ச் 6, 2026
இலங்கையின் தெற்கு கடற்கரைக்கு அருகே அமெரிக்க நீர்மூழ்கிக் கப்பல் ஈரானிய கடற்படைப் போர்க்கப்பலை டார்பிடோ ஏவுகணை மூலம் மூழ்கடித்த ஒரு நாளைக்குப் பிறகு, இரண்டாவது ஈரானிய கடற்படை கப்பல்( விநியோகம்) இலங்கையின் கடல் எல்லைக்கு வெளியே பல மணிநேரம் காத்திருந்தது.
இறுதியாக, அந்தப் கப்பலான IRIS Bushehr-ல் உள்ள மாலுமிகள் கொழும்பு துறைமுகத்தில் இறங்க அனுமதிக்கப்படுவார்கள் என்று அநுர குமார திஸாநாயக்க தெரிவித்தார். அந்தக் கப்பல் திருகோணமலை துறைமுகத்திற்கு கொண்டு செல்லப்படும் என்றும், அதில் உள்ள 208 பணியாளர்களைப் பாதுகாப்பாக கொழும்புக்கு அழைத்து வர இலங்கை கடற்படை ஏற்பாடு செய்யும் என்றும் அவர் கூறினார்.
முன்னதாக, அந்தப் ஈரானிய கடற்படை கப்பல் இலங்கையின் பிரத்தியேக பொருளாதார மண்டலத்திற்குள் (EEZ) நின்றபடி, உதவிக்காக துறைமுகத்திற்குள் நுழைய அனுமதி கிடைக்குமா என்று காத்திருப்பதாக இலங்கை அதிகாரிகள் உறுதிப்படுத்தினர். அரசாங்க செய்தித் தொடர்பாளரும் அமைச்சருமான நலிந்த ஜயதிஸ்ஸ, மனிதாபிமான அக்கறைகளுக்கு முன்னுரிமை அளித்து அரசாங்கம் அடுத்தகட்ட நடவடிக்கைகள் குறித்து ஆலோசித்து வருவதாக நாடாளுமன்றத்தில் தெரிவித்தார்.
“நாங்கள் இதை அறிந்திருக்கிறோம், கப்பலில் உள்ள அனைத்து உயிர்களையும் பாதுகாக்க நடவடிக்கை எடுக்க ஆலோசித்து வருகிறோம்,” என்று ஜயதிஸ்ஸ கூறினார். “பிராந்திய அமைதியைப் பாதுகாக்க இந்த விவகாரத்தில் நாங்கள் தலையிடுகிறோம்.”
ஈரானின் தெற்கு கடற்படையைச் சேர்ந்த ‘மௌஜ்’ ரக போர்க்கப்பலான IRIS Dena, புதன்கிழமை காலை காலிக்கு தெற்கே சுமார் 40 கடல் மைல் தொலைவில், இலங்கையின் பிரத்தியேக பொருளாதார மண்டலத்திற்குள் அமெரிக்க நீர்மூழ்கிக் கப்பலால் ஏவப்பட்ட டார்பிடோ மூலம் மூழ்கடிக்கப்பட்ட ஒரு நாளைக்குப் பிறகு இந்த முன்னேற்றம் ஏற்பட்டுள்ளது. இந்தத் தாக்குதலை அமெரிக்கா நடத்தியதை அந்நாட்டின் போர்ச் செயலாளர் பீட் ஹெக்செத் பகிரங்கமாக உறுதிப்படுத்தினார். அந்தப் போர்க்கப்பல் இந்தியாவில் நடைபெற்ற கடற்படைப் பயிற்சியை முடித்துவிட்டுத் திரும்பிக் கொண்டிருந்தது.
இந்தத் தாக்குதல் இந்தியப் பெருங்கடலில் ஒரு அரிதான கடற்படை மோதலாகப் பதிவாகியுள்ளது. இரண்டாம் உலகப் போருக்குப் பிறகு அமெரிக்கா அந்தப் பகுதியில் ஒரு எதிரிக் கப்பலை இலக்கு வைத்துத் தாக்குவது இதுவே முதல் முறை என்று அமெரிக்க அரசு கூறியுள்ளது.
புதன்கிழமை காலை 5:08 மணியளவில் பாதிக்கப்பட்ட கப்பலில் இருந்து முதல் அவசர அழைப்பு வந்ததாக இலங்கை அதிகாரிகள் தெரிவித்தனர். வான்வழி ரோந்துப் படைகள் அங்கு செல்வதற்கு முன்பே கப்பல் முழுமையாக மூழ்கிவிட்டது, கடலில் எண்ணெய் படலம் மட்டுமே எஞ்சியிருந்தது.
வியாழக்கிழமை இலங்கை நாடாளுமன்றத்தில், அந்த ஈரானிய போர்க்கப்பல் முன்னதாகவே இலங்கை கடல் எல்லைக்குள் நுழைய அனுமதி கோரியதா என்று எதிர்க்கட்சி அரசியல்வாதிகள் அரசாங்கத்தை நெருக்கினர். எஸ்ஜேபி (SJB) நாடாளுமன்ற உறுப்பினர் முஜிபுர் ரஹ்மான், அந்தக் கப்பல் ஏன் பல மணிநேரம் கரையை விட்டுத் தள்ளி காத்திருக்க வைக்கப்பட்டது என்று கேள்வி எழுப்பினார். “ஈரானில் நிலவும் போர்ச் சூழல் காரணமாக நாடு திரும்புவதில் சிக்கல் இருந்ததால், கப்பலை நிறுத்த அனுமதி கோரி காலி துறைமுகத்திற்கு வெளியே 11 மணிநேரம் அது காத்திருந்தது,” என்று ரஹ்மான் கூறினார்.
இந்தியன் எக்ஸ்பிரஸ்
உடன் (The Indian Express) பேசிய ரஹ்மான், “அமெரிக்க நீர்மூழ்கிக் கப்பலால் தாக்கப்பட்ட கப்பல் 11 மணிநேரம் அனுமதி கோரி காத்திருந்தது. அமெரிக்கா மற்றும் இந்தியாவின் அழுத்தம் காரணமாக இலங்கை அதிகாரிகள் அனுமதி வழங்கத் தாமதித்தார்களா?” என்று கேள்வி எழுப்பினார்.
மத்திய கிழக்கில் பதற்றம் அதிகரித்து வரும் நிலையில், போட்டி நிலவும் புவிசார் அரசியல் அழுத்தங்களுக்கு மத்தியில் இலங்கை அரசாங்கம் சிக்கிக்கொண்டதா என்பது குறித்த உள்நாட்டு விவாதத்தை அவரது கருத்துக்கள் பிரதிபலித்தன.
எதிர்க்கட்சித் தலைவர் சஜித் பிரேமதாச, கொழும்புக்கு அருகில் மற்றொரு ஈரானிய கப்பல் இருப்பது உணர்ச்சிகரமான இராஜதந்திர சூழலை உருவாக்கியுள்ளதாகக் கூறினார். இதற்குப் பதிலளித்த ஜயதிஸ்ஸ, அரசாங்கத்திடம் பகிரங்கமாக வெளியிடப்பட்டதை விட அதிக தகவல்கள் இருப்பதாகவும், நிலைமை சீரானதும் முழுமையான அறிக்கை சமர்ப்பிக்கப்படும் என்றும் கூறினார்.
முன்னாள்ஜனாதிபதிமஹிந்த ராஜபக்சவின் மகன்ம், நாமல் ராஜபக்ச, அரசாங்கம் தனது நிலையை விரைவாகத் தெளிவுபடுத்த வேண்டும் என்று வலியுறுத்தினார். 1971-ஆம் ஆண்டு வங்கதேச விடுதலைப் போரின் போது, இந்தியா தனது வான்பரப்பை மூடியிருந்த போதும், மனிதாபிமான அடிப்படையில் பாகிஸ்தான் விமானம் எரிபொருள் நிரப்ப சிறிமாவோ பண்டாரநாயக்க அனுமதி அளித்த முன்னுதாரணத்தை அவர் சுட்டிக்காட்டினார். “அரசாங்கத்தால் தீர்மானிக்க முடியாவிட்டால், சிறிமாவோ பண்டாரநாயக்க ஏற்படுத்திய நடுநிலைமை முன்னுதாரணத்தை அது பின்பற்ற வேண்டும்,” என்றார்.
இது குறித்து கொழும்பில் உள்ள ஈரானிய தூதரகம் கூறுகையில், புதன்கிழமை காலை நடந்த தாக்குதல் மற்றும் கப்பல் மூழ்கியதற்கு முன்னும் பின்னும் நடந்த நிகழ்வுகள் குறித்து இலங்கை அதிகாரிகளிடமிருந்து விவரங்களை எதிர்பார்ப்பதாகத் தெரிவித்தது.
இதற்கிடையில், காலியில் உள்ள உள்ளூர் மக்கள் மற்றும் சமூக ஆர்வலர்கள் காயமடைந்த மாலுமிகளுக்கு உதவ முன்வந்தனர். காலி புற்றுநோய் சங்கம் மற்றும் தன்னார்வலர்கள், மருத்துவமனையில் சிகிச்சை பெற்று வரும் மீட்கப்பட்ட மாலுமிகளுக்கு உணவு, உடைகள் மற்றும் அத்தியாவசியப் பொருட்களை வழங்கினர்.
